ચીની જાસૂસની બકિંગહામ પેલેસમાં એન્ટ્રી, પ્રિન્સની બર્થડે પાર્ટીમાં રહ્યો હાજર: ઘટસ્ફોટ બાદ ખળભળાટ

• આ જાસૂસ પૂર્વ વડાપ્રધાન ડેવિડ કેમરૂન અને થેરેસા મેને પણ મળી ચૂક્યો છે

નવી દિલ્હી, 16 ડિસેમ્બર: બ્રિટિશ રાજકારણમાં હાલમાં એક કથિત ચીની જાસૂસનો મામલો ચર્ચામાં છે. મળતી માહિતી મુજબ, આ ચીની જાસૂસ કિંગ ચાર્લ્સ ત્રીજાના નાના ભાઈ પ્રિન્સ એન્ડ્ર્યુના નજીકના સહયોગી તરીકે બકિંગહામ પેલેસમાં પ્રવેશ્યો હતો. એટલું જ નહીં આ જાસૂસ પૂર્વ વડાપ્રધાન ડેવિડ કેમરૂન અને થેરેસા મેને પણ મળી ચૂક્યો છે. આ કથિત ચીની જાસૂસની ઓળખ જાહેર કરવામાં આવી નથી પરંતુ મળતી માહિતી મુજબ, તે એક બિઝનેસમેન છે, જેને H6 તરીકે ઓળખવામાં આવે છે. અગાઉ ડ્યુક ઓફ યોર્ક પ્રિન્સ એન્ડ્ર્યુએ એક નિવેદનમાં કહ્યું હતું કે, તેણે કથિત જાસૂસ સાથેના તમામ સંપર્ક સમાપ્ત કરી દીધા છે.

બ્રિટનમાં H6ના પ્રવેશ પર પ્રતિબંધ મૂકવામાં આવ્યો હતો

બ્રિટનના તત્કાલિન ગૃહ પ્રધાન સુએલા બ્રેવરમેને 2023માં પ્રથમ વખત બ્રિટનમાં H6 ના પ્રવેશ પર પ્રતિબંધ મૂક્યો હતો. તે સમયે એવું કહેવામાં આવ્યું હતું કે, તેઓ ચીનની કમ્યુનિસ્ટ પાર્ટીના એજન્ડા સાથે જોડાયેલા હતા. પરંતુ H6એ આ નિર્ણય સામે કોર્ટનો સંપર્ક કર્યો અને તેને ગેરકાયદે ગણાવ્યો.

લંડન ટ્રિબ્યુનલે સુનાવણી દરમિયાન કહ્યું કે, H6નું કહેવું છે કે તેણે રાજકારણમાં સામેલ થવાનું છોડી દીધું છે. તેમના પ્રતિનિધિઓએ ટ્રિબ્યુનલને જણાવ્યું કે તેઓ ક્યારેય CCPના વરિષ્ઠ સભ્ય રહ્યા નથી.

ઉલ્લેખનીય છે કે, આ અઠવાડિયાની શરૂઆતમાં રાષ્ટ્રીય સુરક્ષાને કારણે H6 પર બ્રિટનમાં પ્રવેશવા પર પ્રતિબંધ મૂકવામાં આવ્યો હતો. સ્પેશિયલ ઈમિગ્રેશન અપીલ કમિશને આ વર્ષે જુલાઈમાં કહ્યું હતું કે, આ વ્યક્તિને 2020માં પ્રિન્સ એન્ડ્ર્યુની બર્થડે પાર્ટીમાં આમંત્રણ આપવામાં આવ્યું હતું.

આ સમગ્ર મામલે પ્રિન્સ એન્ડ્ર્યુના કાર્યાલય દ્વારા જારી કરવામાં આવેલા નિવેદનમાં કહેવામાં આવ્યું છે કે, ડ્યુક તે વ્યક્તિને સત્તાવાર ચેનલો દ્વારા મળ્યા હતા અને આ દરમિયાન કોઈ ગોપનીય બાબતોની ચર્ચા કરવામાં આવી ન હતી અને કોઈ સંવેદનશીલ બાબતો પર ચર્ચા કરવામાં આવી ન હતી.

ડેવિડ કેમરૂન અને થેરેસા મે તરફથી શું છે પ્રતિક્રિયા?

તે જ સમયે, ડેવિડ કેમરૂન સાથે સંબંધિત એક સૂત્રમાંથી મળતી માહિતી મુજબ, ડેવિડ કેમરૂન એક દાયકા સુધી કન્ઝર્વેટિવ નેતા હતા અને છ વર્ષ સુધી દેશના વડાપ્રધાન હતા. આ દરમિયાન તેઓ જુદા જુદા કાર્યક્રમોમાં હજારો લોકોને મળ્યા હતા. આવી સ્થિતિમાં, આ ખાસ વ્યક્તિ વિશે કોઈ માહિતી નથી. આ દરમિયાન, થેરેસા મેના પ્રવક્તાએ કહ્યું કે, તેમને આ વ્યક્તિને મળવા વિશે કંઈ યાદ નથી.

બીજી તરફ લંડનમાં ચીનની એમ્બેસીએ જાસૂસી થિયરીને ફગાવી દીધી છે. ચીનનું કહેવું છે કે, આ સમગ્ર એજન્ડાનો હેતુ ચીનની છબી ખરાબ કરવાનો છે તેમજ ચીન અને બ્રિટન વચ્ચેના સામાન્ય સંબંધો બગડવાના છે.

આ પણ જૂઓ: ડેવિન નુન્સ કોણ છે? જેમને ટ્રમ્પે ઈન્ટેલિજન્સ એડવાઈઝરી બોર્ડના વડા બનાવ્યા