પતિ ભલે કાળો રહ્યો પરંતુ પત્નીઓ તેને કાળો કહી શકશે નહીં; હાઇકોર્ટેની મહત્વપૂર્ણ ટિપ્પણી
કર્ણાટક હાઇકોર્ટની મહત્વપૂર્ણ ટિપ્પણી: કર્ણાટક હાઈકોર્ટે કહ્યું છે કે જો કોઈ પુરુષની પત્ની તેના કાળા અથવા શ્યામ રંગને કારણે તેનું અપમાન કરે છે, તો તે ક્રૂરતા સમાન છે અને છૂટાછેડા માટેની અપીલ માટે મજબૂત આધાર છે.
હાઈકોર્ટે 44 વર્ષના પુરુષને તેની 41 વર્ષની પત્નીથી છૂટાછેડા આપતા સમયે આ ટિપ્પણી કરી હતી.
કોર્ટે એમ પણ કહ્યું હતું કે રેકોર્ડ પરના પુરાવા એ પણ નિષ્કર્ષ તરફ દોરી જાય છે કે પત્ની તેની કાળી ચામડીના કારણે તેના પતિને અપમાનિત કરતી હતી અને તેના કારણે તે અન્ય કોઈ કારણ વગર તેનાથી અલગ રહેવા લાગી હતી.
હાઈકોર્ટે કહ્યું, “આ પાસાને છુપાવવાના હેતુથી તેણી (પત્ની)એ પતિ પર ગેરકાયદેસર સંબંધ હોવાના ખોટા આરોપો લગાવ્યા. આ હકીકતો સંપૂર્ણ ક્રૂરતાનું કારણ છે.”
આ કપલે વર્ષ 2007માં લગ્ન કર્યા હતા અને બંનેને એક પુત્રી છે. વર્ષ 2012માં પતિએ બેંગ્લોરની ફેમિલી કોર્ટમાં છૂટાછેડા માટે અરજી કરી હતી.
મહિલાએ આરોપ લગાવ્યો હતો કે તેના પતિ અને સાસરિયાઓ દહેજની માંગણી કરતા હતા અને તેને પુત્રી સાથે ઘરની બહાર જવા દેતા ન હતા.
પત્નીએ આરોપ લગાવ્યો હતો કે તેના પતિના અન્ય મહિલા સાથે ગેરકાયદેસર સંબંધ છે અને બંનેને એક બાળક પણ છે. ફેમિલી કોર્ટે 2017માં પતિની છૂટાછેડાની અરજી ફગાવી દીધી હતી, ત્યારપછી તેણે હાઈકોર્ટમાં અરજી કરી હતી.
હાઈકોર્ટે કહ્યું, “પત્નીએ પતિ પાસે પાછા આવવા માટે કોઈ પ્રયાસ કર્યો ન હતો અને રેકોર્ડ પરના પુરાવાઓ સાબિત કરે છે કે મહિલા તેના પતિના કાળા રંગના કારણે લગ્નમાં રસ ધરાવતી ન હતી.”
