એપલ અને એન્ડ્રોઇડ સ્માર્ટફોન પર સાયબર એટેક, સ્પાયવેર દ્વારા ડેટા હેક

સાયબર હુમલાથી આજે કોઈ સુરક્ષિત નથી. હેકર્સે સૌથી સુરક્ષિત ગણાતા એપલ સ્માર્ટફોનમાં પણ તોડફોડ કરી છે. ગૂગલના એક રિપોર્ટ અનુસાર, હેકિંગ ટૂલ્સની મદદથી હેકર્સે એપલ અને એન્ડ્રોઈડ સ્માર્ટફોનમાં હેક કરીને મેસેજ અને કોન્ટેક્ટ મેળવ્યા છે. જે સ્પાયવેરથી હેકિંગ કરવામાં આવ્યું છે. તે ઈટાલિયન કંપની દ્વારા બનાવવામાં આવ્યું છે. આ કંપની દાવો કરે છે કે તેના ગ્રાહકોની યાદીમાં ઘણા યુરોપિયન દેશોની કાયદા અમલીકરણ એજન્સીઓનો સમાવેશ થાય છે.

ગૂગલના રિપોર્ટમાં કહેવામાં આવ્યું છે કે, આ સ્પાયવેરનો ઉપયોગ ઈટાલી અને કઝાકિસ્તાનમાં એપલ અને એન્ડ્રોઈડ સ્માર્ટફોનની જાસૂસી કરવા માટે કરવામાં આવ્યો છે. આ કંપનીએ એવા ટૂલ્સ બનાવ્યા છે, જેનો ઉપયોગ સ્માર્ટફોનમાં હાજર પ્રાઈવેટ મેસેજ અને કોન્ટેક્ટને એક્સેસ કરવા માટે થાય છે. તે જ સમયે, મિલાન સ્થિત આરોપી આરસીએસ લેબનું કહેવું છે કે તે કાયદા અનુસાર કામ કરે છે.

આ સ્પાયવેર એકદમ ખતરનાક છે
ઈટાલિયન કંપની દ્વારા બનાવવામાં આવેલ સ્પાયવેર ખૂબ જ ખતરનાક છે. રિપોર્ટમાં કહેવામાં આવ્યું છે કે, RCS લેબ ખતરનાક હેકિંગ ટૂલ્સ ફેલાવી રહી છે. તે સરકારોના હાથમાં હથિયારો આપી રહી છે. ગૂગલ કહે છે કે સરકારો પોતાની રીતે હેકિંગ ટૂલ્સ વિકસાવી શકતી નથી, પરંતુ RCS લેબ જેવી કંપનીઓ આ ખામીને પૂરી કરે છે. ગૂગલના સંશોધક બિલી લિયોનાર્ડનું કહેવું છે કે ઘણા કિસ્સાઓમાં RCS સ્પાયવેરનો ઉપયોગ કરતા હેકર્સે પણ ઈન્ટરનેટ સર્વિસ પ્રોવાઈડર સાથે તેમના ટાર્ગેટ પર કામ કર્યું છે. આ દર્શાવે છે કે હેકિંગ ગ્રુપની સરકાર સાથે પણ સંબંધ છે.

કંપનીનો દાવો છે, ગુનાઓની તપાસમાં મદદ કરે છે
ન્યૂઝ એજન્સી રોઈટર્સ અનુસાર, RCS લેબનું કહેવું છે કે, તેના ઉત્પાદનો અને સેવાઓ યુરોપીયન નિયમોનું પાલન કરે છે. કંપની કાયદા અમલીકરણ એજન્સીઓને ગુનાઓની તપાસ કરવામાં મદદ કરે છે. કંપનીએ તેના ઉત્પાદનોના દુરુપયોગની નિંદા કરતા કહ્યું છે કે RCS લેબના કર્મચારીઓ સંબંધિત ગ્રાહકો દ્વારા કરવામાં આવતી કોઈપણ પ્રવૃત્તિમાં ભાગ લેતા નથી. RCS લેબ પોતાને કાયદેસર ઇન્ટરસેપ્શન ટેકનોલોજી અને સેવાઓના નિર્માતા તરીકે વર્ણવે છે. કંપની વૉઇસ, ડેટા કલેક્શન અને ટ્રેકિંગ સિસ્ટમ જેવી સેવાઓ પૂરી પાડે છે. કંપની દાવો કરે છે કે તે એકલા યુરોપમાં દરરોજ 10,000 ઇન્ટરસેપ્ટેડ લક્ષ્યોને હેન્ડલ કરે છે.