1984 શીખ વિરોધી રમખાણ પીડિતો માટે દિલ્હીના LGનો મોટો નિર્ણય, જાણો શું છે

નવી દિલ્હી, 5 જાન્યુઆરી : વર્ષ 1984ના શીખ વિરોધી રમખાણોના પીડિતો માટે મહત્વના અને મોટા સમાચાર સામે આવ્યા છે. દિલ્હીના લેફ્ટનન્ટ ગવર્નર વીકે સક્સેનાએ 1984ના શીખ વિરોધી રમખાણોના પીડિતોને રોજગાર આપવા માટે ભરતીના ધોરણોમાં વધુ છૂટછાટને મંજૂરી આપી છે. 88 અરજદારો માટે જરૂરી શૈક્ષણિક લાયકાત અને 55 વર્ષ સુધીની વય મર્યાદામાં સંપૂર્ણ છૂટછાટ મંજૂર કરવામાં આવી છે.

રાજ નિવાસના એક અધિકારીએ રવિવારે આ અંગે માહિતી આપી હતી. તેમણે માહિતી આપી હતી કે અરજદારોને જરૂરી શૈક્ષણિક લાયકાતમાં છૂટછાટ આપવામાં આવી છે અને તમામ 88 અરજદારો માટે ઉચ્ચ વય મર્યાદા વધારીને 55 વર્ષ કરવામાં આવી છે.

શું છે LG ઓફિસની નોટિફિકેશન

વિવિધ સરકારી વિભાગોમાં કાર્યકારી કર્મચારીઓ તરીકે તેમની નિમણૂક માટે મુક્તિ મંજૂર કરવામાં આવી છે. લેફ્ટનન્ટ ગવર્નરની ઓફિસમાંથી જારી કરાયેલી એક નોંધમાં જણાવવામાં આવ્યું છે કે, દિલ્હી શીખ ગુરુદ્વારા મેનેજમેન્ટ કમિટી, જનપ્રતિનિધિઓ અને પીડિતોના જૂથો દ્વારા આ સંબંધમાં વારંવાર રજૂઆત કરવામાં આવી હતી, જેઓ તાજેતરમાં લેફ્ટનન્ટ ગવર્નરને મળ્યા હતા. 1984ના શીખ વિરોધી રમખાણોના પીડિતો માટે નોકરીની જોગવાઈ સહિત પુનર્વસન પેકેજને 16 જાન્યુઆરી, 2006ના રોજ કેન્દ્રીય ગૃહ મંત્રાલય દ્વારા મંજૂરી આપવામાં આવી હતી.

આ પણ વાંચો :- બજેટમાં નોકરીની નવી તકો વધારવા પર ભાર મુકાશે, CIIએ સરકારને આપ્યા આ સૂચન