અરશદ વારસીના નિવેદન પર ભડક્યા બોની કપૂર, કહ્યું- ‘તે કોઈ મોટા સ્ટાર નહોતા’

• અભિનેતા અરશદ વારસી આ દિવસોમાં પોતાના નિવેદનને ખૂબ ચર્ચામાં છે

મુંબઈ, 23 ઓગસ્ટ: અભિનેતા અરશદ વારસી આ દિવસોમાં પોતાના નિવેદનને ખૂબ ચર્ચામાં છે. જ્યારથી તેમણે ‘કલ્કી 2898 AD’માં પ્રભાસના પાત્રને જોકર કહ્યો ત્યારથી તે વિવાદોમાં છે. અરશદ વારસીના ઘણા નિવેદનો સોશિયલ મીડિયા પર ઝડપથી વાયરલ થઈ રહ્યા છે, જેને સાંભળીને કોઈ પણ આશ્ચર્યચકિત થઈ જશે. આ બધાની વચ્ચે, અભિનેતાનો આ ઇન્ટરવ્યુ ખૂબ ચર્ચામાં છે, જેમાં અરશદે આરોપ લગાવ્યો કે, બોની કપૂર દ્વારા નિર્મિત 1993માં આવેલી ફિલ્મ ‘રૂપ કી રાની ચોરોં કા રાજા’માં કોરિયોગ્રાફી માટે તેને ઓછો પગાર મળ્યો હતો. તેણે દાવો કર્યો કે, ચાર દિવસના શૂટિંગ માટે તેમને વચનની રકમ કરતાં 25,000 રૂપિયા ઓછા મળ્યા હતા.

બોની કપૂર અરશદ વારસી પર ગુસ્સે થયા

અરશદ વારસીના નિવેદન પર નિર્માતા બોની કપૂરે પ્રતિક્રિયા આપી છે. એક ઈન્ટરવ્યુમાં બોની કપૂરે કહ્યું કે, “અરશદ વારસીએ જે કહ્યું તે સાંભળીને મને હસવું આવે છે. ફિલ્મનું શૂટિંગ 1992માં શરૂ થયું હતું અને તે સમયે અરશદ વારસી સ્ટાર નહોતો. કોરિયોગ્રાફી ચાર દિવસમાં પૂર્ણ કરવાની હતી, પરંતુ ગીત નિર્દેશક પંકજ પારાશરે તેને ત્રણ દિવસમાં પૂર્ણ કર્યું, જેના માટે અરશદને ત્રણ દિવસ માટે દરરોજના 25,000 રૂપિયાના દરે 75,000 રૂપિયા ચૂકવવામાં આવ્યા.” બહુ ઓછા લોકો જાણે છે કે બોનીએ અરશદ સાથે ટીવી શોમાં પણ કામ કર્યું છે અને નિર્માતાએ કહ્યું કે, અભિનેતાએ તેની સાથે ક્યારેય આ બાબતે ચર્ચા નથી કરી. હવે દરેક વ્યક્તિ મીડિયાનું ધ્યાન પોતાની તરફ ખેંચવા ઈચ્છે છે.’

શું છે સમગ્ર મામલો?

સમદીશ ભાટિયા સાથેની એક મુલાકાતમાં અરશદ વારસીએ દાવો કર્યો હતો કે ‘રૂપ કી રાની ચોરોં કા રાજા’માં તેના કામ માટે તેમને ઓછો પગાર મળ્યો હતો. અભિનેતાએ કહ્યું હતું કે, ‘પ્રોડક્શનના લોકોએ મને ગીત ઝડપથી પૂરું કરવાનું કહ્યું હતું, કારણ કે ચાર દિવસના શૂટિંગમાં ખર્ચ વધી ગયો હોત. અમે ગીતને પૂર્ણ કરવા માટે ખૂબ જ મહેનત કરી હતી, પરંતુ અમે તેને ત્રણ દિવસમાં પૂર્ણ કરી લીધું હતું. મેં વિચાર્યું કે પ્રોડક્શન લોકો ખુશ થશે. હું મારો ચેક લેવા ગયો અને તેઓએ મને 75,000 રૂપિયા આપ્યા. મેં કહ્યું કે, ‘મેં તમારો શૂટિંગનો આખો દિવસ બચાવ્યો છે, તમારે મને વધુ પૈસા ચૂકવવા જોઈએ!’ તેમણે કહ્યું કે, ‘ના, ચાર દિવસ માટે 1 લાખ રૂપિયા અને ત્રણ દિવસ માટે 75,000 રૂપિયા છે.’

આ પણ જૂઓ: OTT પર કલ્કિ 2898 AD જોયા બાદ લોકોએ કર્યો અરશદને સપોર્ટ, પ્રભાસને કહ્યો જોકર