ઉત્તર ભારતના રાજ્યોમાં કડકડતી ઠંડી યથાવત છે. દિલ્હી, ઉત્તર પ્રદેશ, પંજાબ સહિત અનેક રાજ્યોમાં ઠંડી વધી છે અને તાપમાનમાં ઘટાડો થઈ રહ્યો છે. હવામાન વિભાગ (IMD) એ એવા રાજ્યો વિશે જણાવ્યું છે જ્યાં આગામી દિવસોમાં ઠંડીનો કહેર વધવાનો છે. હવામાન વિભાગે ચેતવણી જાહેર કરી છે કે હિમાચલ પ્રદેશ, પંજાબ અને ઉત્તર રાજસ્થાનના વિસ્તારોમાં આગામી ત્રણ દિવસ સુધી કોલ્ડવેવની સ્થિતિ યથાવત રહેશે.
પંજાબ અને ઉત્તર રાજસ્થાનમાં ઠંડીનો પ્રકોપ
છેલ્લા 24 કલાકના હવામાનની વાત કરીએ તો પંજાબ, હરિયાણા, ચંદીગઢ, દિલ્હી, ઉત્તર રાજસ્થાન, પશ્ચિમ ઉત્તર પ્રદેશ અને મધ્ય પ્રદેશમાં લઘુત્તમ તાપમાન 3-8 ડિગ્રી સેલ્સિયસની વચ્ચે નોંધાયું છે, જે સામાન્ય કરતાં એકથી ત્રણ ડિગ્રી સેલ્સિયસ ઓછું છે. આ ઉપરાંત આંદામાન અને નિકોબાર ટાપુઓ, તમિલનાડુ અને તટીય આંધ્રપ્રદેશમાં હળવાથી મધ્યમ વરસાદ થયો હતો. પંજાબ અને ઉત્તર રાજસ્થાનમાં ઠંડીનો પ્રકોપ જોવા મળ્યો હતો.
આ પણ વાંચો: 2023 વાઈબ્રન્ટ ગુજરાત સમિટ નહી યોજાય, જાણો શું છે કારણ
આ રાજ્યમાં બે દિવસ સુધી વરસાદની ચેતવણી
આગામી દિવસો માટે, હવામાન વિભાગે જણાવ્યું છે કે હિમાચલ પ્રદેશ, પંજાબ, ઉત્તર રાજસ્થાનના ઘણા વિસ્તારોમાં આગામી ત્રણ દિવસ સુધી ઠંડીનું મોજું ચાલુ રહેશે. તે જ સમયે પંજાબ, હરિયાણા અને હિમાચલ પ્રદેશમાં આગામી ત્રણ દિવસ સુધી સવારે અને સાંજે ગાઢ ધુમ્મસ રહેશે. ઉત્તર યુપીના વિસ્તારોમાં પણ ગાઢ ધુમ્મસ જોઈ શકાય છે. તે જ સમયે, હવામાન વિભાગે ચેતવણી આપી છે કે તામિલનાડુમાં 21 અને 22 ડિસેમ્બરના બે દિવસ ભારે વરસાદ થવાની છે.
બે ડિગ્રી સેલ્સિયસ સાથે ફતેહપુર સૌથી ઠંડું સ્થળ
શનિવારે રાત્રે બે ડિગ્રી સેલ્સિયસ લઘુત્તમ તાપમાન સાથે સીકરનો ફતેહપુર વિસ્તાર રાજસ્થાનમાં સૌથી ઠંડુ સ્થળ તરીકે નોંધાયું હતું. હવામાન વિભાગે આ માહિતી આપી છે. હવામાન વિભાગના જણાવ્યા પ્રમાણે, ચુરુમાં લઘુત્તમ તાપમાન 3.1 ડિગ્રી, કરૌલીમાં 3.5 ડિગ્રી, સંગરિયા (હનુમાનગઢ)માં 4.5 ડિગ્રી, અલવર અને પિલાનીમાં 5.4-5.4 ડિગ્રી, સીકરમાં 5.5 ડિગ્રી અને નાગૌરમાં 5.9 ડિગ્રી નોંધાયું હતું. વિભાગના પ્રવક્તાએ જણાવ્યું હતું કે અન્ય સ્થળોએ રાત્રિનું તાપમાન છ ડિગ્રી સેલ્સિયસથી વધુ નોંધાયું હતું. તેમણે કહ્યું કે આગામી 48 કલાક દરમિયાન રાજ્યમાં હવામાનની પેટર્ન એવી જ રહેવાની શક્યતા છે.
