દિલ્હીના એપ આધારિત વાહનો ઇલેક્ટ્રિક હશે, કેબ એગ્રીગેટર પોલિસી લાગુ

• આ યોજના જાહેર સુરક્ષા અને દિલ્હીના નાગરિકોની સુવિધા વધારવાની દિશામાં એક મોટું પગલું છે.
• વાહનની સ્વચ્છતા, ડ્રાઇવરની વર્તણૂક અને ગ્રાહકની ફરિયાદોના સમયસર નિરાકરણ અંગેની માર્ગદર્શિકાનો સમાવેશ થાય છે.

નવી દિલ્હી, 30 નવેમ્બર: દિલ્હીના લોકો માટે એક સારા સમાચાર છે. કેજરીવાલ સરકારે દિલ્હી મોટર વ્હીકલ એગ્રીગેટર અને ડિલિવરી સર્વિસ પ્રોવાઈડર સ્કીમ 2023નું નોટિફિકેશન બહાર પાડી છે. આ સાથે દિલ્હી હવે એપ-આધારિત કેબ અને ડિલિવરી સેવાઓ પ્રદાન કરતા વાહનોને ચોક્કસ સમયમાં ઇલેક્ટ્રિકમાં રૂપાંતરિત કરવાનું લક્ષ્ય નિર્ધારિત કરનાર ભારતનું પ્રથમ રાજ્ય બની ગયું છે.

હવે દિલ્હીમાં કામ કરતા ઓપરેટરો માટે સૂચના જારી થયાના 90 દિવસની અંદર લાઇસન્સ મેળવવું ફરજિયાત રહેશે. લાયસન્સ ધરાવતા ઓપરેટરોએ તેમના વાહનના કાફલાને 2030 સુધીમાં તબક્કાવાર રીતે 100 ટકા ઇલેક્ટ્રિકમાં રૂપાંતરિત કરવું પડશે. જો યોજના હેઠળ નિયમોનું ઉલ્લંઘન જોવા મળે છે, તો એગ્રીગેટર્સ અને સેવા પ્રદાતાઓ પર 5 હજારથી એક લાખ રૂપિયાના દંડની જોગવાઈ કરવામાં આવી છે.

દેશનું પ્રથમ રાજ્ય

આ પહેલની પ્રશંસા કરતા દિલ્હીના પરિવહન પ્રધાન કૈલાશ ગેહલોતે કહ્યું કે, દિલ્હીમાં એગ્રીગેટર્સને લાઇસન્સ અને નિયમન કરવાની લાંબા સમયથી જરૂરિયાત છે. ભારતમાં આ પ્રથમ વખત છે જ્યારે આ ઓપરેટરો માટે તબક્કાવાર વિદ્યુતીકરણ લક્ષ્યો પણ એગ્રીગેટર માર્ગદર્શિકામાં વ્યાખ્યાયિત કરવામાં આવ્યા છે.

પ્રદૂષણ સામે મોટું પગલું

તેમણે જણાવ્યું હતું કે, દિલ્હી સરકારે હંમેશા દિલ્હીને સ્વચ્છ અને પ્રદૂષણ મુક્ત શહેર બનાવવાની દિશામાં પગલાં લીધાં છે. આ પહેલીવાર છે જ્યારે અમે શહેરમાં બાઇક ટેક્સીઓને ચલાવવાની મંજૂરી આપી રહ્યા છીએ. એકંદરે આ યોજના જાહેર સલામતી અને દિલ્હીના નાગરિકોની સુવિધા વધારવા માટેનું એક પગલું છે અને તેમાં વાહનની સ્વચ્છતા, ડ્રાઇવરની વર્તણૂક અને ગ્રાહકની ફરિયાદોના સમયસર નિરાકરણ અંગેની માર્ગદર્શિકાનો સમાવેશ થાય છે.

યોજનાની મુખ્ય લાક્ષણિકતાઓ

• ટકાઉ ગતિશીલતા: આ યોજના હેઠળ સેવા પ્રદાતાઓએ હવાનું પ્રદૂષણ ઘટાડવા અને ગ્રીન મોબિલિટી વધારવા માટે ધીમે ધીમે તેમના કાફલાને ઇલેક્ટ્રિકમાં રૂપાંતરિત કરવું પડશે. દિલ્હીમાં તમામ એગ્રીગેટર્સનો આખો કાફલો 2030 સુધીમાં ઇલેક્ટ્રિક બની જશે.
• ઇલેક્ટ્રિક બાઇક ટેક્સીઃ તમામ એગ્રીગેટર્સને માત્ર ઇલેક્ટ્રિક વાહન બાઇક ટેક્સીઓ ચલાવવાની મંજૂરી આપવામાં આવશે. તેમજ તેઓએ યોજનામાં નિર્દિષ્ટ તમામ માર્ગદર્શિકાઓનું પાલન કરવું પડશે.
• સેવા ગુણવત્તા ધોરણો: યોજનાએ સેવાની ગુણવત્તા માટે કડક ધોરણો નક્કી કર્યા છે. જેમાં વાહનની સ્વચ્છતા, ડ્રાઈવરનું વર્તન અને ગ્રાહકની ફરિયાદોનું સમયસર નિરાકરણ સામેલ છે.
• જાહેર સલામતી: આ યોજનામાં મુસાફરોની જાહેર સલામતી સુનિશ્ચિત કરવા પર વિશેષ ભાર મૂકવામાં આવ્યો છે.

તેઓએ નિયમોનું પાલન કરવું પડશે

આ યોજના એગ્રીગેટર્સ, ડિલિવરી સેવા પ્રદાતાઓ અથવા દિલ્હીમાં કાર્યરત ઈ-કોમર્સ એન્ટિટીને લાગુ પડે છે. આમાં એવા સેવા પ્રદાતાઓનો સમાવેશ થશે કે જેમની પાસે તેમના કાફલામાં 25 કે તેથી વધુ મોટર વાહનો (2 વ્હીલર, 3 વ્હીલર્સ અને 4 વ્હીલર્સ, બસો સિવાય) છે અને જેઓ ગ્રાહકો સાથે જોડાવા માટે એપ્સ અથવા વેબ પોર્ટલ જેવા ડિજિટલ મધ્યસ્થીઓનો ઉપયોગ કરે છે.

આ પણ વાંચો, તેલંગાણા વિધાનસભાની 119 બેઠકો પર મતદાન થયું શરૂ, PMએ મતદાન કરવા કરી અપીલ