અરવિંદ કેજરીવાલે રાજીનામું આપવાની કરી જાહેરાત, દિલ્હીનું મુખ્યમંત્રીપદ છોડશે

દિલ્હી – 15 સપ્ટેમ્બર :   દિલ્હીના મુખ્યમંત્રી અરવિંદ કેજરીવાલને એક્સાઇઝ પોલિસી કૌભાંડ કેસમાં સુપ્રીમ કોર્ટમાંથી જામીન મળી ગયા છે. શુક્રવારે કેજરીવાલ તિહાર જેલમાંથી બહાર આવ્યા હતા. શનિવારે કેજરીવાલ તેમની પત્ની સાથે હનુમાન મંદિર પહોંચ્યા અને પૂજા કરી અને બજરંગબલીના આશીર્વાદ લીધા. જે બાદ કેજરીવાલ આજે AAP ઓફિસ પહોંચ્યા છે. અહીં CMએ AAP કાર્યકર્તાઓને સંબોધિત કર્યા. આ દરમિયાન કેજરીવાલે મોટી જાહેરાત કરતા કહ્યું કે તેઓ બે દિવસ પછી સીએમ પદ પરથી રાજીનામું આપી દેશે.

અરવિંદ કેજરીવાલે કહ્યું કે ભગવાનના આપણા બધા પર ઘણો આશીર્વાદ છે. તેથી જ આપણે મોટી સમસ્યાઓ સામે લડીએ છીએ અને વિજયી બનીએ છીએ. આ સાથે હું લાખો લોકોનો આભાર માનું છું જેમણે અમારા સાથીઓ માટે પ્રાર્થના કરી. ભાજપ પર પ્રહાર કરતા તેમણે કહ્યું કે આ લોકો જેલમાં મોકલીને આમ આદમી પાર્ટીને તોડવા માગે છે. જેલમાં રહીને મારું મનોબળ વધ્યું છે. જેલમાંથી એલજીને પત્ર લખ્યો હતો. જ્યારે મેં એલજીને પત્ર લખ્યો ત્યારે મને ધમકી આપવામાં આવી હતી. પરિવારને મળવાનું બંધ કરી દેવાની ધમકીઓ આપવામાં આવી હતી.

મારા સ્થાને અન્ય કોઈ સીએમ હશેઃ અરવિંદ કેજરીવાલ
સીએમ અરવિંદ કેજરીવાલે કહ્યું, ‘હું બે દિવસ પછી સીએમ પદ પરથી રાજીનામું આપવા જઈ રહ્યો છું. જ્યાં સુધી જનતા ચુકાદો નહીં આપે ત્યાં સુધી હું મુખ્યમંત્રીની ખુરશી પર બેસીશ નહીં. તેમણે કહ્યું કે હું અને મનીષ સિસોદિયા જનતાની વચ્ચે જઈશું. દિલ્હી વિધાનસભા ભંગ કરવામાં આવશે નહીં. મારી જગ્યાએ બીજા કોઈ સીએમ હશે.

અરવિંદ કેજરીવાલે કહ્યું, ‘ભાજપે બીજી એક નવી ફોર્મ્યુલા બનાવી છે જ્યાં તેઓ ચૂંટણી હારે, ત્યાંના મુખ્ય પ્રધાનને ખોટો કેસ દાખલ કરીને ધરપકડ કરો જેથી તેમની સરકાર પડી જાય. તેઓએ સિદ્ધારમૈયા, પિનરાઈ વિજયન, મમતા દીદી વિરુદ્ધ કેસ દાખલ કર્યા છે. તેઓ એક વિપક્ષી મુખ્યમંત્રીને પણ છોડતા નથી, તેઓ દરેક સામે ખોટા કેસ કરે છે, જેલમાં નાખે છે અને સરકારને ઉથલાવી નાખે છે.

સીએમએ કહ્યું કે હું હાથ જોડીને દેશના તમામ બિન-ભાજપી મુખ્યમંત્રીઓને વિનંતી કરવા માંગુ છું, હવે જો વડાપ્રધાન તમને ખોટો કેસ કરીને જેલમાં ધકેલી દે તો રાજીનામું ના આપો. કોઈપણ સંજોગોમાં રાજીનામું ન આપો, જેલમાંથી સરકાર ચલાવો. એવું નથી કે આપણે પદના લોભી છીએ, કારણ કે આપણું બંધારણ આપણા માટે મહત્વપૂર્ણ છે અને લોકશાહીને બચાવવી મહત્વપૂર્ણ છે. આટલી મોટી બહુમતીથી ચૂંટાયેલી સરકારને તમે જેલમાં પુરી દેશો અને રાજીનામું આપવાનું કહેશો.

આ પણ વાંચો : ઉત્તરપ્રદેશમાં ગણેશ વિસર્જન કરવા જતા લોકો પર પથ્થરમારો, બે પક્ષો વચ્ચે ઝપાઝપી