દેશમાં ઠંડીનો પ્રકોપ યથાવત, જીવલેણ ઠંડીથી ત્રણના મોત

• ગુજરાતમાં હાલ પવન સાથે કાતિલ ઠંડીનો ચમકારો
• કચ્છના નલિયામાં 8.1 ડિગ્રી તાપમાન નોંધાયું
• અમદાવાદમાં 12.1,ગાંધીનગરમાં 10.5 ડિગ્રી
• આગામી 5 દિવસ ઠંડીમાં રાહત નહીં

દેશના મેદાની વિસ્તારોમાં પશ્ચિમી પવનોના કારણે શિયાળા (Winter)નો કહેર યથાવત જોવા મળી રહ્યો છે. બિહાર, ઉત્તર પ્રદેશ, રાજસ્થાન, હરિયાણા, પંજાબ અને દિલ્હી એનસીઆર શીતલહેરની ઝપેટમાં છે. જ્યારે ગુજરાત પણ ઠંડા પવનના કારણે ઠંડુગાર બની ગયું છે અને તાપમાનમાં સતત ઘટાડો થતાં લોકો કાતિલ ઠંડીથી ધ્રુજી ઉઠ્યા છે.

આગામી 5 દિવસ હજુ પણ નહી મળે ઠંડીમાં રાહત

હવામાન વિભાગની આગાહી મુજબ આગામી પાંચ દિવસ ઠંડીનું જોર યથાવત રહેશએ. IMDએ પણ રેડ એલર્ટ જાહેર કર્યું છે. મૌસમ વિભાગે ઉત્તર પ્રદેશ વિશે કહ્યું છે કે અહીં શિયાળો ચાલુ રહેશે. આગામી પાંચ દિવસ સુધી રાજ્યમાં કેટલાક સ્થળોએ ગાઢ ધુમ્મસ છવાયેલ રહેવાની અપેક્ષા છે. દિવસમાં તડકો નહીં પડે, કડકડતી ઠંડીના કારણે દિવસ દરમિયાન કડકડતી ઠંડી યથાવત રહેશે. પશ્ચિમ યુપીમાં દિવસ દરમિયાન ઠંડીની અસર વધુ જોવા મળશે. તમને જણાવી દઈએ કે મંગળવારે રાત્રે ફતેહપુરમાં 3.2 ડિગ્રી સાથે સૌથી ઓછું તાપમાન નોંધાયું હતું.

ગુજરાત બન્યું ઠંડુગાર

ગુજરાતમાં પણ ઠંડા પવન સાથે કાતિલ ઠંડીનો ચમકારો જોવા મળી રહ્યો છે. ગુજરાતના 13 શહેરોમાં તાપમાન 13 ડિગ્રીથી પણ નીચે છે. કચ્છના નલિયામાં 8.1 ડિગ્રી તાપમાન નોંધાયું છે. રાજ્યભરમાં ઠંડા પવનોના સુસવાટા વચ્ચે તાપમાનનો પારો ગગડ્યો છે અને લોકોને દિવસે પણ લોકોને ગરમ વસ્ત્રો પહેરવા પડી રહ્યા છે.

આ પણ વાંચો : સ્ટેચ્યુ ઓફ યુનિટી ખાતે 10મો આંતરરાષ્ટ્રીય પતંગ મહોત્સવ યોજાશે

જ્યારે અમદાવાદમાં 12.1 ડિગ્રી, ગાંધીનગરમાં 10.5 ડિગ્રી, વડોદરામાં 11.6 ડિગ્રી, રાજકોટમાં 12.5 ડિગ્રી તાપમાન નોંધાયું છે જ્યારે ચરોતરમાં સિઝનમાં પ્રથમ વખત પારો 9.8 ડિગ્રીએ પહોંચ્યો છે. વલ્લભવિદ્યાનગરમાં 9.4 ડિગ્રી, ભુજમાં 11.2 ડિગ્રી તાપમાન નોંધાયું છે.

