દિલ્હીને મળ્યા વધુ એક મહિલા સીએમ, રેખા ગુપ્તા કાલે લેશે મુખ્યમંત્રી પદના શપથ

દિલ્હી, 19 ફેબ્રુઆરી : દિલ્હીમાં ભારતીય જનતા પાર્ટીના 27 વર્ષના વનવાસનો અંત આવ્યા બાદ હવે મુખ્યમંત્રી પદની રાહ પણ સમાપ્ત થઈ ગઈ છે. શાલીમાર બાગથી ધારાસભ્ય તરીકે ચૂંટાયેલા મહિલા નેતા રેખા ગુપ્તા બનશે દિલ્હીના નવા મુખ્યમંત્રી. તેઓ આવતીકાલે સીએમ પદના શપથ લેશે. ભારતીય જનતા પાર્ટી તરફથી આ અંગે સત્તાવાર જાહેરાત કરવામાં આવશે.

દિલ્હીમાં ભાજપે હવે મુખ્યમંત્રીના નામની સત્તાવાર જાહેરાત કરી છે અને રેખા ગુપ્તાના નામને ધારાસભ્ય દળની બેઠકમાં મંજૂરી આપવામાં આવી છે. દિલ્હીની શાલીમાર બાગ સીટથી પહેલીવાર ધારાસભ્ય બનેલા રેખા ગુપ્તા આગામી મુખ્યમંત્રી બનશે. તમામ અટકળોને પાછળ છોડીને ભાજપે મહિલા ચહેરા પર જુગાર ખેલ્યો છે અને વૈશ્ય સમુદાયમાંથી આવતા રેખા ગુપ્તાને મુખ્યમંત્રી બનાવવાનો નિર્ણય કર્યો છે. હવે ગુરુવારે તેઓ રામલીલા મેદાનમાં દિલ્હીની ચોથા મહિલા મુખ્યમંત્રી તરીકે શપથ લેશે.

ડીયુ વિદ્યાર્થી સંઘના પ્રમુખથી શરૂ

રેખા ગુપ્તાએ દિલ્હી યુનિવર્સિટીમાંથી અભ્યાસ કર્યો છે અને કોલેજકાળથી જ અખિલ ભારતીય વિદ્યાર્થી પરિષદ (ABVP) સાથે જોડાયેલી છે. તેમણે દિલ્હી યુનિવર્સિટી સ્ટુડન્ટ્સ યુનિયન (DUSU) માં પ્રમુખ અને સચિવ પદ માટે પણ ચૂંટણી જીતી હતી. આ સિવાય તે ત્રણ વખત દિલ્હી મ્યુનિસિપલ કોર્પોરેશનમાં કાઉન્સિલર રહી ચૂક્યા છે. તેમણે શાલીમાર બાગ બેઠક પરથી AAP ઉમેદવાર બંદના કુમારીને 30 હજાર મતોથી હરાવ્યા છે.

મૂળ જિંદ, હરિયાણાના રેખા ગુપ્તાનો જન્મ વર્ષ 1974માં જુલાનામાં થયો હતો. પિતાને એસબીઆઈ બેંકમાં નોકરી મળ્યા બાદ તેમનો પરિવાર દિલ્હી શિફ્ટ થઈ ગયો હતો. જોકે, તેનો પરિવાર હજુ પણ જુલાનામાં બિઝનેસ કરે છે. દિલ્હીને અડીને આવેલા હરિયાણાના હોવાને કારણે રેખા ગુપ્તા પોતાના ગૃહ રાજ્યમાં આવતા રહે છે.

મહિલા મોરચાના રાષ્ટ્રીય ઉપાધ્યક્ષ

ધારાસભ્ય બનતા પહેલા રેખા ગુપ્તાએ ભાજપમાં સંગઠન સ્તરે મહત્વની જવાબદારીઓ પણ નિભાવી હતી. તે ભાજપ મહિલા મોરચાની રાષ્ટ્રીય ઉપાધ્યક્ષ છે અને દિલ્હી ભાજપમાં મહાસચિવનું પદ સંભાળી રહ્યા છે. DUની દૌલતરામ કોલેજમાંથી અભ્યાસ કરનાર રેખા ગુપ્તા M.A અને M.B.A ડિગ્રી ધરાવે છે. ખાસ વાત એ છે કે તે લાંબા સમયથી આરએસએસના સક્રિય સભ્ય છે અને સંઘના કાર્યક્રમોમાં સક્રિયપણે ભાગ લે છે.

તેઓ 1994-95માં દોલતરામ કોલેજના સેક્રેટરી હતા. બાદમાં 1995-96માં દિલ્હી યુનિવર્સિટીમાં સેક્રેટરી તરીકે કામ કર્યું હતું. વર્ષ 1996-97માં દિલ્હી યુનિવર્સિટી વિદ્યાર્થી સંઘના પ્રમુખ હતા. તેઓ 2003-04માં દિલ્હી પ્રદેશ મહિલા મોરચાના સેક્રેટરી હતા. વર્ષ 2004-06માં ભાજપ યુવા મોરચાના રાષ્ટ્રીય સચિવ હતા. વર્ષ 2007માં પીતમપુરા ઉત્તરમાંથી કાઉન્સિલર તરીકે ચૂંટાયા હતા. આ ઉપરાંત 2009માં દિલ્હી પ્રદેશ મહિલા મોરચાના મહાસચિવ બન્યા હતા તેમજ તેઓ વર્ષ 2010માં ભાજપની રાષ્ટ્રીય કાર્યકારિણીના સભ્ય તરીકે ચૂંટાયા હતા.

પ્રવેશ વર્માએ નામનો પ્રસ્તાવ મૂક્યો હતો

અગાઉ ભાજપે સાંસદ રવિશંકર પ્રસાદ અને ઓપી ધનખરને નિરીક્ષક તરીકે નિયુક્ત કર્યા હતા. બંને નેતાઓએ દિલ્હીમાં ભાજપના ધારાસભ્યો સાથે બેઠક કરી અને રેખા ગુપ્તાને ધારાસભ્ય દળના નેતા તરીકે ચૂંટ્યા હતા. તેમના નામનો પ્રસ્તાવ પ્રવેશ વર્મા અને વિજેન્દ્ર ગુપ્તાએ રાખ્યો હતો. હવે ભાજપનું એક પ્રતિનિધિમંડળ લેફ્ટનન્ટ ગવર્નર વીકે સક્સેનાને મળશે અને સરકાર બનાવવાનો દાવો રજૂ કરશે. આ પછી ગુરુવારે રેખા ગુપ્તા રામલીલા મેદાનમાં દિલ્હીના મુખ્યમંત્રી તરીકે શપથ લેશે.

આ વખતે ભાજપે 27 વર્ષ બાદ દિલ્હીમાં વિધાનસભા ચૂંટણી જીતી છે. રાજધાનીમાં છેલ્લા એક દાયકાથી આમ આદમી પાર્ટી સત્તામાં હતી, જેને આ વખતે માત્ર 22 બેઠકો મળી છે. જ્યારે ભાજપે 70માંથી 48 બેઠકો જીતીને ઈતિહાસ રચ્યો છે. બીજેપીના બમ્પર વેવમાં પૂર્વ સીએમ અરવિંદ કેજરીવાલ, પૂર્વ ડેપ્યુટી સીએમ મનીષ સિસોદિયા અને AAPના ઘણા વરિષ્ઠ નેતાઓએ પણ પોતાની સીટ ગુમાવી છે.