ઉત્તર-પૂર્વ દિલ્હીના ન્યુ સીલમપુર વિસ્તારમાં ત્રણ મિત્રો દ્વારા 12 વર્ષના છોકરા પર ગેંગરેપ કરવામાં આવ્યો. જે બાદ પીડિતની હાલત બગડી છે જેને પગલે તેને તાત્કાલિક સારવાર અર્થે હોસ્પિટલ ખસેડવામાં આવ્યો છે. જ્યાં તેની હાલત નાજુક હોવાનું સામે આવ્યું છે.
દિલ્હીમાં 12 વર્ષના છોકરા સાથે નિર્ભયા જેવી ક્રૂરતા
મળતી માહિતી મુજબ સગીર છોકરાએ ઘટનાના ચાર દિવસ પછી ગુરુવારે તેના માતા-પિતાને હુમલા વિશે જણાવ્યું હતું. આ પછી તેના માતા-પિતાએ DCW ને જાણ કરી અને છોકરાને ‘ખૂબ જ નાજુક સ્થિતિમાં’ હોસ્પિટલમાં દાખલ કરવામાં આવ્યો. DCW ચીફ સ્વાતિ માલીવાલે કહ્યું કે હાલમાં છોકરાની LNJP હોસ્પિટલમાં સારવાર ચાલી રહી છે અને ICUમાં તેની હાલત નાજુક હોવાનું કહેવાય છે.
છોકરા પર તેના જ મિત્રોએ કર્યો ગેંગરેપ
22 સપ્ટેમ્બરના રોજ પોલીસને લોક નાયક જયપ્રકાશ (LNJP) હોસ્પિટલમાંથી માહિતી મળી હતી કે 12 વર્ષના છોકરાને શારીરિક ત્રાસ બાદ દાખલ કરવામાં આવ્યો હતો. ત્રણ મિત્રોએ છોકરા પર ગેંગરેપ કર્યો અને ત્યારબાદ પ્રાઇવેટ પાર્ટમાં લોખંડનો સળીયો નાખી દીધો હતો અને મારપીટ કરી હતી. અધિકારીઓએ જણાવ્યું કે પોલીસની એક ટીમ હોસ્પિટલ પહોંચી હતી અને છોકરાના માતા-પિતાને મળ્યા હતા. જો કે આ મામલે પીડિતના માતા પિતાએ નિવેદન આપવાનો ઇનકાર કર્યો હતો. આ પછી પોલીસે સખી નામની સંસ્થાના કાઉન્સેલરની વ્યવસ્થા કરી અને છોકરા અને તેની માતાનું કાઉન્સેલિંગ કરવામાં આવ્યું હતું.
આ કલમો હેઠળ કેસ નોધાયો
કાઉન્સેલિંગ પછી પીડિતાની માતાએ ખુલાસો કર્યો કે 18 સપ્ટેમ્બરના રોજ તેના પુત્ર પર તેના ત્રણ મિત્રો દ્વારા ગેંગરેપ કરવામાં આવ્યો હતો તેમના નિવેદનના આધારે ભારતીય દંડ સંહિતાની કલમ 377 (અકુદરતી કૃત્યો) અને 34 (જેવા ઉદ્દેશ્ય) અને જાતીય અપરાધોથી બાળકોની સુરક્ષા (POCSO) હેઠળ કેસ નોંધવામાં આવ્યો છે. પોલીસે જણાવ્યું કે પીડિત હજુ પણ તબીબી નિરીક્ષણ હેઠળ છે. ડીસીડબ્લ્યુએ 28 સપ્ટેમ્બર સુધીમાં ધરપકડ કરાયેલા આરોપીઓની વિગતો અને કેસમાં નોંધાયેલી એફઆઈઆરની નકલ સાથે લેવામાં આવેલી કાર્યવાહીનો વિગતવાર અહેવાલ માંગ્યો છે.
બેની ધરપકડ, ત્રીજા આરોપીની શોધખોળ
પોલીસ અધિકારીઓએ જણાવ્યું હતું કે બે આરોપીઓને પકડીને જુવેનાઇલ જસ્ટિસ બોર્ડ સમક્ષ રજૂ કરવામાં આવ્યા છે અને ત્રીજા છોકરાની શોધખોળ ચાલુ છે. પીડિત અને આરોપી પાડોશીઓ છે અને તેઓ બધા 10-12 વર્ષની વય જૂથના છે. પોલીસે જણાવ્યું કે તેઓ એક જ સમુદાયના છે.