કાશ્મીર-રાજસ્થાનમાં માઇનસ ડિગ્રી તાપમાન

બીજી તરફ કાશ્મીર ખીણની વાત કરીએ તો, સતત ત્રીજી રાત્રે તાપમાનનો પારો ફ્રીઝિંગ પોઈન્ટથી નીચે નોંધાયો હતો, જ્યારે રાજસ્થાનના ફતેહપુર સીકરમાં પણ પારો શૂન્યથી નીચે ગયો હતો. પંજાબ અને હરિયાણામાં પણ બુધવારે સવારે કડકડતી ઠંડી અનુભાઈ હતી. શૂન્યથી નીચે તાપમાને કાશ્મીર ખીણમાં અનેક જળાશયો થીજી ગયા છે. રાજસ્થાનના ઘણા વિસ્તારોમાં ગાઢ ધુમ્મસ સાથે બુધવારે પણ તીવ્ર શિયાળો વર્તાય રહ્યો હતો. હવામાન વિભાગના જણાવ્યા અનુસાર, ફતેહપુર સીકરમાં ગઈકાલે રાત્રે લઘુત્તમ તાપમાન માઈનસ 0.7 ડિગ્રી નોંધાયું હતું, જ્યારે ચુરુમાં માઈનસ 0.5 ડિગ્રી નોંધાયું હતું. બુધવારે સવારે બિકાનેર, જયપુર, ભરતપુર અને કોટા વિભાગના કેટલાક ભાગોમાં ગાઢ ધુમ્મસ છવાયું હતું. હવામાન વિભાગે ઘણા જિલ્લાઓમાં કોલ્ડવેવનો પ્રકોપ જારી રહેવાની સંભાવનાને ધ્યાનમાં રાખીને ‘ઓરેન્જ એલર્ટ’ જાહેર કર્યું છે.

ઝારખંડમાં જીવલેણ ઠંડી, ત્રણના મોત

ઝારખંડમાં ઠંડી હવે જીવલેણ બની ગઈ છે. ભારે ઠંડીના કારણે રાજ્યમાં છેલ્લા 24 કલાકમાં ત્રણ લોકોના મોત થયા છે. ત્રણેયના મોત પલામુના સાતબરવા બ્લોકના જુદા જુદા ગામોમાં થયા છે. અહીં બુધવારે સમગ્ર રાજ્યમાં ધુમ્મસ અને શીતલહેરના કારણે જનજીવન પ્રભાવિત થયું હતું. ધુમ્મસની અસરથી રેલ અને હવાઈ સેવાઓ પણ પ્રભાવિત થઈ હતી. હવામાન વિભાગની આગાહી અનુસાર, કોલ્ડવેવથી રાહત મળવાની કોઈ આશા નથી.

પંજાબ-હરિયાણામાં ગાઢ ધુમ્મસ

પંજાબ અને હરિયાણામાં સવારે ઘણી જગ્યાએ ધુમ્મસનું ગાઢ સ્તર છવાયું હતું, જેના કારણે દૃશ્યતા ઘટી હતી. બંને રાજ્યો છેલ્લા ઘણા દિવસોથી તીવ્ર ઠંડીની ઝપેટમાં છે. પંજાબ અને હરિયાણાની સામાન્ય રાજધાની ચંદીગઢમાં બુધવારે લઘુત્તમ તાપમાન 6.2 ડિગ્રી નોંધાયું હતું.

7 જાન્યુઆરી પછી રાહતની શક્યતા

નવા વર્ષના પ્રથમ દિવસથી રાજધાની દિલ્હી અને ઉત્તર-પશ્ચિમ ભારતમાં શરૂ થયેલો તીવ્ર શિયાળો, ગાઢ ધુમ્મસ અને શીત લહેર આખા અઠવાડિયા સુધી ચાલુ રહેવાની શક્યતા છે. ભારતીય હવામાન વિભાગના જણાવ્યા અનુસાર રવિવારથી તેની તીવ્રતામાં ઘટાડો થવાની સંભાવના છે. તેમના મતે, જમ્મુ-કાશ્મીર, હિમાચલ પ્રદેશ અને ઉત્તરાખંડ જેવા પશ્ચિમ હિમાલયના પ્રદેશોમાં 7 જાન્યુઆરી પછી છૂટાછવાયા વરસાદ અને હિમવર્ષાની પણ અપેક્ષા છે.

આ પણ વાંચો : અયોધ્યા વિવાદ, ટ્રિપલ તલાક જેવા અનેક ઐતિહાસિક નિર્ણયો આપનાર જસ્ટિસ એસ. એ. નઝીર નિવૃત્ત થાય છે

IMDના અધિકારીઓએ જણાવ્યું હતું કે બુધવારે સવારે દિલ્હીમાં સિઝનનું સૌથી નીચું લઘુત્તમ તાપમાન 4.4 ડિગ્રી સેલ્સિયસ નોંધાયું હતું અને તે રાષ્ટ્રીય રાજધાની ધર્મશાલા, નૈનીતાલ અને દેહરાદૂન કરતાં ઠંડુ હતું. ભારત હવામાન વિભાગ (IMD) એ ઈન્ડો-ગંગાના મેદાનો અને ભારતના મધ્ય અને પૂર્વીય ભાગોને અડીને આવેલા ધુમ્મસના જાડા સ્તરને દર્શાવતી સેટેલાઇટ છબીઓ શેર કરી છે.