બજેટ 2024: ભારતનું પ્રથમ બજેટ ક્યારે રજૂ કરવામાં આવ્યું હતું? જાણો બજેટ અંગે રસપ્રદ વાતો
નવી દિલ્હી, 31 જાન્યુઆરી : કેન્દ્રીય નાણામંત્રી દર વર્ષે 1 ફેબ્રુઆરીએ સામાન્ય બજેટ રજૂ કરે છે. દર વર્ષની જેમ, નાણામંત્રી નિર્મલા સીતારમણ(Nirmala Sitharaman)1 ફેબ્રુઆરીએ કેન્દ્રીય બજેટ 2024-25 રજૂ કરશે. સંસદના બજેટ સત્રનું આયોજન 31 જાન્યુઆરીથી 9 ફેબ્રુઆરીની વચ્ચે કરવામાં આવ્યું છે. 17મી લોકસભા (બજેટ 2024)નું આ છેલ્લું બજેટ હશે.
શું તમે જાણો છો કે કેન્દ્રીય બજેટ રજૂ કરવાની પરંપરા બ્રિટિશ શાસન દરમિયાન શરૂ થઈ હતી. ભારતમાં વર્ષ 1860માં પ્રથમ વખત બજેટ રજૂ કરવામાં આવ્યું હતું. ચાલો જાણીએ બજેટ સાથે જોડાયેલા કેટલીક રસપ્રદ વાતો…
– આર.કે. સન્મુખમ ચેટ્ટીએ 26 નવેમ્બર, 1947ના રોજ સ્વતંત્ર ભારતનું પ્રથમ કેન્દ્રીય બજેટ રજૂ કર્યું હતું.
– ભારતનું પ્રથમ બજેટ 7 એપ્રિલ, 1860ના રોજ જાહેર કરવામાં આવ્યું હતું. ઈસ્ટ ઈન્ડિયા કંપનીના જેમ્સ વિલ્સને તેને બ્રિટિશ ક્રાઉન સમક્ષ રજૂ કર્યું હતું.
– મોરારજી દેસાઈએ સૌથી વધુ એટલે કે કુલ 10 બજેટ રજૂ કર્યા હતા.
– 2017માં રેલવે બજેટને કેન્દ્રીય બજેટ સાથે મર્જ કરવામાં આવ્યું હતું.
– જવાહરલાલ નેહરુ, ઈન્દિરા ગાંધી અને રાજીવ ગાંધી જ એવા વડાપ્રધાન હતા જેમણે બજેટ રજૂ કર્યું હતું.
– 2016 સુધી, કેન્દ્રીય બજેટ ફેબ્રુઆરીના છેલ્લા કાર્યકારી દિવસે રજૂ કરવામાં આવતું હતું. ભૂતપૂર્વ નાણાપ્રધાન અરુણ જેટલીએ 2017માં તેને બદલીને 1 ફેબ્રુઆરી કરી હતી.
– બજેટની ગોપનીયતા જાળવવા માટે ‘હલવા સમારોહ’ પછી લોક-ઇનનું પાલન કરવામાં આવે છે.
– ભૂતપૂર્વ વડા પ્રધાન મનમોહન સિંહે નાણા પ્રધાન તરીકેના તેમના કાર્યકાળ દરમિયાન 1991માં શબ્દોની સંખ્યાના સંદર્ભમાં સૌથી લાંબુ બજેટ ભાષણ આપ્યું હતું.
– નાણામંત્રી નિર્મલા સીતારમણે સૌથી લાંબુ બજેટ ભાષણ આપ્યું હતું. કેન્દ્રીય બજેટ 2020 રજૂ કરતી વખતે તેણી 2.42 કલાક સુધી બોલ્યા હતા.
– 1 ફેબ્રુઆરી, 2021 ના રોજ, નાણા પ્રધાન નિર્મલા સીતારમણે પ્રથમ પેપરલેસ બજેટ રજૂ કર્યું હતું. આ કોરોના મહામારીના કારણે કરવામાં આવ્યું હતું.
આ પણ વાંચો : પહેલી ફેબ્રુઆરીએ નિર્મલા સીતારમણ સતત છઠ્ઠું બજેટ કરશે રજૂ, શું હશે ફેરફાર?
