પાકિસ્તાનના રક્ષા મંત્રીની કબૂલાત, કહ્યું- દેશનું દેવાળીયું ફુંકાઈ ગયું, આતંકવાદ આપણી નિયતિ

પાકિસ્તાનના સંરક્ષણ પ્રધાન ખ્વાજા આસિફે કહ્યું છે કે પાકિસ્તાન નાદાર થઈ ગયું છે અને આતંકવાદ આપણું ભાગ્ય બની ગયું છે. આતંકવાદની શરૂઆત પાકિસ્તાનના નેતાઓએ કરી હતી. અમે પોતે આતંકવાદ લાવ્યા. રક્ષા મંત્રી ખ્વાજા આસિફે શનિવારે કહ્યું કે પાકિસ્તાન પહેલાથી જ ભૂલો કરી ચુક્યું છે અને અમે નાદાર દેશમાં જીવી રહ્યા છીએ. સિયાલકોટમાં એક કાર્યક્રમને સંબોધતા રક્ષા મંત્રીએ અનેક મુદ્દા ઉઠાવ્યા અને કહ્યું કે નોકરશાહો અને રાજનેતાઓએ મોટી ભૂલો કરી છે.

ખ્વાજા આસિફે કહ્યું કે પાકિસ્તાનની સમસ્યાઓનો ઉકેલ આંતરિક રીતે શોધી શકાય છે કારણ કે આંતરરાષ્ટ્રીય મુદ્રા કોષ (IMF) આ બાબતે મદદ કરી શકે તેમ નથી. મંત્રીએ દેશની વર્તમાન સ્થિતિ માટે તંત્ર, નોકરશાહી અને રાજકારણીઓને જવાબદાર ગણાવ્યા અને કહ્યું કે પાકિસ્તાનના બંધારણની વારંવાર અવગણના કરવામાં આવી રહી છે. પીએમએલ-એન નેતાએ કહ્યું કે દોઢ વર્ષ પહેલા આતંકવાદીઓને દેશમાં સ્થાયી થવા દેવામાં આવ્યા હતા અને ખતરનાક રમતો રમાઈ હતી. ટીકાકારોને દેશ છોડવાની ફરજ પડી હતી.

આતંકવાદ સામે સમગ્ર દેશને એક થવાની જરૂર છે

જો કે, તેમણે કરાચી પોલીસ ઓફિસ પર આતંકવાદી હુમલાને નિષ્ફળ બનાવવા માટે સુરક્ષા દળોની પ્રશંસા કરી અને કહ્યું કે સુરક્ષાકર્મીઓએ આખી રાત બહાદુરીપૂર્વક આતંકવાદીઓનો સામનો કર્યો. મંત્રી આસિફે કહ્યું કે આતંકવાદ કોઈ ધર્મ કે સંપ્રદાય વચ્ચે ભેદ રાખતો નથી. ધર્મના નામે આતંકવાદનો ઉપયોગ અમૂલ્ય જીવ લેવા માટે થાય છે. મંત્રીએ કહ્યું કે આતંકવાદ સામે સમગ્ર દેશને એક થવાની જરૂર છે અને તો જ તેની સામે લડાઈ લડી શકાશે. અમે હજુ પણ તેના પ્રત્યે સજાગ નથી. તેની ખરાબ અસર સતત સામે આવી રહી છે.

આ પણ વાંચો : IND vs AUS: રોમાંચક બની દિલ્હી ટેસ્ટ, બીજા દિવસના અંતે ઓસ્ટ્રેલિયાને 62 રનની લીડ