દેહરાદૂન : ઉત્તરાખંડ રોડવેઝની બસમાં સગીરા સાથે સામૂહિક દૂષ્કર્મ

• બસ ડ્રાઈવર અને કંડક્ટર સહિત 6 લોકોની ધરપકડ

દેહરાદૂન, 18 ઓગસ્ટ : દિલ્હીથી ઉત્તરાખંડ રોડવેઝની બસમાં સગીરા ઉપર બળાત્કારનો મામલો સામે આવ્યો છે. એસએસપીએ તાત્કાલિક કાર્યવાહી કરી અને બસ ડ્રાઈવર અને કંડક્ટર સહિત 6 લોકોની ધરપકડ કરી હતી. પોલીસ આ મામલે તપાસ કરી રહી છે. જોકે મેડિકલ રિપોર્ટ આવવાનો બાકી છે.

ભોગ બનનાર યુપીની રહેવાસી

મળતી માહિતી મુજબ પીડિતા ઉત્તર પ્રદેશના મુરાદાબાદ જિલ્લાની રહેવાસી છે. ઘટના બાદ સગીરાની માનસિક સ્થિતિ સારી નથી. કહેવાય છે કે 12મી ઓગસ્ટની રાત્રે 12.30 વાગ્યે તે દિલ્હીના ISBTથી ઉત્તરાખંડ રોડવેઝ થઈને દેહરાદૂન પહોંચી હતી. આ દરમિયાન મધ્યરાત્રિએ સગીરા પર બળાત્કારનો મામલો સામે આવ્યો હતો. આ કેસમાં SSPનું કહેવું છે કે મેડિકલ રિપોર્ટની રાહ જોવાઈ રહી છે. બળાત્કારના આરોપમાં છ લોકોની ધરપકડ કરવામાં આવી છે અને તેમની પૂછપરછ કરવામાં આવી રહી છે.

સગીરા 13 ઓગસ્ટના રોજ નશાની હાલતમાં મળી આવી

આ મામલામાં ISBT ખાતે CWCના સુપરવાઈઝર સરોજિનીએ જણાવ્યું હતું કે 13મી ઑગસ્ટના રોજ સવારે 2 થી 2:30 વાગ્યાની વચ્ચે સગીરા ભ્રમિત હાલતમાં મળી આવી હતી. સગીરાની માનસિક સ્થિતિ સારી ન હતી. શરીર પર કોઈ ઈજા કે રક્તસ્ત્રાવ જોવા મળ્યો ન હતો. જોકે, આંતરિક ઈજા છે કે નહીં તે અમે કહી શકતા નથી. અમે છોકરીને કલ્યાણ કેન્દ્રમાં મોકલી છે. પોલીસ આ મામલે તપાસ કરી રહી છે.