ભાજપની મુખ્ય સહયોગી પાર્ટીએ જ કર્યો UCCનો વિરોધ!

પૂર્વોત્તરમાં ભાજપની મુખ્ય સહયોગીઓમાંના એક નેશનલ પીપલ્સ પાર્ટીના વડા અને મેઘાલયના મુખ્ય પ્રધાન કોનરાડ સંગમાએ યુનિફોર્મ સિવિલ કોડ (UCC)નો વિરોધ કર્યો છે. તેમણે શુક્રવારે (30 જૂન) કહ્યું કે સમાન નાગરિક સંહિતા (UCC)ભારતના વાસ્તવિક વિચારની વિરુદ્ધ છે. ભારત એક વિવિધતાઓથી ભરેલો દેશ છે અને વિવિધતા આપણી તાકાત છે. એક રાજકીય પક્ષ તરીકે, અમે સમજીએ છીએ કે સમગ્ર પૂર્વોત્તરની એક અનોખી સંસ્કૃતિ છે અને અમે તેને જાળવી રાખવા માંગીએ છીએ.

ભાજપે કોનરાડ સંગમાની પાર્ટીને ટેકો આપ્યો હતો

NPP ચીફે કહ્યું કે UCC ડ્રાફ્ટની વાસ્તવિક સામગ્રી જોયા વિના ડિટેલમાં જવું મુશ્કેલ બનશે. તેમણે કહ્યું કે અલબત્ત અમને ખબર નથી કે જો તે આવશે તો કેવા પ્રકારનું બિલ આવશે. ભાજપે કોનરાડ સંગમાની નેશનલ પીપલ્સ પાર્ટીને મેઘાલયમાં સરકાર બનાવવા માટે ટેકો આપ્યો હતો. NPP ભાજપના નેતૃત્વ હેઠળના નેશનલ ડેમોક્રેટિક એલાયન્સ (NDA)નો ભાગ છે. મહત્વનું છે કે મેઘાલયની 60 સીટોવાળી વિધાનસભામાં ભાજપ પાસે બે ધારાસભ્યો છે, જ્યારે સંગમાની પાર્ટી પાસે 28 ધારાસભ્યો છે.

કેટલાક વિરોધ પક્ષો UCCના સમર્થનમાં તો કેટલાક વિરોધમાં

વડાપ્રધાન નરેન્દ્ર મોદી દ્વારા તાજેતરમાં યુનિફોર્મ સિવિલ કોડની હિમાયત બાદ સમગ્ર દેશમાં આ મુદ્દે ચર્ચા શરૂ થઈ છે. યુસીસીને જરૂરી ગણાવતા પીએમ મોદીએ વિપક્ષી પાર્ટીઓ પર નિશાન સાધ્યું. તમામ વિરોધ પક્ષો પણ આ મુદ્દે એકમત નથી. જ્યારે ઘણા પક્ષો ખુલ્લેઆમ UCCનો વિરોધ કરી રહ્યા છે, ત્યારે શિવસેના અને આમ આદમી પાર્ટીએ આ મુદ્દે પોતાના સમર્થનના સંકેત આપ્યા છે.

UCC બિલ મોદી સરકાર ચોમાસુ સત્રમાં રજૂ કરી શકે છે

દરમિયાન, જોકે આ બિલ માટે સંસદીય સ્થાયી સમિતિએ કાયદા પંચ દ્વારા જારી કરાયેલી તાજેતરની નોટિસ પર કાયદા પંચ અને કાયદા મંત્રાલયના પ્રતિનિધિઓને 3 જુલાઈના રોજ બોલાવ્યા છે, જેથી આ મુદ્દા પર વિવિધ હિતધારકોના મંતવ્યો લેવામાં આવે. ચર્ચા છે કે કેન્દ્ર સરકાર સંસદના ચોમાસુ સત્રમાં સમાન નાગરિક સંહિતા (UCC)લાગુ કરવા પર બિલ રજૂ કરી શકે છે.

આ પણ વાંચો:UCC મુદ્દે ઓવૈસીએ મોદી સરકાર અને કોંગ્રેસ પર કર્યા પ્રહાર, ‘OBC હિંદુ કરતાં પણ વધુ ગરીબ’