ગુજરાતમાં વિધાનસભાની ચૂંટણી હવે નજીક છે. મતદારોને રીઝવવા માટે તમામ પાર્ટીઓ અલગ-અલગ રણનીતિઓ પર કામ કરી રહી છે. ગુજરાતમાં 27 વર્ષથી સત્તા પર રહેલી ભારતીય જનતા પાર્ટી (BJP) એક તરફ પોતાના મુખ્ય મતદારોને એકજૂટ રાખવાનો પ્રયાસ કરી રહી છે તો બીજી તરફ લઘુમતી મતદારોને પણ પોતાના પક્ષમાં લાવવાની રણનીતિ પર કામ કરી રહી છે. મુસ્લિમોને જોડવા માટે ભાજપ લઘુમતી મોરચાએ તમામ વિધાનસભા મતવિસ્તારોમાં ઓછામાં ઓછા 100 ‘લઘુમતી મિત્ર’ બનાવ્યા છે જ્યાં મુસ્લિમોની વસ્તી વધુ છે. પાર્ટીના લઘુમતી સેલના વડા જમાલ સિદ્દીકીએ રવિવારે કહ્યું કે લઘુમતી સમુદાયના લોકોને, ખાસ કરીને મુસ્લિમ સમુદાયના લોકોને પણ બૂથ કીટીમાં રાખવામાં આવશે.
સિદ્દીકીએ કહ્યું, “ભાજપ લઘુમતી સેલે ઓછામાં ઓછા 100 એવા મુસ્લિમોને સામેલ કરવા માટે એક અભિયાન શરૂ કર્યું છે જેઓ બિન-રાજકીય પૃષ્ઠભૂમિના છે અને પાર્ટી પ્રત્યે સહાનુભૂતિ ધરાવે છે. તેઓ ધાર્મિક ગુરુ, વ્યાવસાયિક અથવા ઉદ્યોગસાહસિક હોઈ શકે છે.” તેમણે કહ્યું કે આવા તમામ લઘુમતી મિત્રોને ભાજપ માટે લગભગ 50માંથી 50 મુસ્લિમ મતો સુનિશ્ચિત કરવાની જવાબદારી આપવામાં આવશે.
સિદ્દીકીએ વધુમાં કહ્યું કે લઘુમતી સેલને તમામ 125 વિધાનસભા બેઠકો પર બૂથ કમિટીમાં સામેલ કરવામાં આવશે જ્યાં મુસ્લિમોની વસ્તી 25 હજારથી લઈને 1 લાખ મતદારો છે. મુસ્લિમોને એક કરવાની ભાજપની ઝુંબેશ એવા સમયે આવી છે જ્યારે ભાજપ સરકાર 2002ના ગુજરાત રમખાણો દરમિયાન ગેંગરેપનો ભોગ બનેલી બિલ્કીસ બાનોના દોષિતોને મુક્ત કરવા માટે વિપક્ષના નિશાના પર છે. આ અંગેના પ્રશ્નના જવાબમાં સિદ્દીકીએ પોતાની પાર્ટીની સરકારનો બચાવ કરતા કહ્યું કે હાઈકોર્ટના નિર્દેશ પર એક કમિટીની રચના કરવામાં આવી હતી, જેણે મુક્ત કરવાનો આદેશ આપ્યો હતો.
2002ના રમખાણો અંગે સિદ્દીકી કહે છે કે આ એક દુર્ભાગ્યપૂર્ણ ઘટના હતી અને લોકો હવે આગળ વધી ગયા છે. “2002 માં રમખાણો થયા હતા, તે દુર્ભાગ્યપૂર્ણ હતું. આ હવે ઇતિહાસ છે, લોકો આગળ વધ્યા છે. લોકોએ જોયું છે કે પીએમ નરેન્દ્ર મોદી જાતિ કે ધર્મના આધારે ભેદભાવ નથી કરતા. ધાર્મિક આસ્થાને ધ્યાનમાં લીધા વિના દરેકને સરકારી યોજનાઓનો લાભ મળ્યો છે. 2011ની વસ્તી ગણતરી મુજબ, મુસ્લિમો ગુજરાતમાં સૌથી મોટો લઘુમતી સમુદાય છે, જે વસ્તીના 9.65 ટકા હિસ્સો ધરાવે છે. જો કે, 2017ની વિધાનસભા ચૂંટણીમાં માત્ર 3 મુસ્લિમ ઉમેદવારો જીતી શક્યા હતા, જે તમામ કોંગ્રેસના હતા. કોંગ્રેસે 5 મુસ્લિમ ઉમેદવારોને ટિકિટ આપી હતી. ભાજપે પોતાના ઉમેદવાર તરીકે કોઈ મુસ્લિમને મેદાનમાં ઉતાર્યા નથી.
આ પણ વાંચો : શેરબજારમાં તેજી, સેન્સેક્સ 59900 ની ઉપર ખુલ્યો, નિફ્ટી 17900 ની નજીક
