મુંબઈ, 1 જુલાઈ : મહારાષ્ટ્ર વિધાન પરિષદની ચૂંટણી માટે ભાજપે પાંચ ઉમેદવારોના નામ જાહેર કર્યા છે. મહત્વની વાત એ છે કે ભાજપે પંકજા મુંડેને વિધાન પરિષદની ચૂંટણી માટે ઉમેદવાર બનાવ્યા છે. પંકજા મુંડે બીડથી લોકસભા ચૂંટણી લડ્યા હતા અને બહુ ઓછા અંતરથી ચૂંટણી હારી ગયા હતા. પંકજાની હાર બાદ તેમના ચાર સમર્થકોએ પણ આત્મહત્યા કરી લીધી હતી. ભાજપે પંકજા મુંડે ઉપરાંત યોગેશ ટિલેકર, પરિણય ફુકે, અમિત ગોરખે અને સદાભાઉ ખોતને ઉમેદવાર તરીકે ઉતાર્યા છે.
12 જુલાઈના મતદાન, ભાજપ પાસે સાત બેઠકોનો ક્વોટા
12 જુલાઈના રોજ મહારાષ્ટ્રની 11 વિધાન પરિષદની બેઠકો પર મતદાન થશે અને પરિણામ પણ તે જ દિવસે જાહેર કરવામાં આવશે. મહારાષ્ટ્ર ભાજપે કેન્દ્રીય નેતૃત્વને 11 નામોની યાદી મોકલી હતી, જેમાંથી ભાજપે પાંચ નામોને મંજૂરી આપી દીધી છે. રાજ્ય વિધાનસભામાં તેની સંખ્યાના આધારે, ભાજપ પાસે આ ચૂંટણીઓમાં સાત બેઠકોનો ક્વોટા છે. એટલે કે ભાજપ 11માંથી 7 સીટો જીતી શકે છે. જ્યારે મહાવિકાસ આઘાડી પાસે લગભગ ત્રણ બેઠકોનો ક્વોટા છે અને મામલો ચોથી બેઠક પર અટકી શકે છે. હવે જોવાનું એ રહે છે કે ભાજપ કેટલા ઉમેદવારોને મેદાનમાં ઉતારે છે. દરેક MLC સીટ માટે જરૂરી મત 23 છે.
4 સમર્થકોએ આત્મહત્યા કરી લીધી છે
લોકસભા ચૂંટણીમાં પંકજા બીડ લોકસભા બેઠક પરથી NCP-SP (રાષ્ટ્રવાદી કોંગ્રેસ પાર્ટી – શરદચંદ્ર પવાર) ના બજરંગ સોનાવણે સામે 6 હજાર મતોથી ચૂંટણી હારી ગયા હતા. 4 જૂને પરિણામ જાહેર થયા બાદથી પંકજા મુંડેના 4 સમર્થકોએ આત્મહત્યા કરી લીધી છે. જ્યારે ગણેશ બડે નામના વ્યક્તિએ આત્મહત્યા કરી ત્યારે પંકજા મૃતકના પરિવારને મળ્યા બાદ પોતાની લાગણીઓ પર કાબૂ રાખી શકી નહીં અને ખૂબ રડી પડી હતી. તેનો વીડિયો પણ સોશિયલ મીડિયા પર વાયરલ થયો હતો.
લોકસભા ચૂંટણીમાં હાર સ્વીકારતી વખતે પાકંજા મુંડેએ કહ્યું હતું કે આ વખતે ચૂંટણીમાં જ્ઞાતિ ધ્રુવીકરણ ઘણું થયું છે. તેમણે કહ્યું કે મારા પિતાના સમયથી અમે જાતિ, સમુદાય કે ધર્મથી આગળ વધીને રાજનીતિ કરી છે. મહત્વની વાત એ છે કે 1996 થી 2019 સુધી બીડ લોકસભા સીટ ભાજપ પાસે હતી. અગાઉ પંકજાના પિતા ગોપીનાથ મુંડે અહીંથી ચૂંટણી જીતતા હતા.
