મણિપુરમાં મે મહિના પછીથી વંશીય હિંસા અટકવાનું નામ નથી લઈ રહી, આ દરમિયાન મહિલાઓ સાથે સંબંધિત વીડિયો સામે આવ્યા બાદ દેશ પોતાનો ગુસ્સો વ્યક્ત કરી રહ્યો છે. જોકે પીએમ મોદીએ ચોમાસુ સત્ર પહેલા આ ઘટનાની નિંદા કરી હતી, પરંતુ વિપક્ષે મણિપુરને લઈને હંગામો મચાવ્યો હતો, જેના કારણે ચોમાસુ સત્રના પહેલા દિવસે બંને ગૃહોમાં કોઈ કામકાજ થયું ન હતું. વિપક્ષની માંગ છે કે પીએમ મોદી મણિપુર પર સંસદમાં નિવેદન આપે. ઉલ્લેખનીય છે કે, સંસદનું ચોમાસુ સત્ર ગુરુવારથી શરૂ થયું હતું.
વિપક્ષે પીએમ મોદીને સંસદમાં નિવેદન આપવાની માંગ કરી
તાજેતરમાં 26 પક્ષોનું નવું ગઠબંધન INDIA રચાયું છે, ભારત ગઠબંધનના નેતાઓ ગુરુવારે સંસદ સંકુલમાં મલ્લિકાર્જુન ખડગેની ચેમ્બરમાં ચોમાસુ સત્ર માટે વ્યૂહરચના ઘડવા માટે મળ્યા હતા અને તે પછી વિપક્ષે બંને ગૃહોમાં મણિપુર હિંસા પર વડા પ્રધાન નરેન્દ્ર મોદીના નિવેદનની માંગ કરી હતી.
ખડગેએ કહ્યું, હિંસાનાં 80 દિવસ બાદ પણ પીએમ મણિપુર ગયા નથી
મલ્લિકાર્જુન ખડગેએ આ મામલે મુલતવી રાખવાની નોટિસ પણ આપી હતી. તેમણે કહ્યું કે મણિપુરમાં જાતિય હિંસા ફાટી નીકળ્યાને લગભગ 80 દિવસ થઈ ગયા છે પરંતુ વડાપ્રધાન નરેન્દ્ર મોદીએ ન તો રાજ્યની મુલાકાત લીધી છે અને ન તો ત્યાંની સ્થિતિ પર એક શબ્દ બોલ્યો છે. આ સાથે ખડગેએ ટ્વિટર પર એમ પણ કહ્યું કે મણિપુર સળગી રહ્યું છે. મહિલાઓ પર બળાત્કાર થઈ રહ્યો છે, નગ્ન પરેડ થઈ રહી છે અને ભયાનક હિંસા થઈ રહી છે. પરંતુ વડાપ્રધાન આટલા લાંબા સમયથી મૌન હતા.
