ICC ટેસ્ટ રેન્કિંગમાં ભારતને ફટકો : બુમરાહને પછાડી આ બોલર બન્યો નંબર 1, કોહલી-પંતને પણ નુકશાની

મુંબઈ, 30 ઓક્ટોબર : ઇન્ટરનેશનલ ક્રિકેટ કાઉન્સિલ (ICC) એ બુધવારે (30 ઓક્ટોબર) ના રોજ પુરુષોના ટેસ્ટ ખેલાડીઓની નવીનતમ રેન્કિંગ જાહેર કરી છે. જેમાં ભારતીય ફાસ્ટ બોલર જસપ્રીત બુમરાહને મોટો ફટકો પડ્યો છે. સાઉથ આફ્રિકાના ફાસ્ટ બોલર કાગીસો રબાડા બુમરાહને હરાવીને બોલિંગ રેન્કિંગમાં ટોપ પર પહોંચી ગયો છે. વર્તમાન વર્લ્ડ ટેસ્ટ ચેમ્પિયનશિપ (WTC) દરમિયાન શાનદાર ફોર્મમાં રહેલા જમણા હાથના બોલર રબાડાએ તાજેતરમાં જ મીરપુરમાં બાંગ્લાદેશ સામેની પ્રથમ ટેસ્ટમાં 9 વિકેટ લઈને આ ફોર્મેટમાં પોતાની 300 વિકેટ પૂરી કરી હતી. મીરપુરમાં રમાયેલી આ મેચમાં દક્ષિણ આફ્રિકાએ 9 વિકેટે જીત મેળવી હતી.

બુમરાહને બે સ્થાનનું નુકસાન થયું છે

પુણેમાં ન્યુઝીલેન્ડ સામે રમાયેલી બીજી ટેસ્ટ મેચમાં બુમરાહ એક પણ વિકેટ લઈ શક્યો નહોતો. તે બે સ્થાન સરકીને ત્રીજા સ્થાને પહોંચી ગયો છે. ઓસ્ટ્રેલિયાના જોશ હેઝલવુડ બીજા સ્થાને છે. ભારતનો અનુભવી ઓફ સ્પિનર ​​રવિચંદ્રન અશ્વિન પણ બે સ્થાનના નુકસાન સાથે ચોથા સ્થાને સરકી ગયો છે. ઓસ્ટ્રેલિયાના કેપ્ટન પેટ કમિન્સનો પણ ટોપ પાંચ બોલરોમાં સમાવેશ થાય છે.

તાજેતરમાં રાવલપિંડીમાં ઈંગ્લેન્ડ સામેની ત્રીજી અને અંતિમ ટેસ્ટમાં શાનદાર બોલિંગ કરનાર પાકિસ્તાનનો સ્પિનર ​​નોમાન અલી ટોપ 10માં નવો સભ્ય છે. ભારત સામેની ઐતિહાસિક શ્રેણી જીત દરમિયાન ન્યૂઝીલેન્ડના હીરો તરીકે ઉભરી આવેલા મિશેલ સેન્ટનરનું સ્થાન આગળ વધ્યું છે. તેના રેન્કિંગમાં 30મા સ્થાન સુધીનો ફેર પડ્યો છે. પૂણે ટેસ્ટમાં 13 વિકેટ લેનારો આ ડાબોડી સ્પિનરે રેન્કિંગમાં 44મા સ્થાને પહોંચી ગયો છે.

કોહલી અને પંતને પણ રેન્કિંગમાં નુકસાન થયું છે

ઓપનર યશસ્વી જયસ્વાલને પણ બેટ્સમેનોની રેન્કિંગમાં ફાયદો થયો છે. પુણેમાં ન્યુઝીલેન્ડ સામે 30 અને 77 રનનું યોગદાન આપનાર યશસ્વી એક સ્થાન આગળ વધીને ત્રીજા સ્થાને છે. તે આ ફોર્મેટમાં ભારતના ટોચના ક્રમાંકિત બેટ્સમેન છે. જ્યારે કે, વિસ્ફોટક વિકેટકીપર-બેટ્સમેન ઋષભ પંત અને વિરાટ કોહલીની બેટિંગ રેન્કિંગમાં ઘટાડો થયો છે. બંનેને બમ્પર નુકસાન થયું છે. પંત 5 સ્થાન ઘટીને 11મા સ્થાને પહોંચી ગયો છે. જ્યારે કોહલી 6 સ્થાન નીચે 14માં સ્થાને આવી ગયો છે.

આ ખેલાડીઓને બમ્પર લાભ મળ્યો

આ રેન્કિંગમાં ન્યુઝીલેન્ડના ડેવોન કોનવે (8 સ્થાન ઉપરથી 28માં સ્થાને), ટોમ લાથમ (6 સ્થાન ઉપરથી 34મા ક્રમે) અને ગ્લેન ફિલિપ્સ (16 સ્થાન ઉપરથી 45મા ક્રમે) અને દક્ષિણ આફ્રિકાના કાયલ વેરેને (14 સ્થાન ઉપરથી 32મા ક્રમે)એ નોંધપાત્ર ફાયદો કર્યો છે. ટેસ્ટ ઓલરાઉન્ડરોની યાદીમાં ભારતીય રવીન્દ્ર જાડેજા (નંબર વન) અને અશ્વિન (નંબર બે)નો કબજો છે. બંનેએ રેન્કિંગમાં સારી પ્રગતિ કરી છે. બાંગ્લાદેશનો સ્ટાર મેહદી હસન બે સ્થાનનો ફાયદો ઉઠાવીને ત્રીજા સ્થાને પહોંચી ગયો છે. તેણે દક્ષિણ આફ્રિકા સામે બેટ અને બોલથી શાનદાર પ્રદર્શન કર્યું હતું.

આ પણ વાંચો :- મહારાષ્ટ્ર : આ વખતે ભાજપના CM હશે, ’29 માં MNS સત્તા ઉપર આવશે, જાણો કોણે કરી આ ભવિષ્યવાણી