- એલએનજેપી હોસ્પિટલમાં દાખલ છે જૈન
- તિહાર જેલમાં પડી જતા પહોંચી હતી ઈજા
- કેજરીવાલે મુલાકાતની તસવીરો મીડિયામાં કરી શેર
- CMએ પૂર્વ મંત્રીને વીર અને બહાદુર ગણાવ્યા હતા
દિલ્હીના મુખ્યમંત્રી અરવિંદ કેજરીવાલ એલએનજેપી હોસ્પિટલમાં દાખલ રાજ્યના પૂર્વ આરોગ્ય મંત્રી સત્યેન્દ્ર જૈનને મળ્યા હતા. સીએમ કેજરીવાલની તેમના ભૂતપૂર્વ કેબિનેટ સહયોગી જૈન સાથે આ મુલાકાત લગભગ એક વર્ષ પછી થઈ છે. મની લોન્ડરિંગ કેસમાં ધરપકડ બાદ એક વર્ષ સુધી ન્યાયિક કસ્ટડીમાં રહેલા પૂર્વ મંત્રી જૈનને તાજેતરમાં 6 અઠવાડિયા માટે જામીન મળ્યા હતા. સીએમ કેજરીવાલે સત્યેન્દ્ર જૈન સાથેની તેમની મુલાકાતની તસવીરો પણ સોશિયલ મીડિયા પર શેર કરી છે. ઉપરાંત, જૈનને વીર અને બહાદુર માણસ તરીકે વર્ણવવામાં આવ્યા છે.
તિહાર જેલમાં બાથરૂમમાં પડી જતા ઇજા પહોંચી હતી
સત્યેન્દ્ર જૈન ગુરુવારે તિહાર જેલના બાથરૂમમાં પડી ગયા હતા, ત્યારબાદ તેમને હોસ્પિટલમાં લાવવામાં આવ્યા હતા. આ પછી જૈનને ડીડીયુ હોસ્પિટલમાંથી દિલ્હીની એલએનજેપી હોસ્પિટલમાં ખસેડવામાં આવ્યા હતા. શુક્રવારે, કોર્ટે તબીબી આધારને આધારે જૈનને 42 દિવસ માટે જામીન આપ્યા હતા. ઉલ્લેખનીય છે કે, સત્યેન્દ્ર જૈનની મની લોન્ડરિંગના કેસમાં 30 મે 2022ના રોજ એન્ફોર્સમેન્ટ ડિરેક્ટોરેટ (ED) દ્વારા ધરપકડ કરવામાં આવી હતી. ત્યારથી તે તિહાર જેલમાં બંધ હતો. તેને 360 દિવસ બાદ વચગાળાના જામીન મળ્યા હતા.
ક્યાં કેસમાં સત્યેન્દ્ર જૈનની ધરપકડ કરવામાં આવી હતી
સત્યેન્દ્ર જૈનની ગયા વર્ષે મે મહિનામાં 2017ના કેસમાં ધરપકડ કરવામાં આવી હતી. 24 ઓગસ્ટ 2017ના રોજ, સીબીઆઈએ સત્યેન્દ્ર જૈન અને અન્ય લોકો સામે IPCની કલમ 109 અને પ્રિવેન્શન ઓફ મની લોન્ડરિંગ એક્ટ હેઠળ કેસ નોંધ્યો હતો. આ કેસ અપ્રમાણસર સંપત્તિનો હતો.
2018ની સાલમાં કેસમાં ચાર્જશીટ દાખલ થઈ હતી
ડિસેમ્બર 2018માં સીબીઆઈએ ચાર્જશીટ દાખલ કરી હતી. કહેવામાં આવ્યું હતું કે 2015 થી 2017 ની વચ્ચે સત્યેન્દ્ર જૈનની સંપત્તિમાં આ પદ પર રહીને વધારો થયો છે. સીબીઆઈએ જણાવ્યું હતું કે સત્યેન્દ્ર જૈન પાસે તેમની આવકના જાણીતા સ્ત્રોતમાંથી 200 ટકાથી વધુ સંપત્તિ છે.
સીબીઆઈના કેસમાં ED એ પણ ઝુંકાવ્યું હતું
સીબીઆઈની એફઆઈઆરના આધારે ઈડીએ પણ સત્યેન્દ્ર જૈન વિરુદ્ધ કેસ નોંધ્યો હતો. EDએ તેની તપાસમાં કથિત રીતે શોધી કાઢ્યું હતું કે સત્યેન્દ્ર જૈન અને તેના પરિવારની માલિકીની અને નિયંત્રિત કંપનીઓને હવાલા દ્વારા પૈસા મળ્યા હતા. તેનો ઉપયોગ જમીન ખરીદવા માટે થતો હતો.
