HD ન્યૂઝ ડેસ્કઃ બીજેપી સાંસદ અને અભિનેતા સની દેઓલે એક મીડિયા સાથેની વાતચીત દરમિયાન કહ્યું કે તે 2024માં લોકસભા ચૂંટણી નહીં લડે. તેણે કહ્યું કે એક્ટર રહેવું મારી પસંદગી છે. મને લાગે છે કે મારે એક અભિનેતા તરીકે દેશની સેવા કરવી જોઈએ, જે હું કરી રહ્યો છું. તેણે કહ્યું કે તમે એક જ કામ કરી શકો. એક સાથે ઘણી વસ્તુઓ કરવી અશક્ય છે. જે વિચારસરણી સાથે હું રાજકારણમાં આવ્યો છું, તે તમામ બાબતો હું અભિનેતા હોવા છતાં કરી શકું છું.
સનીએ શું કહ્યુંઃ સનીએ કહ્યું કે હું અભિનયની દુનિયામાં મારું મન જે ઈચ્છે તે કરી શકું છું. પરંતુ જો હું રાજનીતિમાં કંઈક કટિબદ્ધ છું અને તેને પૂર્ણ કરી શકતો નથી, તો તે હું સહન કરી શકતો નથી. હું તે ના કરી શકું. સાંસદ તરીકે સની દેઓલની લોકસભામાં માત્ર 19 ટકા હાજરી છે, આ અંગે સાંસદે કહ્યું કે જ્યારે હું સંસદમાં જાઉં છું ત્યારે જોઉં છું કે દેશ ચલાવનારા લોકો અહીં બેઠા છે, તમામ પક્ષોના નેતાઓ બેઠા છે. પરંતુ જ્યારે આપણે અન્ય લોકોને આવું વર્તન ન કરવાનું કહીએ ત્યારે આપણે અહીં કેવું વર્તન કરીએ છીએ. તેણે કહ્યું કે જ્યારે હું આ જોઉં છું ત્યારે લાગે છે કે હું આવો નથી, હું બીજે ક્યાંક જાઉં તે સારું છે. એમ પણ કહ્યું કે હું હવે કોઈ ચૂંટણી લડવા માંગતો નથી.
મોટી જીતના આશીર્વાદઃ ફિલ્મ અભિનેતા સની દેઓલે વર્ષ 2019માં પોતાની રાજકીય સફર શરૂ કરી હતી, સનીએ વર્ષ 2019ની સામાન્ય ચૂંટણીમાં પંજાબની ગુરદાસપુર લોકસભા બેઠક પરથી પોતાનું નસીબ અજમાવ્યું હતું અને જનતાએ પણ તેમને નિરાશ કર્યા ન હતા. ગુરદાસપુરના લોકોએ સની દેઓલને 84 હજારથી વધુ મતોના માર્જીનથી મોટી જીતના આશીર્વાદ આપ્યા બાદ લોકસભામાં મોકલ્યા હતા.
મોટા મોટા વચનો: સની દેઓલે ચૂંટણી પ્રચાર દરમિયાન લોકસભા મતવિસ્તારના લોકોને મોટા મોટા વચનો પણ આપ્યા હતા, પરંતુ વચનો પૂરા કરવાનું તો દૂર, જીત પછી તેઓ ગુરદાસપુર ગયા પણ નહીં. જેને લઈને લોકોમાં રોષ વધી રહ્યો છે. વિરોધીઓએ પણ સની દેઓલની મતવિસ્તારમાંથી સતત ગેરહાજરી અને લોકસભામાં પણ ગેરહાજરીનો મુદ્દો બનાવવાનું શરૂ કરી દીધું છે. ભૂતકાળમાં ગુરદાસપુરમાં પણ લોકોએ તેમના વિરુદ્ધ પ્રદર્શન કર્યું હતું.
ઓમ બિરલાને પત્રઃ ગુદાસપુરના મહોલ્લા સંત નગરના લોકોએ ફેબ્રુઆરી મહિનામાં લોકસભા સ્પીકર ઓમ બિરલાને પત્ર લખીને સની દેઓલની સદસ્યતા રદ કરવાની માંગ કરી છે. અમરજોત સિંહે પોતાના પત્રમાં લખ્યું છે કે સની દેઓલ લગભગ ચાર વર્ષથી તેમના લોકસભા મતવિસ્તારમાંથી ગેરહાજર છે. ગુરદાસપુરના લોકોએ તેમને મોટી આશાઓ સાથે ચૂંટ્યા.
ગદર-2 એ ઘણા રેકોર્ડ તોડ્યાઃ તમને જણાવી દઈએ કે આ દિવસોમાં સની દેઓલની ફિલ્મ ગદર-2 કમાણીના મામલે ધમાલ મચાવી રહી છે. ‘પઠાણ’ બાદ હવે ‘ગદર 2’ પણ 500 કરોડનો ટાર્ગેટ પાર કરવા માટે તૈયાર છે. સની દેઓલની ‘ગદર 2’ એ 10 દિવસમાં એવું કારનામું કર્યું છે જેની કોઈએ અપેક્ષા પણ નહીં કરી હોય. 8 દિવસમાં 300 કરોડનો આંકડો પાર કરી ચૂકેલી ‘ગદર 2’ હવે બોલીવુડની સૌથી મોટી ફિલ્મ ‘પઠાણ’ને સીધી ટક્કર આપવા માટે તૈયાર છે.
