કોમર્શિયલ ગેસ સિલિન્ડરના ભાવમાં 101 રૂપિયાનો વધારો

• 19 કિલોના કોમર્શિયલ એલપીજી સિલિન્ડરની કિંમતમાં 101.50 રૂપિયાનો વધારો
• ઘરેલુ એલપીજી સિલિન્ડરની કિંમતમાં કોઈ ફેરફાર કરવામાં આવ્યો નથી
• ઓઈલ માર્કેટિંગ કંપનીઓએ એર ફ્યુઅલના ભાવમાં ઘટાડો કર્યો

નવેમ્બરના પહેલા દિવસે મોંઘવારીનો મોટો આંચકો લાગ્યો છે. ઓઈલ માર્કેટિંગ કંપનીઓએ 19 કિલોના કોમર્શિયલ એલપીજી સિલિન્ડરના ભાવમાં વધારો કર્યો છે. કોમર્શિયલ ગેસ સિલિન્ડરની કિંમતમાં 101.50 રૂપિયાનો વધારો થયો છે. નવા દરો બુધવાર એટલે કે 1 નવેમ્બર 2023થી અમલમાં આવ્યા છે. આ વધારા બાદ રાજધાની દિલ્હીમાં 19 કિલોના એલપીજી સિલિન્ડરની કિંમત 1833 રૂપિયા થઈ ગઈ છે. આ પહેલા 1 ઓક્ટોબરે પણ કોમર્શિયલ ગેસ સિલિન્ડરના દરમાં 209 રૂપિયાનો વધારો થયો હતો.

ઘરેલુ એલપીજી સિલિન્ડરની કિંમતમાં કોઈ ફેરફાર કરવામાં આવ્યો નથી

ઓઈલ માર્કેટિંગ કંપનીઓએ 19 કિલોના કોમર્શિયલ એલપીજી સિલિન્ડરની કિંમતમાં વધારો કર્યો છે પરંતુ ઘરેલુ એલપીજી સિલિન્ડરની કિંમતમાં કોઈ ફેરફાર કરવામાં આવ્યો નથી. રાષ્ટ્રીય રાજધાની દિલ્હીમાં ઘરેલુ એલપીજી સિલિન્ડરની કિંમત 903 રૂપિયા છે જ્યારે કોલકાતામાં 14 કિલોનો સિલિન્ડર 929 રૂપિયામાં વેચાઈ રહ્યો છે. મુંબઈમાં એલપીજીની કિંમત 902.5 રૂપિયા છે જ્યારે ચેન્નાઈમાં ઘરેલું ગેસ સિલિન્ડર 918.5 રૂપિયામાં વેચાઈ રહ્યો છે.

મોટા શહેરોમાં કોમર્શિયલ ગેસ સિલિન્ડરની કિંમત

આ વધારા બાદ દિલ્હીમાં કોમર્શિયલ ગેસ સિલિન્ડરની કિંમત 1833 રૂપિયા થઈ ગઈ છે. કોલકાતામાં 19 કિલોના ગેસ સિલિન્ડરની કિંમત 1943 રૂપિયા થઈ ગઈ છે. કોમર્શિયલ ગેસ સિલિન્ડર મુંબઈમાં 1785.50 રૂપિયા અને ચેન્નાઈમાં 1999.50 રૂપિયામાં મળશે.

પેટ્રોલ અને ડીઝલના ભાવમાં કોઈ ફેરફાર નથી

આ સાથે ઓઈલ માર્કેટિંગ કંપનીઓએ પેટ્રોલ અને ડીઝલના ભાવમાં કોઈ ફેરફાર કર્યો નથી. દિલ્હીમાં પેટ્રોલ 96.72 રૂપિયા પ્રતિ લિટર વેચાઈ રહ્યું છે, જ્યારે ડીઝલની કિંમત 89.62 રૂપિયા પ્રતિ લિટર છે. મુંબઈમાં પેટ્રોલની કિંમત 106.31 રૂપિયા પ્રતિ લીટર અને ડીઝલની કિંમત 94.27 રૂપિયા પ્રતિ લીટર છે. ચેન્નાઈમાં પેટ્રોલની કિંમત 102.63 રૂપિયા પ્રતિ લીટર અને ડીઝલની કિંમત 94.24 રૂપિયા પ્રતિ લીટર છે. કોલકાતામાં, પેટ્રોલ 106.03 રૂપિયા પ્રતિ લિટર અને ડીઝલની કિંમત 92.76 રૂપિયા પ્રતિ લિટરના દરે વેચાઈ રહ્યું છે. એક વર્ષથી વધુ સમયથી પેટ્રોલ અને ડીઝલના ભાવમાં કોઈ ફેરફાર થયો નથી. પેટ્રોલ અને ડીઝલના ભાવમાં છેલ્લો ફેરફાર 21 મે 2022ના રોજ થયો હતો.

એર ફ્યુઅલની કિંમતમાં ઘટાડો

ઓઈલ માર્કેટિંગ કંપનીઓએ એર ફ્યુઅલના ભાવમાં ઘટાડો કર્યો છે. સતત ત્રણ વધારા બાદ એર ફ્યુઅલના ભાવમાં વધારા પર બ્રેક લાગી છે. એવિએશન ટર્બાઇન ફ્યુઅલ એટલે કે ATFની કિંમતમાં રૂપિયા 1074/KLનો ઘટાડો થયો છે. નવા ભાવ આજથી અમલમાં આવી ગયા છે. આ ઘટાડા બાદ લોકોને મોટી રાહત મળી શકે છે અને એરલાઈન્સ હવાઈ મુસાફરી સસ્તી કરી શકે છે.

આ પણ વાંચો, મરાઠા આંદોલન વચ્ચે કાલે CM શિંદેએ બોલાવી સર્વપક્ષીય બેઠક