ચીન પેંગોંગ ત્સો તળાવ પાસે બીજો પુલ બનાવી રહ્યું છે, સેટેલાઇટ ઇમેજ જાહેર

ચીન પૂર્વી લદ્દાખમાં વ્યૂહાત્મક રીતે મહત્વપૂર્ણ પેંગોંગ ત્સો તળાવની નજીકમાં પુલ બનાવી રહ્યાની વાત સામે આવી રહી છે. આ પુલના નિર્માણથી ચીનની સેનાને તેના સૈનિકોને આ વિસ્તારમાં ઝડપથી ખસેડવામાં મદદ મળી શકે છે. જેને લઈને બીજો પુલ બનાવવાની વાત સામે આવી છે. આ પુલ બનાવવાની સેટેલાઈટ ઈમેજ પણ સામે આવી છે.

સેટેલાઇટ ઇમેજ અને મામલાની જાણતા લોકોના હવાલાથી આ માહિતી સામે આવી છે. છેલ્લા બે વર્ષથી વધુ સમયથી પૂર્વી લદ્દાખમાં અનેક સ્થળોએ ભારતીય અને ચીનની સેનાઓ વચ્ચે ચાલી રહેલા મડાગાંઠ વચ્ચે આ પુલ બનાવવામાં આવી રહ્યો છે. ચીનના નવા બાંધકામ અંગે ભારતીય સંરક્ષણ સંસ્થાન તરફથી કોઈ સત્તાવાર પ્રતિક્રિયા કે ટિપ્પણી કરવામાં આવી નથી.

ઓગસ્ટ 2020માં ભારતીય સૈનિકોએ પેંગોંગ તળાવના દક્ષિણ કાંઠે અનેક વ્યૂહાત્મક શિખરો કબજે કર્યા બાદ ચીન તેના લશ્કરી માળખાને મજબૂત કરવા પર ધ્યાન કેન્દ્રિત કરી રહ્યું છે. સૈન્ય તૈયારીઓને વધારવાના એકંદર પ્રયાસોના ભાગરૂપે ભારત સરહદી વિસ્તારોમાં પુલ, રસ્તા અને ટનલ પણ બનાવી રહ્યું છે. જાણવા મળ્યું છે કે ચીને હાલમાં જ આ વિસ્તારમાં પ્રથમ પુલનું નિર્માણ પૂર્ણ કર્યું છે. નિષ્ણાતોએ જણાવ્યું કે નવો પુલ વાસ્તવિક નિયંત્રણ રેખા (એલએસી)થી 20 કિમીથી વધુના વિસ્તારમાં બનાવવામાં આવી રહ્યો છે. જીઓસ્પેશિયલ ઇન્ટેલિજન્સ સંશોધક ડેમિયન સિમોન, જે એલએસી સાથે ચાઇનીઝ પ્રવૃત્તિઓ પર નજર રાખે છે, તેણે ટ્વિટર પર નવા બાંધકામની ઉપગ્રહ છબીઓ પોસ્ટ કરી છે.