ચીન બાદ જાપાનમાં કોરોનાનો રાફડો ફાટ્યો, જાણો શું છે ત્યાની સ્થિતિ

ચીનમાં કોરોનાના કારણે બગડેલી સ્થિતિએ સમગ્ર વિશ્વને ચિંતામાં મૂકી દીધું છે. કોરોનાના નવા વેરિઅન્ટ BF.7એ ચીનમાં ધૂમ મચાવી છે. વિશ્વના ઘણા દેશોમાં આ પ્રકારનો ખતરો વધવા લાગ્યો છે. આ વેરિઅન્ટે ચીન સિવાય 91 દેશોમાં પોતાનો પગ પેસરો કર્યો છે. ચીન સિવાય જાપાન અને દક્ષિણ કોરિયામાં પણ સ્થિતિ વણસી છે.

ચીનની સાથે સાથે અમેરિકા, જાપાન, દક્ષિણ કોરિયા જેવા દેશોમાં પણ કોરોનાના કેસ અચાનક વધવા લાગ્યા છે. અહેવાલ અનુસાર, ચીન પછી જાપાનમાં સૌથી વધુ કોરોના કેસ નોંધાયા છે. છેલ્લા 24 કલાકમાં 1 લાખ 73 હજાર નવા કેસ સામે આવ્યા છે. છેલ્લા 24 કલાકમાં દક્ષિણ કોરિયામાં 68 હજાર નવા કોરોના દર્દીઓ અને ફ્રાન્સમાં 43 હજાર 766 નવા દર્દીઓ મળી આવ્યા છે.

જાપાનમાં પણ કોરોનાએ ઝડપ પકડી

ચીન સિવાય જાપાનમાં પણ કોરોના મહામારીએ જોર પકડ્યું છે. આરોગ્ય અધિકારીઓના જણાવ્યા અનુસાર, 25 ઓગસ્ટથી દરરોજ લાખો નવા દર્દીઓ સામે આવી રહ્યા છે. અહેવાલ અનુસાર, છેલ્લા 24 કલાકમાં 1 લાખ 73 હજાર નવા કેસ જોવા મળ્યા છે જ્યારે 315 લોકોએ જીવ ગુમાવ્યો છે.

આ પણ વાંચો : Video : તો શું ચીનની સ્થિતિ સંપૂર્ણ સામાન્ય છે ? વાયરલ વીડિયોથી ઉઠ્યા સવાલ

દક્ષિણ કોરિયામાં કોરોનાનો કહેર

દક્ષિણ કોરિયામાં પણ કોરોનાના રેકોર્ડ કેસ નોંધાઈ રહ્યા છે. અહેવાલ અનુસાર, વધતી ઠંડી વચ્ચે દક્ષિણ કોરિયામાં શનિવારે 58 હજારથી વધુ નવા કેસ નોંધાયા છે. કોરિયા ન્યૂઝ એજન્સીએ જણાવ્યું છે કે, છેલ્લા કેટલાક અઠવાડિયાથી દેશમાં ચેપ સતત વધી રહ્યો છે. ફરીથી ચેપગ્રસ્ત લોકોની સંખ્યા પણ ઘણી વધારે છે. કોરોના વર્લ્ડમીટર અનુસાર દેશમાં સક્રિય કેસની સંખ્યા 11 લાખ 75 હજારથી વધુ છે.

અમેરિકા સહિત અન્ય ઘણા દેશો પ્રભાવિત થયા 

અમેરિકામાં પણ કોરોના સંક્રમણના કેસમાં તેજી જોવા મળી રહી છે. વર્લ્ડોમીટર્સના ડેટા અનુસાર, અમેરિકામાં એક્ટિવ કેસની સંખ્યા 19 લાખ 21 હજારથી વધુ છે. અમેરિકામાં કોરોનાને કારણે અત્યાર સુધીમાં 11 લાખથી વધુ લોકોના મોત થયા છે. અત્યારે ફ્રાન્સમાં કોરોનાના સક્રિય કેસની સંખ્યા 10 લાખ 91 હજારથી વધુ છે. તે જ સમયે, અહીં 1 લાખ 61 હજારથી વધુ લોકોએ જીવ ગુમાવ્યો છે. યુકેની હોસ્પિટલોમાં પણ કોરોના સંક્રમિત દર્દીઓની ભીડ વધી છે. 12 ડિસેમ્બરથી હોસ્પિટલમાં કોરોના દર્દીઓની સંખ્યામાં ભારે વધારો થયો છે. અહીં કોરોનાથી અત્યાર સુધીમાં 1 લાખ 98 હજાર લોકોના મોત થયા છે.