કોંગ્રેસ નેતાની હત્યા કેસમાં મોટી સફળતા, એક શખસની ધરપકડ, આરોપીએ પોતાને ગણાવ્યો બોય ફ્રેન્ડ

રોહતક, 3 માર્ચ : હરિયાણાના રોહતકમાં કોંગ્રેસ કાર્યકર હિમાની નરવાલની હત્યા કેસમાં સ્પેશિયલ ઇન્વેસ્ટિગેશન ટીમ (SIT) એ એક આરોપીની અટકાયત કરી છે. સૂત્રોના જણાવ્યા અનુસાર પૂછપરછ દરમિયાન આરોપીએ પોતે હિમાનીનો બોયફ્રેન્ડ હોવાનું ખુલ્યું હતું.  તેણે એવો પણ દાવો કર્યો છે કે તેણે તેના ઘરે જ હિમાનીની હત્યા કરી હતી.

આરોપીના કહેવા પ્રમાણે, હિમાનીની હત્યા કર્યા બાદ તેણે તેની લાશને સૂટકેસમાં મૂકી દીધી હતી. આ સૂટકેસ પણ હિમાનીની હતી. 28 ફેબ્રુઆરીની સવારે તેણે આ સૂટકેસ ઝાડીઓમાં છોડી દીધી હતી. આરોપીએ દાવો કર્યો છે કે તે હિમાની સાથે લાંબા સમયથી સંબંધમાં હતો. જો કે, પોલીસ હજુ પણ આરોપીઓના દાવાઓની તપાસ કરી રહી છે.

શું કહ્યું આરોપીએ?

• આરોપીએ પોતાનો ગુનો કબૂલી લીધો અને પોલીસને જણાવ્યું કે તે હિમાનીનો પ્રેમી છે.
• આરોપી બહાદુરગઢનો રહેવાસી છે.
• પ્રાથમિક તપાસમાં બ્લેકમેઈલીંગની શક્યતા પણ સામે આવી છે.
• આરોપીના કહેવા મુજબ તેણે હિમાનીને ઘણા પૈસા આપ્યા હતા.
• તેણી વારંવાર વધુ પૈસાની માંગણી કરતી હતી. 

કેવી રીતે પકડાયો આરોપી?

તપાસ દરમિયાન પોલીસને સૌથી પહેલા જાણવા મળ્યું કે હિમાનીની નજીક કોણ છે. તેણે છેલ્લે કોની સાથે વાત કરી?  તપાસ દરમિયાન પોલીસને ખબર પડી કે હિમાની આરોપીના સંપર્કમાં હતી. દરેક કડીને જોડીને પોલીસ આરોપીઓ સુધી પહોંચી.

મહત્વનું છે કે હિમાની નરવાલ (22) રોહતકના વિજય નગરમાં રહેતી હતી. શનિવારે, તેનો મૃતદેહ રોહતક જિલ્લામાં એક સૂટકેસની અંદરથી મળી આવ્યો હતો, જેના પર ઈજાના કેટલાક નિશાન હતા. પોલીસ અધિકારીએ જણાવ્યું કે હિમાની (22) રોહતકના વિજય નગરમાં રહેતી હતી. આ સૂટકેસ કેટલાક રાહદારીઓએ જોઈ હતી, જેમણે પોલીસને જાણ કરી હતી. હરિયાણા પોલીસે હત્યા કેસની તપાસ માટે રવિવારે SITની રચના કરી હતી.

ઈર્ષ્યાના લીધે હિમાનીની હત્યા કરાઈ

નરવાલના પરિવારે તેમના મૃતદેહનો અગ્નિસંસ્કાર કરવાનો ઇનકાર કર્યો હતો અને કહ્યું હતું કે જ્યાં સુધી હત્યારાઓની ધરપકડ કરવામાં ન આવે ત્યાં સુધી તેઓ તેમના મૃતદેહનો અંતિમ સંસ્કાર કરશે નહીં. પરિવારના સભ્યોએ એવો પણ આક્ષેપ કર્યો હતો કે નરવાલના ટૂંકા ગાળામાં રાજકીય ઉદયને કારણે કોંગ્રેસના કેટલાક નેતાઓ તેની ઈર્ષ્યા કરતા હતા.

નરવાલની માતા સવિતાએ રોહતકમાં પત્રકારો સાથે વાત કરતા આરોપ લગાવ્યો હતો કે થોડા સમયમાં નરવાલના રાજકીય ઉદયને કારણે કોંગ્રેસના કેટલાક નેતાઓ તેમની ઈર્ષ્યા કરે છે.  તેમનો પુત્ર જતીન પણ તેમની સાથે હતો.  સવિતાએ કહ્યું, તે પાર્ટીમાં કોઈ વ્યક્તિ હોઈ શકે જે તેની પ્રગતિની ઈર્ષ્યા કરે છે અથવા તે કોઈ અન્ય હોઈ શકે છે.

કોંગ્રેસના હરિયાણા એકમના નેતાઓએ નરવાલને સક્રિય અને સમર્પિત કાર્યકર તરીકે વર્ણવ્યા, જેમણે રાહુલ ગાંધીની આગેવાની હેઠળની ‘ભારત જોડો’ યાત્રામાં પણ ભાગ લીધો હતો. તેણે કહ્યું કે તે કાયદાનો અભ્યાસ કરી રહી છે અને છેલ્લા એક દાયકાથી પાર્ટી સાથે જોડાયેલી છે.

પૂર્વ મુખ્યમંત્રી ભૂપેન્દ્ર સિંહ હુડ્ડાએ કહ્યું કે હિમાની નરવાલ હત્યા કેસ અંગે તેમણે રોહતકના પોલીસ અધિક્ષક સાથે વાત કરી છે. તેમણે કહ્યું કે પોલીસ અને સરકારે પીડિત પરિવારને ઝડપી ન્યાય સુનિશ્ચિત કરવો જોઈએ.  કાયદો અને વ્યવસ્થાને લઈને ભાજપની આગેવાનીવાળી સરકાર પર નિશાન સાધતા હુડ્ડાએ કહ્યું કે, કોંગ્રેસ કાર્યકર હિમાનીની હત્યા બાદ ફરી એકવાર રાજ્યની કાયદો અને વ્યવસ્થા પર ગંભીર સવાલો ઉભા થઈ રહ્યા છે.

આ પણ વાંચો :- મહાકુંભ પૂર્ણ થયા પછી પીએમ મોદી તરત જ કેમ સોમનાથ પહોંચ્યા? જાણો કારણ