રાજસ્થાનમાં આજે મતગણતરી, સત્તાનું પરિવર્તન કે પુનરાવર્તન ?

• રાજસ્થાનમાં આજે વિધાનસભા ચૂંટણીના પરિણામો
• 2013 અને 2018 બાદ આ ચૂંટણીમાં પણ એક બેઠક પર મતદાન ન થઈ શક્યું 
• શું કહે છે એક્ઝિટ પોલ અને સટ્ટા બજાર 

જયપુર, 3 ડિસેમ્બર : રાજસ્થાનની 200 માંથી 199 બેઠકો પર 25 નવેમ્બરે મતદાન થયું હતું. જ્યારે કરણપુર વિધાનસભા બેઠક પરની ચૂંટણી મોકૂફ રાખવામાં આવી હતી. અગાઉ 2018 અને 2013માં પણ એક-એક બેઠક પર ચૂંટણી થઈ ન હતી, અર્થાત રાજ્યમાં આ સળંગ ત્રીજી વિધાનસભા ચૂંટણી હતી જેમાં પૂરી 200 બેઠક પર નહીં પરંતુ 199 બેઠક પર મતદાન થયું હતું. રાજસ્થાનમાં મુખ્ય મુકાબલો ભારતીય જનતા પાર્ટી અને કોંગ્રેસ વચ્ચે છે. જો કે નેશનલ ડેમોક્રેટિક પાર્ટી અને ભારતીય ટ્રાઈબલ પાર્ટી પણ ચૂંટણીમાં મહત્વની ભૂમિકા ભજવી શકે છે. રાજસ્થાન વિધાનસભા ચૂંટણીમાં મુખ્યમંત્રી અશોક ગેહલોત, સચિન પાયલટ, ગોવિંદ સિંહ દોતાસરા, પૂર્વ મુખ્યમંત્રી વસુંધરા રાજે સિંધિયા, સીપી જોશી, રાજેન્દ્ર સિંહ રાઠોડ અને સતીશ પુનિયા મુખ્ય ચહેરા હશે.

એક બેઠક પર ચૂંટણી થઈ ન હતી

14 નવેમ્બરે રાજસ્થાન વિધાનસભા ચૂંટણી 2023માં કોંગ્રેસના ઉમેદવાર ગુરમીત સિંહ કુન્નરનું નિધન થયું હતું. ગુરમીતનું દિલ્હીની AIIMS હોસ્પિટલમાં નિધન થયું હતું. 75 વર્ષીય ગુરમીત સિંહ કુન્નરને 12 નવેમ્બરે દિલ્હી AIIMSમાં દાખલ કરવામાં આવ્યા હતા. મળતી માહિતી મુજબ કોંગ્રેસના નેતા ઘણા સમયથી બીમાર હતા. ગુરમીત શ્રીકરણપુર વિધાનસભા સીટથી કોંગ્રેસના સીટીંગ ધારાસભ્ય અને ઉમેદવાર હતા. ચૂંટણી પહેલા ઉમેદવારનું અવસાન થતાં આ બેઠક માટેની ચૂંટણી મોકૂફ રાખવામાં આવી હતી. હવે ચૂંટણી પંચ આ બેઠક પર પેટાચૂંટણી કરાવશે, જેના માટે સત્તાવાર જાહેરાત થવાની બાકી છે.

એક્ઝિટ પોલ શું કહે છે?

રાજસ્થાનમાં ઈન્ડિયા ટુડે-એક્સિસ માય ઈન્ડિયાએ કોંગ્રેસને 86-106 બેઠકો , ભાજપને 80-100 બેઠકો અને અન્ય માટે 9-18 બેઠકોની આગાહી કરે છે. દૈનિક ભાસ્કરે ભાજપને 98-105 અને કોંગ્રેસને 85-95 બેઠકો, જ્યારે જન કી બાતના સર્વેક્ષણકર્તાઓએ ભાજપને 100-122 બેઠકો અને કોંગ્રેસને 62-85 બેઠકોની આગાહી કરી છે. રિપબ્લિક-મેટ્રિક્સ સર્વે અનુસાર રાજસ્થાનમાં કોંગ્રેસને 65-75 બેઠકો મળવાની આશા છે. ભાજપને 115-130 અને અન્યને 12-19 બેઠકો મળવાની ધારણા છે. ટુડેજ ચાણક્યએ કોંગ્રેસને 89-113, ભાજપને 77-101 તેમજ અન્યને 2-6 બેઠકો મળવાની આગાહી કરી છે.

