ગુજરાતમાં છ દિવસ ઠંડી અને માવઠાની આગાહી, જાણો કયા પડશે કમોસમી વરસાદ
- 15થી વધુ જિલ્લામાં ગાજવીજ સાથે વરસાદની આગાહી
- 27 ડિસેમ્બરે સાબરકાંઠા, અરવલ્લી, મહીસાગરમાં માવઠુ પડશે
- 29થી 31 ડિસેમ્બર સુધીમાં રાજ્યમાં શુષ્ક હવામાનની સંભાવના
ગુજરાતમાં માવઠાની આગાહી કરવામાં આવી છે. જેમાં રાજ્યમાં ઠંડીનો ચમકારો વધી રહ્યો છે. આ દરમિયાન હવામાન વિભાગે આગામી છ દિવસમાં ઠંડી અને કમોસમી વરસાદની આગાહી કરી છે.
15થી વધુ જિલ્લામાં ગાજવીજ સાથે વરસાદની આગાહી
આગામી 28 ડિસેમ્બર સુધી સૌરાષ્ટ્ર, ઉત્તર ગુજરાત અને દક્ષિણ ગુજરાતના 15થી વધુ જિલ્લામાં ગાજવીજ સાથે વરસાદની આગાહી છે, જેથી ખેડૂતોની ચિંતા વધી છે. 29થી 31 ડિસેમ્બર સુધીમાં રાજ્યમાં શુષ્ક હવામાનની સંભાવના છે. હવામાન વિભાગ દ્વારા 26-27 ડિસેમ્બરમાં સાબરકાંઠા, અરવલ્લી, મહીસાગર, પંચમહાલ, કચ્છ, અમરેલી, ગીર સોમનાથ, ભાવનગર, બનાસકાંઠા, દાહોદ, છોટા ઉદેપુર, નર્મદા, સુરત, તાપી, ડાંગ, નવસારી, વલસાડ જિલ્લાના છૂટાછવાયા સ્થળોએ ગાજવીજ સાથે હળવાથી મધ્યમ વરસાદની આગાહી કરવામાં આવી છે.
અમદાવાદમાં 15 સે. તાપમાન નોંધાયું
રાજ્યમાં છેલ્લા 24 કલાકની અંદર નલિયામાં 8.5 સે., અમરેલીમાં 9.7 સે., રાજકોટમાં 9.8 સે., સુરેન્દ્રનગરમાં 12.6 સે., ગાંધીનગર 13 સે., વડોદરામાં 14 સે., અમદાવાદમાં 15 સે. તાપમાન નોંધાયું છે.
