પુણે ટેસ્ટ પૂર્વે કોચ ગૌતમ ગંભીરનું આકરું વલણ, પ્લેઈંગ 11 અંગે આપ્યું મોટું નિવેદન, જાણો શું કહ્યું

પુણે, 23 ઓક્ટોબર : બેંગલુરુ ટેસ્ટમાં હાર બાદ ભારતીય ક્રિકેટ ટીમ હવે પુણેમાં 24 ઓક્ટોબરથી શરૂ થનારી બીજી ટેસ્ટમાં રમશે. આ ટેસ્ટ મેચ પહેલા ભારતીય ટીમના મુખ્ય કોચ ગૌતમ ગંભીરે આજે (23 ઓક્ટોબર) પ્રેસ કોન્ફરન્સ કરી હતી. જ્યાં તેણે ઋષભ પંતની વાપસી, કેએલ રાહુલના ફોર્મ અને ટીમ ઈન્ડિયાના પ્લેઈંગ 11 વિશે વાત કરી હતી.

ગૌતમ ગંભીરે આ દરમિયાન કહ્યું કે શુભમન ગિલ ચોક્કસપણે પ્લેઈંગ ઈલેવનમાં આવશે, પરંતુ હજુ સુધી તે નક્કી નથી થયું. અમે આવતીકાલે સવારે આ અંગે નિર્ણય કરીશું. ગૌતમ ગંભીરે પ્રેસ કોન્ફરન્સમાં ટીકાગ્રસ્ત બેટ્સમેન કેએલ રાહુલનું સમર્થન કર્યું અને કહ્યું કે ટીમ મેનેજમેન્ટનો અભિપ્રાય મહત્વપૂર્ણ છે, સોશિયલ મીડિયા પર તેની ટીકા નથી. આ દરમિયાન ગંભીરે એમ પણ કહ્યું કે અત્યારે અમે ઓસ્ટ્રેલિયા સિરીઝ વિશે વિચારી રહ્યા નથી, ન્યૂઝીલેન્ડ સામેની આ બે ટેસ્ટ અમારા માટે મહત્વપૂર્ણ છે. ગંભીરે પુષ્ટિ કરી હતી કે પંત બીજી ટેસ્ટમાં ભારત માટે વિકેટ કીપિંગ કરશે.

ઉલ્લેખનીય છે કે, કેએલ રાહુલ બેંગલુરુમાં ન્યુઝીલેન્ડ સામેની પ્રથમ ટેસ્ટની પ્રથમ ઇનિંગમાં શૂન્ય પર આઉટ થયો હતો અને બીજી ટેસ્ટમાં 12 રન બનાવીને પેવેલિયન પરત ફર્યો હતો. જ્યારે ભારતીય ટીમ આ મેચ આઠ વિકેટે હારી ગઈ હતી. પરંતુ, હવે ગંભીરના નિવેદન પરથી લાગે છે કે ટીમ ઈન્ડિયાના મેનેજમેન્ટે લાંબા સમય સુધી કેએલ રાહુલને તક આપવાનો નિર્ણય કર્યો છે.

બીજી ટેસ્ટની પૂર્વ સંધ્યાએ જ્યારે ગંભીરને રાહુલના ટીમમાં સ્થાન વિશે પૂછવામાં આવ્યું તો તેણે કહ્યું, ‘સોશિયલ મીડિયાનો કોઈ અર્થ નથી. ટીમ મેનેજમેન્ટ અને નેતૃત્વ જૂથ શું વિચારે છે તે ખૂબ મહત્વનું છે. તે ખરેખર સારી બેટિંગ કરી રહ્યો છે, તેણે કાનપુરમાં (બાંગ્લાદેશ સામે મુશ્કેલ વિકેટ પર) સારી ઇનિંગ રમી હતી.

રાહુલે બાંગ્લાદેશ સામે કાનપુર ટેસ્ટની પ્રથમ ઇનિંગમાં 68 રનની ઇનિંગ રમી હતી. ગંભીરે કહ્યું, ‘મને ખાતરી છે કે તે જાણે છે કે તેણે મોટા રન બનાવવાના છે અને તેની પાસે રન બનાવવાની ક્ષમતા છે. તેથી જ ટીમે તેને ટેકો આપ્યો છે… છેવટે, દરેકનું મૂલ્યાંકન કરવામાં આવે છે. આંતરરાષ્ટ્રીય ક્રિકેટમાં મૂલ્યાંકન થાય છે.

આ પણ વાંચો :- મહારાષ્ટ્ર વિધાનસભા માટે NCPની 38 ઉમેદવારોની યાદી જાહેર, જાણો અજિત પવાર ક્યાંથી લડશે ચૂંટણી