દેશનો સૌથી મોટો IPO ખુલાવાની તારીખ આવી ગઈ, જાણો ક્યારે અને શું હશે પ્રાઈઝ બેંડ
મુંબઈ, 8 ઓક્ટોબર : Hyundai Motor Indiaનો IPO આવતા અઠવાડિયે સબસ્ક્રિપ્શન માટે ખુલી શકે છે. એવું જાણવા મળે છે કે Hyundai Motor India IPOની પ્રાઇસ બેન્ડ શેર દીઠ રૂ.1,865 થી રૂ.1,960 વચ્ચે હોઇ શકે છે. રોઇટર્સના સમાચાર અનુસાર, $3 બિલિયનનો IPO 14 ઓક્ટોબરે મોટા સંસ્થાકીય રોકાણકારો માટે સબસ્ક્રિપ્શન માટે ખુલશે. આ IPO રિટેલ અને અન્ય કેટેગરી માટે 15-17 ઓક્ટોબરે ખુલશે.
સૂત્રોએ જણાવ્યું હતું કે અપર પ્રાઇસ બેન્ડ અનુસાર, કંપનીનું મૂલ્ય આશરે $19 બિલિયન હશે અને સ્ટોક લિસ્ટિંગ 22 ઓક્ટોબરે થઈ શકે છે. અહીં, હ્યુન્ડાઇ મોટરે મંગળવારે એક નિયમનકારી ફાઇલિંગમાં જણાવ્યું હતું કે તે Hyundai Motor India IPO માટે તેની પાસેના 142 મિલિયન (14.2 કરોડ) શેર વેચશે. દક્ષિણ કોરિયન ઓટોમેકરે જણાવ્યું હતું કે તે હ્યુન્ડાઇ મોટર ઇન્ડિયામાં હજુ પણ 670 મિલિયન (67 કરોડ) શેર અથવા 82.5% હિસ્સો ધરાવે છે.
લિસ્ટિંગ સાથે હ્યુન્ડાઈ 2003માં મારુતિ સુઝુકી પછી બે દાયકામાં જાહેર ક્ષેત્રે જનાર દેશની પ્રથમ કાર નિર્માતા બની જશે. Hyundai IPOમાં નવા શેર જારી કરશે નહીં. આમાં, તેની દક્ષિણ કોરિયન પેરેન્ટ કંપની તેની સંપૂર્ણ માલિકીની એકમમાંનો 17.5% હિસ્સો રિટેલ અને અન્ય રોકાણકારોને કહેવાતા ઓફર ફોર સેલ દ્વારા વેચશે. મહત્વનું છે કે હ્યુન્ડાઈએ જૂનમાં આઈપીઓની મંજૂરી માટે સેબીમાં અરજી કરી હતી. તેને સેબી તરફથી 24 સપ્ટેમ્બરે IPO લાવવાની મંજૂરી મળી હતી.
IPO દસ્તાવેજો અનુસાર, આ ઇશ્યૂ સંપૂર્ણપણે પ્રમોટર હ્યુન્ડાઇ મોટર કંપની દ્વારા 14,21,94,700 શેરની ઓફર ફોર સેલ (OFS) પર આધારિત છે. આમાં કોઈ નવા શેર જારી કરવામાં આવશે નહીં. સૂત્રોએ અગાઉ જણાવ્યું હતું કે દક્ષિણ કોરિયન ઓટોમોબાઈલ ઉત્પાદક પ્રારંભિક શેર વેચાણ દ્વારા ઓછામાં ઓછા ત્રણ અબજ યુએસ ડોલર (આશરે રૂ. 25,000 કરોડ) એકત્ર કરવાનો પ્રયાસ કરી રહી છે.
ઉલ્લેખનીય છે કે, હ્યુન્ડાઇ મોટર ઇન્ડિયાએ ભારતમાં 1996માં કામગીરી શરૂ કરી હતી અને હાલમાં તે વિવિધ સેગમેન્ટમાં 13 મોડલ વેચે છે. કંપનીના શેર ગ્રે માર્કેટમાં ₹280ના પ્રીમિયમ પર ટ્રેડ થઈ રહ્યા છે. ગ્રે માર્કેટમાં કંપનીના શેરની માંગ સતત ઘટી રહી છે. Investorgain.com મુજબ, 28 સપ્ટેમ્બરે, કંપનીના શેર્સ ગ્રે માર્કેટમાં ₹500ના પ્રીમિયમમાં ઉપલબ્ધ હતા અને આજે 8 ઓક્ટોબરના રોજ, તેઓ ₹280ના પ્રીમિયમે ઉપલબ્ધ છે.
આ પણ વાંચો :- RG કર હોસ્પિટલના 50 સિનિયર ડોકટરોએ જુનિયર્સના વિરોધને સમર્થન આપવા આપ્યાં રાજીનામાં
