યુપીમાંથી એક કરોડની કિંમતનું ચરસ ઝડપાયું, મહિલા સહીત ચારની ધરપકડ
- પોલીસે નવ કિલો ચરસ કર્યું જપ્ત
- પોલીસની નજરથી બચવા માટે તસ્કરો મહિલાને સાથે રાખતા
- ઝડપાયેલા આરોપીઓ આંતરરાષ્ટ્રીય સ્તરે ચરસની દાણચોરીમાં હતા સામેલ
- દિલ્હી એનસીઆરમાં સપ્લાય કરવાનું હતું ચરસ
ઉત્તર પ્રદેશના ફિરોઝાબાદમાં પોલીસ અને SOG ટીમે સંયુક્ત ચેકિંગ દરમિયાન આંતરરાષ્ટ્રીય ડ્રગ રેકેટનો પર્દાફાશ કર્યો. પોલીસે માદક પદાર્થની હેરાફેરી સાથે સંકળાયેલા ચાર લોકોની ધરપકડ કરી છે. આ તસ્કરોમાં એક મહિલાનો પણ સમાવેશ થાય છે. પોલીસે નવ કિલો ચરસ, મોબાઈલ ફોન અને મોટરસાઈકલ મળી કુલ એક કરોડની કિંમતનો મુદ્દામાલ પણ જપ્ત કર્યો હતો.
નવ કિલો ચરસ જપ્ત કરાયું
SSP આશિષ તિવારીની સૂચના પર સિરસાગંજ પોલીસ સ્ટેશન અને SOGની ટીમે સોમવારે લખનૌ-આગ્રા એક્સપ્રેસ વે પર ચેકિંગ કર્યું હતું. ચેકિંગ દરમિયાન એક્સપ્રેસ વે પર અંડરપાસની નીચેથી ચાર લોકો ઝડપાયા હતા. આ લોકો પાસેથી લગભગ એક કરોડ રૂપિયાની કિંમતનું નવ કિલો ચરસ જપ્ત કરવામાં આવ્યું હતું. આરોપીની સાથે નવલપુરા યોગાપટ્ટીમાં રહેતી મહિલા શીલાની પણ ધરપકડ કરવામાં આવી હતી.
પોલીસની નજરથી બચવા માટે તસ્કરો મહિલાને સાથે રાખતા
પોલીસની નજરથી બચવા માટે તસ્કરો મહિલાને પોતાની સાથે રાખતા હતા. પોલીસે ચારેય આરોપીઓ, મુસ્લિમ મિયાં નિવાસી નેપાળ, કાલિંદી વિહાર આગ્રાના રહેવાસી અરબાઝ ખાન અને કાલિંદી વિહાર આગ્રાના રહેવાસી મનીષ રાઠોડ પાસેથી એક મોટરસાઇકલ, ત્રણ મોબાઇલ ફોન અને રૂ. 5,000 રોકડા જપ્ત કર્યા છે. પોલીસે તેમના આશ્રયસ્થાનોની શોધ શરૂ કરી છે. દરેકના સ્થાનિક જિલ્લામાં સંપર્કોની પણ તપાસ કરવામાં આવી રહી છે.
આરોપીઓ આંતરરાષ્ટ્રીય સ્તરે ચરસની દાણચોરીમાં હતા સામેલ
એસપી ઓફિસમાં વાતચીત દરમિયાન, અધિક પોલીસ અધિક્ષક રણવિજય સિંહે જણાવ્યું કે ધરપકડ કરાયેલા ચાર આરોપીઓ આંતરરાષ્ટ્રીય સ્તરે ચરસની દાણચોરીમાં સામેલ હતા. ઘણા સમયથી તેઓ કામ કરી રહ્યા હતા. ધરપકડ કરાયેલા આરોપી અને અન્ય કેટલાક સાથીદારો નેપાળને અડીને આવેલી બિહારની સરહદેથી દેશમાં પ્રવેશે છે. ઝડપાયેલ ચરસ દિલ્હી એનસીઆરમાં સપ્લાય કરવાનું હતું.
