નવી દિલ્હી, 11 જાન્યુઆરી : લશ્કર-એ-તૈયબા (LeT)ના સ્થાપક સભ્ય અને હાફિઝ સઈદના નાયબ હાફિઝ અબ્દુલ સલામ ભુતાવીના મૃત્યુના સમાચારની પુષ્ટિ કરવામાં આવી છે. સંયુક્ત રાષ્ટ્ર સુરક્ષા પરિષદ (UNSC) એ આ વાતની પુષ્ટિ કરી છે. યુએનની વેબસાઈટ પર અપડેટ થયેલી માહિતી અનુસાર, 29 મે 2023ના રોજ પંજાબ પ્રાંતના મુરીદકેમાં પાકિસ્તાન પોલીસની કસ્ટડીમાં હતા ત્યારે ભુતાવીનું હાર્ટ એટેકથી મૃત્યુ થયું હતું. ભુતાવીએ જ 26/11ના મુંબઈ હુમલા માટે આતંકવાદીઓને તાલીમ આપવામાં મદદ કરી હતી.
2012 માં યુએનએસસીની વોન્ટેડ જાહેર કરાયો હતો
ભુતાવીને અલ-કાયદા સાથેના સંબંધો માટે 2012 માં યુએનએસસીની વોન્ટેડ યાદીમાં પ્રથમ વખત સૂચિબદ્ધ કરવામાં આવ્યો હતો, કારણ કે તે અલ-કાયદાની પ્રવૃત્તિઓને હાથ ધરવા માટે નાણાં પૂરા પાડવા, આયોજન કરવા, સુવિધા આપવા, તાલીમ આપવામાં સામેલ હતો. યુએનએસસી અનુસાર, ભુતાવીએ ઓછામાં ઓછા બે પ્રસંગોએ એલઈટી અથવા જમાત-ઉદ-દાવા (JuD) ઓપરેટિવ તરીકે કામ કર્યું હતું જ્યારે હાફિઝ સઈદની અટકાયત કરવામાં આવી હતી.
હુમલાના થોડા જ દિવસોમાં તેની અટકાયત થઈ હતી
નવેમ્બર 2008ના મુંબઈ હુમલાના થોડા દિવસો બાદ સઈદની અટકાયત કરવામાં આવી હતી અને તે જૂન 2009 સુધી કસ્ટડીમાં રહ્યો હતો. ભુતાવીએ આ સમયગાળા દરમિયાન સંસ્થાના રોજબરોજના કામકાજ સંભાળ્યા અને સંસ્થા વતી સ્વતંત્ર નિર્ણયો લીધા હતા. મે 2002માં પણ સઈદની અટકાયત કરવામાં આવી હતી. ભુતાવી 2002માં પાકિસ્તાનના લાહોરમાં લશ્કર-એ-તૈયબાના સંગઠનાત્મક આધારની સ્થાપનાનો હવાલો સંભાળતા હતા.
ગત મે મહિનામાં મોતની કરાઈ હતી જાહેરાત
નોંધનીય છે કે ગયા વર્ષે મે મહિનામાં પણ પીટીઆઈએ આતંકવાદીના મોતની જાણ કરી હતી અને તે જ કારણ આપ્યું હતું જે આજે યુએનએસસીની સાઇટ પર આપવામાં આવ્યું છે. 77 વર્ષીય ભુતાવી ઓક્ટોબર 2019 થી ટેરર ફાઇનાન્સિંગ કેસમાં લાહોરથી લગભગ 60 કિલોમીટર દૂર શેખુપુરા જિલ્લા જેલમાં કેદ હતા. 29 મેના રોજ, તેને છાતીમાં તીવ્ર દુખાવો થયો હતો અને તેને હોસ્પિટલમાં લઈ જવામાં આવ્યો હતો, જ્યાં પહોંચતા જ તેને મૃત જાહેર કરવામાં આવ્યો હતો, જેયુડીના એક અધિકારીએ પીટીઆઈને જણાવ્યું હતું.
