ધાર્મિક ડેસ્કઃ શનિ જયંતિ વૈશાખ મહિનાની અમાસે ઉજવવામાં આવે છે. આ વર્ષે શનિ જયંતિ પર બે વિશેષ શુભ સંયોગ બની રહ્યા છે. સોમવતી અમાવસ્યા એ શનિ જયંતિનો દિવસ છે. આ દિવસે વટ સાવિત્રી વ્રત પણ રાખવામાં આવશે. અમાસના દિવસે નદીઓમાં સ્નાન કરીને દાન કરવાથી પુણ્ય પ્રાપ્ત થાય છે. ધાર્મિક માન્યતાઓ અનુસાર, શનિદેવનો જન્મ વૈશાખ વદ અમાસના દિવસે થયો હતો, તેથી દર વર્ષે વૈશાખ મહિનાની અમાસના દિવસે શનિ જયંતિ ઉજવવામાં આવે છે. આ વર્ષે શનિ અમાવસ્યા સોમવાર, 30 મેના રોજ ઉજવવામાં આવશે.
શનિ જયંતિ પર શુભ સંયોગ બની રહ્યા છે
આ વખતે શનિ જયંતિ પર સોમવતી અમાવસ્યાનો શુભ સંયોગ બની રહ્યો છે. આ ઉપરાંત આ દિવસે બે શુભ યોગ પણ બની રહ્યા છે. આ દિવસે સુકર્મ યોગ ઉપરાંત સર્વાર્થ સિદ્ધિ યોગ પણ રચાઈ રહ્યો છે. એવી માન્યતા છે કે, શનિ જયંતિના દિવસે શનિદેવની પૂજા કરવાથી તમામ મનોકામનાઓ પૂર્ણ થાય છે. સર્વાર્થ સિદ્ધિ યોગ એ કરેલા કાર્યમાં સફળતા મેળવવાની ઓળખ છે.
ક્યારે બનશે શુભ યોગ?
શનિ જયંતિના દિવસે સર્વાર્થ સિદ્ધિ યોગ સવારે 07:12થી શરૂ થઈને 31 મે, મંગળવારના સવારે 05:24 સુધી રહેશે. શનિદેવને પ્રસન્ન કરવા માટે શુભ મુહૂર્તમાં પૂજા કરવી શ્રેષ્ઠ રહેશે. આ સિવાય રાત્રે 11.39 વાગ્યા સુધી સુકર્મ યોગ પણ રહેશે. આ યોગમાં શુભ કાર્યો કરવા માટે ખૂબ જ શુભ માનવામાં આવે છે. આ પછી પૂજાનો શુભ સમય સવારે 11.51 થી 12.46 સુધી રહેશે.
શનિદેવની પૂજા પદ્ધતિ
શાસ્ત્રો અનુસાર શનિ જયંતિ પર શનિદેવની પૂજા કરવાનું વિશેષ મહત્વ છે. આ દિવસે સવારે વહેલા ઊઠીને સ્નાન વગેરે પતાવી લેવું. આ પછી શનિદેવની મૂર્તિને તેલ, માળા અને પ્રસાદ વગેરે ચઢાવો. શનિદેવના ચરણોમાં કાળા અડદ અને તલ અર્પણ કરો. આ પછી તેલનો દીવો પ્રગટાવીને શનિ ચાલીસાનો પાઠ કરો. આ દિવસે વ્રત રાખનારાઓ પર શનિદેવની વિશેષ કૃપા હોય છે. શનિ જયંતિના દિવસે કોઈ ગરીબને દાન કરવું જોઈએ. એવું કહેવાય છે કે, આ કરવાથી જીવનની તમામ પરેશાનીઓમાંથી મુક્તિ મળે છે. શાસ્ત્રો અનુસાર શનિદેવ દેશવાસીઓને પોતાના કર્મો પ્રમાણે ફળ આપે છે. શનિની સાડા સાતી અને ઢૈયામાં વ્યક્તિને તેના કર્મ પ્રમાણે ફળ મળે છે.
