પર્થ ટેસ્ટઃ જયસ્વાલે સિક્સ મારી પૂરી કરી સદી, આ મામલે ગાવસ્કરની ક્લબમાં થયો સામેલ
Border Gavaskar Trophy: ભારત અને ઓસ્ટ્રેલિયા વચ્ચે બોર્ડર ગાવસ્કર ટ્રોફીની 5 મેચની ટેસ્ટ શ્રેણીની પ્રથમ મેચ પર્થમાં રમાઈ રહી છે. આ મેચમાં યશસ્વી જયસ્વાલે ભારતની બીજી ઇનિંગમાં સદી ફટકારી હતી. આ તેની ટેસ્ટ કારકિર્દીની ચોથી સદી હતી. તેણે જોશ હેઝલવુડની બોલ પર સિક્સર ફટકારીને પોતાની સદી પૂરી કરી હતી. આ સાથે તેણે ઘણા રેકોર્ડ પોતાના નામે કર્યા.
ઓસ્ટ્રેલિયામાં ડેબ્યૂ ટેસ્ટમાં સદી ફટકારનારો ત્રીજે બેટ્સમેન
પર્થ ટેસ્ટના પ્રથમ દાવમાં યશસ્વી પોતાનું ખાતું ખોલાવી શક્યો નહોતો. આ પછી બીજા દાવમાં તેણે જબરદસ્ત વાપસી કરી અને પોતાની કુદરતી રમતથી વિપરીત રમતા સદી ફટકારી. ઓસ્ટ્રેલિયામાં પોતાની ડેબ્યૂ ટેસ્ટમાં સદી ફટકારનાર તે માત્ર ત્રીજો ભારતીય બન્યો હતો. યશસ્વી પહેલા સુનીલ ગાવસ્કર અને એમ જયસિમ્હાએ ઓસ્ટ્રેલિયામાં પોતાની પ્રથમ ટેસ્ટમાં સદી ફટકારી હતી. યશસ્વી પ્રથમ દાવમાં ખાતું પણ ખોલાવી શક્યો નહોતો. જયસિમ્હાએ 1967-68ના ઓસ્ટ્રેલિયા પ્રવાસ પર આ કર્યું હતું અને ગાવસ્કરે 1977માં આ કર્યું હતું. એટલે કે યશસ્વી 46 વર્ષમાં પ્રથમ ભારતીય બેટ્સમેન છે જેણે ઓસ્ટ્રેલિયામાં પોતાની પ્રથમ ટેસ્ટમાં સદી ફટકારી છે. યોગાનુયોગ, આ ત્રણેય સદી ભારતની બીજી ઇનિંગમાં આવી હતી.
💯 reasons (and counting) to celebrate for Yashasvi Jaiswal 😍#WTC25 | Follow #AUSvIND live ➡ https://t.co/Q8tuHTDzKU pic.twitter.com/rXV3dB84bc
— ICC (@ICC) November 24, 2024
આ રેકોર્ડ્સ પણ બનાવ્યા
યશસ્વી પ્રથમ એશિયન બેટ્સમેન છે જેણે પ્રથમ 15 ટેસ્ટમાં 1500 રન બનાવ્યા છે. તે ચેતેશ્વર પૂજારા પછી સૌથી ઝડપી 1500 ટેસ્ટ રન બનાવનાર બીજા ભારતીય છે. યશસ્વીએ 28 ઇનિંગ્સમાં આ કર્યું છે. તે ઓસ્ટ્રેલિયામાં સદી ફટકારનાર બીજો સૌથી યુવા ભારતીય ઓપનર પણ છે. યશસ્વીએ 22 વર્ષ અને 330 દિવસની ઉંમરે આ કર્યું. આ સાથે તેણે વધુ એક રેકોર્ડ પણ બનાવ્યો. 23 વર્ષની ઉંમર પહેલા ટેસ્ટમાં સૌથી વધુ સદી ફટકારનાર ભારતીયોમાં યશસ્વી સંયુક્ત રીતે ત્રીજા સ્થાને છે. યશસ્વીના નામે ચાર ટેસ્ટ સદીઓ છે અને ગાવસ્કર અને વિનોદ કાંબલીએ પણ 23 વર્ષના થયા પહેલા ચાર ટેસ્ટ સદી ફટકારી છે. આ યાદીમાં સચિન તેંડુલકર આઠ સદી સાથે પ્રથમ અને રવિ શાસ્ત્રી પાંચ સદી સાથે બીજા સ્થાને છે.
યશસ્વી 23 વર્ષની ઉંમર પહેલા એક કેલેન્ડર વર્ષમાં સૌથી વધુ સદી ફટકારવાના મામલે સંયુક્ત રીતે બીજા ક્રમે છે. તેણે આ વર્ષે એટલે કે 2024માં ટેસ્ટમાં ત્રણ સદી ફટકારી છે. રવિ શાસ્ત્રીએ 1984માં અને સચિન તેંડુલકરે 1992માં ત્રણ-ત્રણ સદી ફટકારી હતી. સુનીલ ગાવસ્કર અને વિનોદ કાંબલી આ યાદીમાં ટોચ પર છે. ગાવસ્કરે 1971માં અને કાંબલીએ 1993માં ચાર-ચાર સદી ફટકારી હતી. એટલું જ નહીં યશસ્વી 10 જાન્યુઆરી 2015 પછી ઓસ્ટ્રેલિયામાં ટેસ્ટ સદી ફટકારનાર પ્રથમ ભારતીય ઓપનર છે. અગાઉ 2015માં કેએલ રાહુલે સિડની ટેસ્ટમાં ઓપનર તરીકે સદી ફટકારી હતી. ત્યારબાદ તેણે 110 રનની ઇનિંગ રમી હતી. રાહુલે આ ટેસ્ટમાં સારી શરૂઆત કરી હતી, પરંતુ 77 રન બનાવીને પેવેલિયન પરત ફર્યો હતો. તેણે યશસ્વી સાથે 201 રનની ભાગીદારી કરી હતી.
આ પણ વાંચોઃ યશસ્વી જયસ્વાલે પર્થ ટેસ્ટમાં બનાવ્યો વર્લ્ડ રેકોર્ડ, ઓસ્ટ્રેલિયા સામે કર્યું મોટું કારનામું
