સીબીઆઈ દ્વારા પૂર્વ નાણા સચિવ અરવિંદ માયારામના સ્થળો પર સર્ચ, જાણો શું છે આરોપ

કેન્દ્રીય તપાસ એજન્સી સીબીઆઈ દ્વારા પૂર્વ નાણા સચિવ અરવિંદ માયારામના સ્થળો પર સર્ચ કરવામાં આવી રહી હોવાના અહેવાલ સામે આવી રહ્યા છે. કહેવામાં આવી રહ્યું છે કે કેન્દ્રીય એજન્સીએ આ કાર્યવાહી કથિત ભ્રષ્ટાચાર સાથે જોડાયેલા એક કેસમાં કરી છે. સીબીઆઈના જણાવ્યા અનુસાર, પૂર્વ નાણા સચિવ પર કરન્સી પ્રિન્ટિંગ માટે આપવામાં આવેલા ટેન્ડરમાં અનિયમિતતાનો આરોપ છે.

સીબીઆઈએ ક્યાં ગંભીર આક્ષેપો કર્યા ?

આ મામલે સીબીઆઈનો આરોપ છે કે યુકે સ્થિત કંપની ડી લા રુ ઈન્ટરનેશનલ લિમિટેડ, નાણા મંત્રાલય અને રિઝર્વ બેંક ઓફ ઈન્ડિયાના અધિકારીઓએ કંપનીને અનુચિત તરફેણ કરવા માટે ગુનાહિત કાવતરું ઘડ્યું હતું. માયારામ, નાણા સચિવ તરીકે, ખાસ રંગ-બદલતા સુરક્ષા થ્રેડના સપ્લાય માટે કંપની સાથે સમાપ્ત થયેલ કરારને ગેરકાયદેસર રીતે ત્રણ વર્ષ સુધી લંબાવ્યો હતો. આ માટે, ગૃહ મંત્રાલય અથવા તત્કાલિન નાણામંત્રીને કોઈ ફરજિયાત સુરક્ષા મંજૂરી લેવામાં આવી ન હતી. FIR અનુસાર, મયારામે કથિત રીતે ચોથી વખત કોન્ટ્રાક્ટ લંબાવ્યો હતો.

મયારામ રાજસ્થાનના મુખ્યમંત્રીના આર્થિક સલાહકાર

સીબીઆઈએ એફઆઈઆર નોંધ્યા બાદ 1978 બેચના ઈન્ડિયન એડમિનિસ્ટ્રેટિવ સર્વિસ (આઈએએસ) અધિકારીના દિલ્હી અને જયપુરના આવાસ પર સર્ચ કરવામાં આવ્યું હતું. એજન્સીએ નાણા મંત્રાલયના આર્થિક બાબતોના વિભાગના ચીફ વિજિલન્સ ઓફિસરની ફરિયાદ પર 2018માં પ્રાથમિક તપાસ શરૂ કરી હતી. સીબીઆઈએ તેના તારણોના આધારે તેને માયારામ વિરુદ્ધ નિયમિત કેસમાં ફેરવી દીધો. માયારામ હાલમાં રાજસ્થાનના મુખ્યમંત્રી અશોક ગેહલોતના આર્થિક સલાહકાર છે.

2004માં કરાર પર હસ્તાક્ષર થયા હતા

એજન્સીએ તેની એફઆઈઆરમાં જણાવ્યું હતું કે કેન્દ્ર સરકારે 2004માં ડી લા રુ ઈન્ટરનેશનલ લિમિટેડ સાથે ભારતીય બેંક નોટો માટે ખાસ રંગ બદલતા સુરક્ષા થ્રેડના સપ્લાય માટે પાંચ વર્ષનો કરાર કર્યો હતો. કોન્ટ્રાક્ટ 31 ડિસેમ્બર 2015 સુધી ચાર વખત લંબાવવામાં આવ્યો હતો. એવો દાવો કરવામાં આવે છે કે તત્કાલિન નાણામંત્રીએ ભારત સરકાર વતી રિઝર્વ બેંક ઓફ ઈન્ડિયાને ચોક્કસ સુરક્ષા થ્રેડના સપ્લાયર્સ સાથે વિશેષ કરાર કરવા માટે અધિકૃત કર્યા હતા. ડી લા રુ સાથે કરાર 4 સપ્ટેમ્બર 2004ના રોજ થયો હતો.