SCના આકરાં વલણ બાદ 8 હાઇકોર્ટમાં ચીફ જસ્ટિસની નિમણૂક કરતી કેન્દ્ર સરકાર

નવી દિલ્હી, 21 સપ્ટેમ્બર : કેન્દ્ર સરકારે આઠ હાઈકોર્ટના મુખ્ય ન્યાયાધીશોની નિમણૂક માટે જાહેરનામું બહાર પાડ્યું છે. કેન્દ્રીય કાયદા મંત્રી અર્જુન રામ મેઘવાલે સોશિયલ મીડિયા પ્લેટફોર્મ X ઉપર આ નિમણૂંકો વિશેની માહિતી શેર કરી છે. ઉલ્લેખનીય છે કે આ નિમણૂકો ઘણા સમયથી અટવાયેલી હતી. સુપ્રીમ કોર્ટ કોલેજિયમ દ્વારા મુખ્ય ન્યાયાધીશો અંગેની ભલામણો 11 જુલાઈના રોજ કરવામાં આવી હતી. જો કે, 17 સપ્ટેમ્બરે, તેણે ચાર હાઈકોર્ટમાં મુખ્ય ન્યાયાધીશો (CJs) ની નિમણૂક અંગેની તેની અગાઉની ભલામણોને બદલી નાખી હતી.

નવી નિમણૂકોની યાદી નીચે મુજબ છે.

• જસ્ટિસ મનમોહન (હાલમાં દિલ્હી હાઈકોર્ટના કાર્યકારી મુખ્ય ન્યાયાધીશ)ને દિલ્હી હાઈકોર્ટના મુખ્ય ન્યાયાધીશ તરીકે નિયુક્ત કરવામાં આવ્યા હતા.
• જસ્ટિસ રાજીવ શકધર (હાલમાં દિલ્હી હાઈકોર્ટના જજ)ની હિમાચલ પ્રદેશ હાઈકોર્ટના મુખ્ય ન્યાયાધીશ તરીકે નિમણૂક કરવામાં આવી હતી.
• જસ્ટિસ સુરેશ કુમાર કૈત (દિલ્હી હાઈકોર્ટના જજ)ની મધ્યપ્રદેશ હાઈકોર્ટના મુખ્ય ન્યાયાધીશ તરીકે નિમણૂક કરવામાં આવી હતી.
• જસ્ટિસ ઈન્દ્ર પ્રસન્ના મુખર્જી (કલકત્તા હાઈકોર્ટના જજ)ની મેઘાલય હાઈકોર્ટના મુખ્ય ન્યાયાધીશ તરીકે નિમણૂક કરવામાં આવી હતી.
• જસ્ટિસ નીતિન મધુકર જામદાર (બોમ્બે હાઈકોર્ટના જજ)ની કેરળ હાઈકોર્ટના મુખ્ય ન્યાયાધીશ તરીકે નિમણૂક કરવામાં આવી હતી.
• જસ્ટિસ તાશી રબસ્તાન (જમ્મુ અને કાશ્મીર અને લદ્દાખ હાઈકોર્ટના જજ) ની જમ્મુ અને કાશ્મીર અને લદ્દાખ હાઈકોર્ટના મુખ્ય ન્યાયાધીશ તરીકે નિમણૂક કરવામાં આવી હતી.
• જસ્ટિસ કેઆર શ્રીરામ (બોમ્બે હાઈકોર્ટના જજ)ની મદ્રાસ હાઈકોર્ટના મુખ્ય ન્યાયાધીશ તરીકે નિમણૂક કરવામાં આવી હતી.
• જસ્ટિસ એમએસ રામચંદ્ર રાવ (હાલમાં હિમાચલ પ્રદેશ હાઈકોર્ટના મુખ્ય ન્યાયાધીશ)ને ઝારખંડ હાઈકોર્ટના મુખ્ય ન્યાયાધીશ તરીકે નિયુક્ત કરવામાં આવ્યા હતા.

સુપ્રીમ કોર્ટના કોલેજિયમે 11 જુલાઈના રોજ આ હાઈકોર્ટ માટે ભલામણો કરી હતી. લગભગ બે મહિના પછી, 17 સપ્ટેમ્બરના રોજ, કોલેજિયમે જસ્ટિસ સુરેશ કુમાર કૈત, જસ્ટિસ તાશી રબસ્તાન અને જસ્ટિસ જીએસ સંધવાલા સહિત ત્રણ જજોની ભલામણોમાં ફેરફાર કર્યો હતો. કોલેજિયમે એ પણ પ્રસ્તાવ મૂક્યો છે કે જસ્ટિસ જી.એસ. સંધવાલિયા (પંજાબ અને હરિયાણા હાઈકોર્ટ)ને હિમાચલ પ્રદેશ હાઈકોર્ટના ચીફ જસ્ટિસ બનાવવામાં આવે, જેઓ 18 ઓક્ટોબરે જસ્ટિસ શકધરની નિવૃત્તિ બાદ કાર્યભાર સંભાળશે.