બોમ્બે હાઈકોર્ટે મુંબઈ-અમદાવાદ બુલેટ ટ્રેન પ્રોજેક્ટ માટે મુંબઈના વિક્રોલી વિસ્તારમાં મહારાષ્ટ્ર સરકાર અને NHSRCL દ્વારા શરૂ કરાયેલ જમીન સંપાદન સામે ગોદરેજ એન્ડ બોયસની અરજીને ફગાવી દીધી હતી. કોર્ટે કહ્યું કે મુંબઈ-અમદાવાદ બુલેટ ટ્રેન આ દેશમાં રાષ્ટ્રીય મહત્વનો અને જનહિતમાં ડ્રીમ પ્રોજેક્ટ છે.
જસ્ટિસ આરડી ધાનુકા અને જસ્ટિસ એમએમ સથાયેની ડિવિઝન બેન્ચે જણાવ્યું હતું કે આ પ્રોજેક્ટ પોતાનામાં અનોખો છે અને ખાનગી હિત કરતાં જાહેર હિતને પ્રાધાન્ય આપવામાં આવશે.
પ્રોજેક્ટમાં ક્યાં અટવાયેલો છે?
મુંબઈ અને અમદાવાદ વચ્ચેના કુલ 508.17 કિમીના રેલ ટ્રેકમાંથી 21 કિમી અંડરગ્રાઉન્ડ હશે. ભૂગર્ભ ટનલનો એક પ્રવેશ બિંદુ વિક્રોલી ખાતે ગોદરેજની જમીન પર પડે છે. રાજ્ય સરકાર અને નેશનલ હાઈ સ્પીડ રેલ કોર્પોરેશન લિમિટેડ (NHSRCL)એ દાવો કર્યો હતો કે કંપનીના કારણે સમગ્ર પ્રોજેક્ટમાં વિલંબ થઈ રહ્યો હતો, જ્યારે પ્રોજેક્ટ લોકો માટે મહત્વપૂર્ણ હતો.
સરકારે હાઈકોર્ટને જણાવ્યું હતું કે ગોદરેજ એન્ડ બોયસ મેન્યુફેક્ચરિંગ કંપની લિમિટેડના વિક્રોલી ક્ષેત્ર સ્થિત વિસ્તાર સિવાય પ્રોજેક્ટના સમગ્ર રૂટ માટે સંપાદનની પ્રક્રિયા પૂર્ણ થઈ ગઈ છે.
રાજ્ય સરકારે ઓક્ટોબરમાં 264 કરોડનું વળતર આપ્યું
રાજ્ય સરકારે અગાઉ કોર્ટને કહ્યું હતું કે તે ગયા વર્ષે ઓક્ટોબરમાં કંપનીને વળતર તરીકે રૂ. 264 કરોડ ચૂકવી ચૂકી છે. ગોદરેજ એન્ડ બોયસે તેને વળતર આપવા માટે મહારાષ્ટ્ર સરકાર દ્વારા 15 સપ્ટેમ્બર, 2022ના રોજ આપવામાં આવેલા આદેશને પડકારતી અરજી દાખલ કરી હતી.
કોર્ટે ગોદરેજની દલીલ સ્વીકારવાનો પણ ઇનકાર કર્યો હતો કે શરૂઆતમાં વળતર રૂ. 572 કરોડ નક્કી કરવામાં આવ્યું હતું પરંતુ જ્યારે અંતિમ ફેંસલો સંભળાવવામાં આવ્યો ત્યારે તે ઘટાડીને રૂ. 264 કરોડ કરવામાં આવ્યો હતો. મહત્વનું છે કે બુલેટ ટ્રેન પ્રોજેક્ટમાં અધિગ્રહણ કેસને લઈને કંપની અને સરકાર 2019થી કાનૂની વિવાદમાં ફસાયેલી છે.
