ભારતમાં આજથી એટલે કે 15 જુલાઈથી કોરોનાનો બૂસ્ટર ડોઝ મફતમાં આપવાનું શરૂ થઈ ગયું છે. આ અગાઉ ત્રીજા ડોઝ માટે લોકોને પૈસા ખર્ચવા પડતા હતા, પરંતુ આઝાદીના અમૃત મહોત્સવના અવસર પર PM મોદી સરકારે આગામી 75 દિવસ સુધી મફતમાં આપવાની જાહેરાત કરી છે.
#LargestVaccineDrive#Unite2FightCorona#AmritMahotsav pic.twitter.com/6PDV04UPRu
— Ministry of Health (@MoHFW_INDIA) July 14, 2022
દેશમાં કોરોનાનું સંકટ
ઉલ્લેખનીય છે કે દેશમાં કોરોના મહામારીનો પ્રકોપ હજુ સમાપ્ત થયો નથી. દરરોજ 15 હજારથી વધુ નવા કેસ સામે આવી રહ્યા છે અને મૃત્યુઆંક પણ વધી રહ્યો છે. આને ધ્યાનમાં રાખીને, કેન્દ્ર સરકારે 15થી 59 વર્ષ સુધીના તમામ પુખ્ત વયના લોકોને બૂસ્ટર ડોઝ આપવાનો નિર્ણય કર્યો છે. આ નિર્ણય પીએમ મોદીની અધ્યક્ષતામાં કેબિનેટની બેઠકમાં લેવામાં આવ્યો હતો. જે બાદ પીએમ મોદીએ પોતે ટ્વીટ કરીને કહ્યું હતું કે રસી એ કોરોના સામેની લડાઈ છે. આ નિર્ણય ભારતની રસીકરણ અભિયાનને આગળ વધારવા માટે કામ કરશે.
રસીકરણને ઝડપ મળશે
સરકારના આ નિર્ણય બાદ દેશની તમામ સરકારી હોસ્પિટલોમાં કોરોનાની રસી મફતમાં લગાવી શકાશે. સરકાર દ્વારા પણ આ પગલું એટલા માટે લેવામાં આવ્યું છે કારણ કે, કોરોનાની પ્રથમ અને બીજી રસીના ડોઝ માટે લોકોમાં જેવો ઉત્સાહ હતો તેટલો જ બૂસ્ટર ડોઝને લઈને જોવા મળ્યો ન હતો. અત્યાર સુધીમાં, 18-59 વર્ષની લક્ષિત 77 કરોડ વસ્તીમાંથી એક ટકાથી પણ ઓછા લોકોને બૂસ્ટર ડોઝ મળ્યો છે.
199 કરોડથી વધુ ડોઝ આપવામાં આવ્યા
દેશમાં અત્યાર સુધીમાં રસીના 199 કરોડથી વધુ ડોઝ આપવામાં આવ્યા છે. જેમાં ત્રીજા એટલે કે પ્રિકોશન ડોઝની સંખ્યા લગભગ 5 કરોડ છે. જો કે આ નિર્ણય બાદ હવે એવી અપેક્ષા છે કે આગામી થોડા દિવસોમાં આ આંકડો ઝડપથી વધી જશે. ઉલ્લેખનીય છે કે 18-59 વર્ષની વય જૂથના લોકો માટે પ્રિકોશન ડોઝ આ વર્ષે 10 એપ્રિલના રોજ શરૂ થયા હતા.