જાણો શું કહે છે સટ્ટા બજાર ?

રાજસ્થાનનું સૌથી મોટું સટ્ટા બજાર ફલોદી પણ રાજ્યમાં ભાજપની મોટી જીતની આગાહી કરી રહ્યું છે. સટોડિયાઓએ કહ્યું છે કે, સટ્ટાબાજીના વલણો જમીની વાસ્તવિકતાને પ્રતિબિંબિત કરતા નથી, પરંતુ હાલમાં ભાજપ મનપસંદ છે. બુકીઓના મતે ભાજપ રાજસ્થાનમાં 115થી વધુ સીટો જીતી શકે છે. જ્યારે કોંગ્રેસને મહત્તમ 70 બેઠકો મળવાની ધારણા છે. ફલોદી સટ્ટા માર્કેટના એક બ્રોકરના જણાવ્યા અનુસાર, રાજ્યમાં કોની સરકાર બનશે તે અંગે બજારનો ટ્રેન્ડ સતત બદલાઈ રહ્યો છે. કહેવામાં આવી રહ્યું છે કે હાલમાં માર્કેટમાં 55/45નો ભાવ ચાલી રહ્યો છે. કોંગ્રેસનો ભાવ 45 રૂપિયા અને ભાજપનો 55 રૂપિયા છે. રાજસ્થાન અંગે સટોડિયાઓનું કહેવું છે કે રાજસ્થાનમાં ભાજપની સરકાર આવવાની સંભાવના છે. બજારના મતે વસુંધરા રાજે મુખ્યમંત્રી બને તેવી શક્યતા છે.

ફલોદી રાજસ્થાનનો એક જિલ્લો છે, જ્યાં દેશભરમાં યોજાનારી ચૂંટણી પર સટ્ટો રમાય છે. ફલોદીમાં વરસાદ, ચૂંટણી અને ક્રિકેટ જેવા વિષયો પર સટ્ટાબાજી કરવામાં આવે છે. એવું કહેવાય છે કે અહીંનું મૂલ્યાંકન એકદમ સાચું છે. આ કારણોસર, ફલોદીનું સટ્ટા બજાર હંમેશા દેશ અને દુનિયામાં હેડલાઇન્સમાં રહે છે. ફલોદી સટ્ટાબજારમાં આ વખતે જૂની પરંપરાની તર્જ પર રાજસ્થાનમાં ફરી એકવાર ભાજપની સરકાર બનશે તેવું કહેવામાં આવી રહ્યું છે. ફલોદી સટ્ટા બજારના અનુમાન મુજબ રાજસ્થાનમાં ભાજપને 120થી 122 અને કોંગ્રેસને 65થી 70 બેઠકો મળવાની સંભાવના છે. સટ્ટાબજારમાંથી બહાર આવી રહેલા આ સમાચારે કોંગ્રેસ સરકારની ચિંતા વધારી દીધી છે. મુખ્યમંત્રી અશોક ગેહલોતે દાવો કર્યો હતો કે રાજ્યમાં તેમની સરકારનું પુનરાવર્તન થશે, પરંતુ સટ્ટાબજારના મતે રાજસ્થાનમાં પણ આ જ ટ્રેન્ડ ચાલુ રહેવાની શક્યતા છે. કોંગ્રેસના ઘણા અગ્રણી નેતાઓમાં દિવ્યા મદેરણા, માનવેન્દ્ર સિંહ, હરીશ ચૌધરી, સોનારામ ચૌધરી, અમીન ખાન અને મેવારામ જૈન સંઘર્ષની સ્થિતિમાં છે અને પોખરણના ધારાસભ્ય અને મંત્રી સાલેહ મોહમ્મદની સ્થિતિ ઘણી નબળી હોવાનું કહેવાય છે. જ્યારે બાડમેરના શિવમાં ભાજપના બળવાખોર અને અપક્ષ ઉમેદવાર રવિન્દ્ર સિંહ ભાટીની સ્થિતિ ઘણી મજબૂત હોવાનું કહેવાય છે.

