દેશમાં સપ્ટેમ્બર મહિનામાં રિટેલ મોંઘવારી દરમાં ઘટાડો જોવા મળ્યો છે. ઓગસ્ટ મહિનામાં તે 6.83 ટકાથી ઘટીને 5.02 ટકા થયો છે. દેશનો છૂટક ફુગાવો સપ્ટેમ્બરમાં વાર્ષિક ધોરણે ઘટીને 5.02 ટકા થયો હતો જે ઓગસ્ટમાં 6.83 ટકા હતો. ખાદ્ય ફુગાવો સપ્ટેમ્બરમાં 6.56 ટકા હતો જે ઓગસ્ટમાં 9.94 ટકા હતો. ગ્રામીણ અને શહેરી વિસ્તારોની વાત કરીએ તો સપ્ટેમ્બર મહિનામાં છૂટક ફુગાવાનો દર અનુક્રમે 5.33 ટકા અને 4.65 ટકા હતો. ત્યારે હવે લોકો મોંઘવારીથી રાહત મળશે તેવી રાહ જોઈને બેઠા છે. ક્યારે મળશે ? કેટલી મળશે ? મળશે કે નહીં ? તેની કોઈને ખબર નથી.
સપ્ટેમ્બરમાં શાકભાજીના ભાવમાં નરમાઈ જોવા મળી
સપ્ટેમ્બર મહિનામાં શાકભાજીનો મોંઘવારી દર ઘટીને 3.39 ટકા થયો હતો જે ઓગસ્ટમાં 26.14 ટકા હતો. સપ્ટેમ્બર મહિનામાં અનાજનો મોંઘવારી દર 10.95 ટકા હતો. સપ્ટેમ્બરમાં ફ્યુઅલ અને પાવર સેગમેન્ટનો ફુગાવો ઘટીને માઈનસ 0.11 ટકા થયો હતો.
RBI ગવર્નરે મોંઘવારીમાં રાહતની આશા વ્યક્ત કરી
અગાઉ, રિઝર્વ બેંક ઓફ ઈન્ડિયા (RBI)ના ગવર્નર શક્તિકાંત દાસે સપ્ટેમ્બરથી મોંઘવારી ઘટવાની આશા વ્યક્ત કરી હતી. રિઝર્વ બેંક દ્વારા સર્વે કરાયેલા અર્થશાસ્ત્રીઓ સહિત પ્રોફેશનલ ફોરકાસ્ટર્સે અનુમાન લગાવ્યું છે કે ગ્રાહક ભાવ સૂચકાંક આધારિત ફુગાવો સપ્ટેમ્બર ક્વાર્ટરમાં 6.6 ટકાથી ઘટીને ડિસેમ્બર ક્વાર્ટરમાં 5.5 ટકા થશે. આ સિવાય માર્ચ 2024ના ક્વાર્ટરમાં તે ઘટીને 5.1 પર આવી જશે. વર્ષ 2024-25ના પ્રથમ અર્ધવાર્ષિક ગાળામાં છૂટક ફુગાવાનો દર 5.2-4.0 ની વચ્ચે રહી શકે છે.
ચાલુ નાણાકીય વર્ષ માટે ફુગાવો 5.4 ટકા રહેવાનો અંદાજ
રિઝર્વ બેન્ક ઓફ ઈન્ડિયાની મોનેટરી પોલિસી કમિટી (MPC) એ તેની ઓક્ટોબરની બેઠકમાં અસમાન ચોમાસાની પેટર્ન અને વૈશ્વિક ક્રૂડ ઓઈલના વધતા ભાવ વચ્ચે ખાદ્યપદાર્થોની કિંમતો અંગે સાવચેતીભર્યું દૃષ્ટિકોણ જાળવીને ચાલુ નાણાકીય વર્ષ માટે ફુગાવાના અનુમાનને ઘટાડીને 5.4 ટકા કર્યો હતો. જાળવણી કરવામાં આવી છે. સેન્ટ્રલ બેંકના બીજા, ત્રીજા અને ચોથા ક્વાર્ટર માટે ફુગાવાનો અંદાજ અનુક્રમે 6.4 ટકા, 5.6 ટકા અને 5.2 ટકા છે.
