સુપ્રીમ કોર્ટને 5 નવા જજ મળ્યા, સોમવારે લઈ શકે છે શપથ
લાંબી રાહ અને સુપ્રીમ કોર્ટની નારાજગી બાદ આખરે કેન્દ્ર સરકારે સુપ્રીમ કોર્ટના 5 જજોની નિમણૂક કરી છે. રાષ્ટ્રપતિ દ્રૌપદી મુર્મુએ સુપ્રીમ કોર્ટ કોલેજિયમની ભલામણને મંજૂરી આપી દીધી છે. કહેવામાં આવી રહ્યું છે કે નવા જજો સોમવારે શપથ લઈ શકે છે. જણાવી દઈએ કે કેન્દ્રના આ નિર્ણય બાદ સુપ્રીમ કોર્ટમાં કુલ જજોની સંખ્યા વધીને 32 થઈ ગઈ છે. જસ્ટિસ પંકજ મિત્તલ, જસ્ટિસ સંજય કરોલ, જસ્ટિસ પીવી સંજય કુમાર, જસ્ટિસ અહસાનુદ્દીન અમાનુલ્લાહ અને જસ્ટિસ મનોજ મિશ્રાને સુપ્રીમ કોર્ટના જજ તરીકે નિયુક્ત કરવા માટે વોરંટ જારી કરવામાં આવ્યું છે.
Centre clears appointments of 5 new Judges for Supreme Court – Pankaj Mithal (Rajasthan HC chief justice), Sanjay Karol (Patna HC chief justice), PV Sanjay Kumar (Manipur HC chief justice), Ahsanuddin Amanullah (Patna HC judge) &Manoj Misra (Allahabad HC judge).
— ANI (@ANI) February 4, 2023
જે ન્યાયાધીશોની નિમણૂક કરવામાં આવી છે તેઓ દેશની અલગ-અલગ હાઈકોર્ટમાં પહેલાથી જ પોસ્ટેડ છે. જેમાં જસ્ટિસ પંકજ મિત્તલ અગાઉ રાજસ્થાન હાઈકોર્ટમાં ચીફ જસ્ટિસ તરીકે નિયુક્ત હતા. જસ્ટિસ સંજય કરોલ પટના હાઈકોર્ટમાં મુખ્ય ન્યાયાધીશના પદ પર છે. તેમના પછી જસ્ટિસ પીવી સંજય કુમાર મણિપુર હાઈકોર્ટમાં મુખ્ય ન્યાયાધીશ તરીકે સેવા આપી રહ્યા છે. જસ્ટિસ અહસાનુદ્દીન અમાનુલ્લા પટના હાઈકોર્ટમાં જજ છે અને જસ્ટિસ મનોજ મિશ્રા અલ્હાબાદ હાઈકોર્ટમાં જજ છે.
તમને જણાવી દઈએ કે ગયા વર્ષે 13 ડિસેમ્બરે સુપ્રીમ કોર્ટ કોલેજિયમ દ્વારા ભલામણ કરાયેલા નામો પર કેન્દ્ર સરકારની મંજૂરી સાથે, સુપ્રીમ કોર્ટને શનિવારે પાંચ નવા જજો મળ્યા હતા. કાયદામંત્રી કિરેન રિજિજુએ ટ્વીટ દ્વારા આ તમામ ન્યાયાધીશોને સર્વોચ્ચ અદાલતના ન્યાયાધીશ તરીકે બઢતીની જાહેરાત કરી હતી.
આ જજો આવતા અઠવાડિયે શપથ ગ્રહણ કરશે ત્યારે સુપ્રીમ કોર્ટમાં જજોની સંખ્યા વધીને 32 થઈ જશે. હાલમાં, ભારતના મુખ્ય ન્યાયાધીશ (CJI) સહિત 27 ન્યાયાધીશો સર્વોચ્ચ અદાલતમાં કામ કરી રહ્યા છે, જ્યારે CJI સહિત તેની મંજૂર સંખ્યા 34 છે. કોલેજિયમની ભલામણો છતાં ન્યાયાધીશોની નિમણૂક અને ટ્રાન્સફરમાં સરકાર તરફથી વિલંબ પર સુપ્રીમ કોર્ટની બેન્ચ દ્વારા કડક અવલોકનો વચ્ચે આ નિમણૂંકો કરવામાં આવી છે. એક વરિષ્ઠ સરકારી અધિકારીએ જણાવ્યું હતું કે આ પાંચ નિમણૂકોને બેન્ચની ટિપ્પણી સાથે કોઈ લેવાદેવા નથી અને આ નિમણૂકો કેન્દ્ર દ્વારા વિચારણાના નિર્ણય પછી કરવામાં આવી હતી.