2023 વિધાનસભાની ચૂંટણીમાં ભાજપ અને કોંગ્રેસનો ચૂંટણી ઢંઢેરો

16 નવેમ્બરના રોજ ભાજપે રાજસ્થાન ચૂંટણી માટે પોતાનો ઢંઢેરો જાહેર કર્યો હતો. જેમાં ભારતીય જનતા પાર્ટીના સંકલ્પ પત્રના નામે બહાર પાડવામાં આવેલા ઢંઢેરામાં મહિલાઓ, યુવાનો અને ખેડૂતોને અનેક વચનો આપવામાં આવ્યા છે. રાષ્ટ્રીય અધ્યક્ષ જેપી નડ્ડા, કેન્દ્રીય મંત્રી અર્જુન રામ મેઘવાળ, ગજેન્દ્ર સિંહ શેખાવત, રાજસ્થાન ભાજપના પ્રદેશ અધ્યક્ષ સીપી જોશી અને પૂર્વ સીએમ વસુંધરા રાજે સિંધિયાની ઉપસ્થિતિમાં રાજસ્થાનની રાજધાની જયપુરમાં બીજેપી મીડિયા સેન્ટરમાંથી રાજસ્થાન વિધાનસભા ચૂંટણી 2023 માટેનુ સંકલ્પ પત્ર જાહેર કરવામાં આવ્યુ હતું.

