પટના, 16 જાન્યુઆરી : બિહારમાં નીતીશ સરકાર ગરીબ પરિવારના દરેક સભ્યને 2 લાખ રૂપિયા આપશે. આ પરિવારોની સંખ્યા 94 લાખ 33 હજાર 312 છે. જાતિ આધારિત વસ્તી ગણતરી દરમિયાન તેમનો ડેટા એકત્રિત કરવામાં આવ્યો છે. મુખ્યમંત્રી નીતિશ કુમારે વિધાનસભામાં આ ગરીબ પરિવારોને આર્થિક સહાય આપવાની જાહેરાત કરી હતી, ત્યારબાદ 16 જાન્યુઆરી, મંગળવારે સાંજે કેબિનેટની બેઠકમાં ગરીબ પરિવારોને આર્થિક સહાય આપવાના પ્રસ્તાવને મંજૂરી આપવામાં આવી હતી. ગરીબ પરિવારોના તમામ વર્ગને આનો લાભ મળશે. આ રકમ ત્રણ હપ્તામાં આપવામાં આવશે. એટલે કે પ્રથમ હપ્તામાં 25 ટકા, બીજામાં 50 ટકા અને ત્રીજા હપ્તામાં 25 ટકા રકમ આપવામાં આવશે.
2 લાખ 50 હજાર કરોડ રૂપિયાનો ખર્ચ થશે
ઉલ્લેખનીય છે કે, મુખ્યમંત્રી નીતિશ કુમારે 22 નવેમ્બર 2023ના રોજ વિધાનસભામાં આની જાહેરાત કરી હતી. તેમણે કહ્યું હતું કે જાતિ આધારિત ગણતરીમાં, બિહારમાં તમામ વર્ગો સહિત લગભગ 94 લાખ ગરીબ પરિવારો મળી આવ્યા છે, તે દરેક પરિવારના એક સભ્યને રોજગાર માટે 2 લાખ રૂપિયા સુધીની રકમ હપ્તામાં આપવામાં આવશે. એટલું જ નહીં, મુખ્યમંત્રીએ એમ પણ કહ્યું હતું કે 63,850 ઘરવિહોણા અને ભૂમિહીન પરિવારોને જમીન ખરીદવા માટે આપવામાં આવતી 60 હજાર રૂપિયાની મર્યાદા વધારીને 1 લાખ રૂપિયા કરવામાં આવી છે.
લાઇવલીહુડ સ્કીમ હેઠળ અત્યંત ગરીબ પરિવારોને મદદ
આ ઉપરાંત આ પરિવારોને ઘર બનાવવા માટે 1 લાખ 20 હજાર રૂપિયા આપવામાં આવશે. 39 લાખ પરિવારો કે જેઓ ઝૂંપડીઓમાં રહે છે તેમને પણ કાયમી મકાનો આપવામાં આવશે, જેના માટે પરિવાર દીઠ 1 લાખ 20 હજાર રૂપિયાની રકમ આપવામાં આવશે. સસ્ટેનેબલ લાઇવલીહુડ સ્કીમ હેઠળ હવે અત્યંત ગરીબ પરિવારોને મદદ કરવા માટે રૂ. 1 લાખને બદલે રૂ. 2 લાખ આપવામાં આવશે. આ યોજનાઓના અમલીકરણમાં અંદાજે 2 લાખ 50 હજાર કરોડ રૂપિયાનો ખર્ચ કરવામાં આવશે. આ કામો માટે જંગી રકમની જરૂર હોવાથી 5 વર્ષમાં પૂર્ણ કરવાનો લક્ષ્યાંક રાખવામાં આવ્યો છે.