ભાજપનું વિધાનસભા ચૂંટણી સંકલ્પ પત્ર 2023

• PM કિસાન સન્માન નિધિની રકમ વધારીને 12000 રૂપિયા પ્રતિ વર્ષ કરવામાં આવશે.
• લાડો પ્રોત્સાહક યોજના હેઠળ, છોકરીના જન્મ પર 2 લાખ રૂપિયાના બચત બૉન્ડ દ્વારા નાણાકીય સહાય આપવામાં આવશે.
• મફત સ્કૂટી યોજના હેઠળ મુખ્યમંત્રી 12મું પાસ થયેલી હોંશિયાર વિદ્યાર્થિનીઓને સ્કૂટી આપશે.
• PM ઉજ્જવલા યોજના હેઠળ તમામ ગરીબ પરિવારોની મહિલાઓને 450 રૂપિયામાં સિલિન્ડર આપશે.
• આઈઆઈટીની જેમ રાજસ્થાન ઈન્સ્ટીટ્યુટ ઑફ ટેકનોલૉજી અને એઈમ્સની જેમ રાજસ્થાન ઈન્સ્ટીટ્યુટ ઑફ મેડિકલ સાયન્સની સ્થાપના કરવામાં આવશે.
• આગામી પાંચ વર્ષમાં રાજસ્થાનના યુવાનોને 2.5 લાખ સરકારી નોકરીઓ આપશે.
• રાજસ્થાનમાં 15 હજાર ડોક્ટરો અને 20 હજાર પેરા મેડિકલ સ્ટાફની નવી નિમણૂક કરવામાં આવશે.
• માનગઢ ધામને રાજસ્થાનમાં એક ભવ્ય આદિવાસી સ્થળ તરીકે વિકસાવવામાં આવશે.
• કોંગ્રેસના શાસન દરમિયાન ખેડૂતોની હરાજી કરાયેલી જમીન માટે અમે ખેડૂતોને યોગ્ય વળતર આપવા માટે વળતરની નીતિ લાવશું.
• દરેક જિલ્લામાં મહિલા પોલીસ સ્ટેશન અને દરેક પોલીસ સ્ટેશનમાં મહિલા ડેસ્ક અને તમામ મોટા શહેરોમાં એન્ટિ રોમિયો સ્ક્વોડની રચના કરવામાં આવશે.
• લઘુત્તમ ટેકાના ભાવ પર બોનસ આપીને 2700 રૂપિયા પ્રતિ ક્વિન્ટલના ભાવે ઘઉંની ખરીદી કરશે.
• રાજસ્થાનના ગરીબ પરિવારોની તમામ વિદ્યાર્થિનીઓને KG થી PG સુધી મફત ગુણવત્તાયુક્ત શિક્ષણ પ્રદાન કરશે.
• લખપતિ દીદી યોજના હેઠળ 6 લાખથી વધુ ગ્રામીણ મહિલાઓને કૌશલ્યની તાલીમ આપવામાં આવશે.
• દરેક બેઘર વ્યક્તિને ઘર આપવા માટે પીએમ આવાસ યોજનાની સાથે સીએમ આવાસ યોજના પણ શરૂ કરવામાં આવશે.
• આર્થિક રીતે નબળા પરિવારોના વિદ્યાર્થીઓને ગણવેશ વગેરે માટે રૂ. 1200ની વાર્ષિક સહાય આપશે.
• 40 હજાર કરોડના રોકાણ સાથે ભામાશાહ હેલ્થ ઈન્ફ્રાસ્ટ્રક્ચર મિશન શરૂ કરશે.
• પેપર લીક, ખાતર, મિડ-ડે મીલ, ખાણકામ, પીએમ હાઉસિંગ, જન જીવન મિશન વગેરે જેવા કૌભાંડોની તપાસ માટે SITની રચના કરવામાં આવશે.
• શેખાવતી, ધુંધાર, બ્રજ, હડોટી, મેવાડ, મારવાડ, અજમેર અને બિકાનેરમાં રૂ. 800 કરોડના રોકાણ સાથે પ્રાદેશિક હેરિટેજ કેન્દ્રોની સ્થાપના કરવામાં આવશે.
• ટુરિઝમ સ્કીલ ફંડ બનાવીને અમે 5 લાખ યુવાનોને તાલીમ આપીશું અને રોજગાર અને સ્વરોજગારની તકો પૂરી પાડીશું.
• પ્રધાનમંત્રી ગરીબ કલ્યાણ યોજનાના લાભાર્થીઓને પાંચ વર્ષ સુધી મફત રાશન આપશે.

રાજસ્થાનમાં કૉંગ્રેસનો ચૂંટણી ઢંઢેરો

રાજસ્થાન વિધાનસભા ચૂંટણી 2023 અંતર્ગત ભાજપ બાદ સત્તા પક્ષ કૉંગ્રેસે ચૂંટણી ઢંઢેરો જાહેર કર્યો હતો. જેમાં યુવાનો અને ખેડૂતો માટે વચનો પણ આપવામાં આવ્યા છે. પીસીસી કાર્યાલયમાં ચૂંટણી ઢંઢેરા સમિતિના ચેરમેન સી.પી. જોશીએ આ ઢંઢેરો જાહેર કર્યો હતો. આ દરમિયાન અનેક કૉંગ્રેસી દિગ્ગજ નેતા હાજર રહ્યા હતા. જેમાં કૉંગ્રેસના રાષ્ટ્રીય અધ્યક્ષ મલ્લિકાર્જુન ખડગે, મુખ્ય પ્રધાન અશોક ગેહલોત, વિધાનસભા અધ્યક્ષ સી.પી. જોશી, સચિન પાયલોટ, જયરામ રમેશનો સમાવેશ થાય છે. સીપી જોશીએ કહ્યું હતું કે, જો રાજસ્થાનમાં ફરીથી કોંગ્રેસની સરકાર બનશે તો ખેડૂતોને 2% વ્યાજ પર લોન આપવામાં આવશે. 50 લાખ સુધીનો સ્વાસ્થ્ય વીમો હશે. કોંગ્રેસે વચન આપ્યું હતું કે પંચાયત કક્ષાએ ભરતી થશે. ગાયનું છાણ પણ બે રૂપિયા પ્રતિ કિલોના ભાવે ખરીદવામાં આવશે.

આ છે કોંગ્રેસના મોટાં વચનો

• જાતિની વસ્તીગણતરી થશે
• આરોગ્ય વીમો 25 લાખથી વધારીને 50 લાખ રૂપિયા કરાશે
• ગાયનું છાણ 2 રૂપિયા પ્રતિ કિલોના ભાવે ખરીદાશે
• વગર વેપારીઓને 5 લાખની લોન અપાશે વ્યાજ
• ખોદકામ કરતા કામદારોને પણ વ્યાજમુક્ત લોનની સુવિધા અપાશે
• મનરેગામાં રોજગારીની મુદત 150 દિવસની રહેશે
• 500 રૂપિયાને બદલે 400 રૂપિયામાં ગેસ સિલિન્ડર મળશે
• 10 લાખ નવી નોકરીઓનું સર્જન થશે
• પંચાયત કક્ષાએ ભરતી થશે
• કોલેજમાં અભ્યાસ કરતા વિદ્યાર્થીઓને મફતમાં લેપટોપ અપાશે
• પંચાયત સમિતિ કક્ષાએ નવી સેવા કેડર બનાવવામાં આવશે
• ખેડૂતોને 2% વ્યાજે લોન આપવાનું વચન
• મહિલા પ્રમુખને વાર્ષિક 10 હજાર રૂપિયા આપશે

2018 વિધાનસભા ચૂંટણીમાં કોંગ્રેસની જીત થઈ હતી

2018માં રાજસ્થાનમાં 7 ડિસેમ્બરના રોજ 200માંથી 199 બેઠકો પર વિધાનસભાની ચૂંટણી યોજાઈ હતી. 2018માં પણ એક ઉમેદવારના અવસાનના કારણે એક બેઠક ઉપર મતદાન કરવામાં આવ્યું ન હતું. આ ચૂંટણીમાં કોંગ્રેસ રાજ્યની સૌથી મોટી પાર્ટી બનીને ઉભરી હતી. કોંગ્રેસને 199માંથી 99 બેઠકો ઉપર જીત મળી હતી અને માયાવતીના બીએસપી પક્ષના ધારાસભ્યોનો ટેકો લીધો હતો. તે સમયના સત્તાધારી પક્ષ ભાજપને હારનો સામનો કરવો પડ્યો હતો.

વિવિધ પક્ષોને મળેલી બેઠકો અને મતની ટકાવારી

રાજસ્થાનમાં 2018ની વિધાનસભા ચૂંટણીમાં 72.70 ટકા મતદાન થયું હતું. જેમાં કોંગ્રેસને 39.3 ટકા અને ભાજપને 38.77 ટકા મત મળ્યા હતા. જ્યારે બહુજન સમાજ પાર્ટીને 4.03 ટકા, રાષ્ટ્રીય લોકતાંત્રિક પાર્ટીને 2.40 ટકા, ભારતીય કોમ્યુનિસ્ટ પાર્ટીને 1.22 ટકા, ભારતીય ટ્રાઈબલ પાર્ટીને 0.72 ટકા, રાષ્ટ્રીય લોકદળને 0.33 ટકા, અપક્ષને 9.47 ટકા અને નોટામાં કુલ 1.31 ટકા મત મળ્યા હતા.

કોંગ્રેસને 199માંથી 99 બેઠકો ઉપર જીત મળી હતી. ભાજપને કુલ 73 બેઠકો મળી હતી. તે ઉપરાંત સીપીઆઈએમને 2, ભારતીય ટ્રાઈબલ પાર્ટીએ 2, રાષ્ટ્રીય લોકદળને 1 અને રાષ્ટ્રીય લોકતાંત્રિક પાર્ટીએ 1 બેઠક ઉપર જીત મેળવી હતી. અપક્ષ ઉમેદવારોએ 13 બેઠકો ઉપર જીત મેળવી હતી.

આ પણ વાંચો, ઉદ્યોગ મંત્રીએ મલેશિયાને ગ્લોબલ સમિટિમાં ભાગ લેવા આમંત્રણ આપ્યું