ભાવનગર રેલવે ડિવિઝને હાંસલ કરી અભૂતપૂર્વ સિદ્ધિ

• ભાવનગર રેલવે ડિવિઝન રેલ રાજસ્વની આવકમાં અભૂતપૂર્વ સિદ્ધિ હાંસલ કરી છે
• નાણાકીય વર્ષ 2023-24માં રેલવેની આવકમાં 1268 કરોડ રૂપિયા એકત્ર થયા

ભાવનગર, 01 એપ્રિલ : વેસ્ટર્ન રેલવેનું ભાવનગર ડિવિઝન મુસાફરોને સુવિધા આપવા સાથે રેલવેની આવક વધારવામાં પણ મહત્ત્વનું યોગદાન આપી રહ્યું છે. આ દિશામાં સતત પ્રયાસો ચાલુ રાખીને ભાવનગર મંડળે વધુ એક સિદ્ધિ હાંસલ કરી છે અને નાણાકીય વર્ષ 2023-24 દરમિયાન માલવાહક વાહનવ્યવહાર, પેસેન્જર પરિવહન સેવા અને અન્ય કોચિંગ આવક સહિત રેલવેની આવક તરીકે રૂ. 1268.70 કરોડ એકત્ર કરવાનું ગૌરવ મેળવ્યું છે. ભાવનગર ડિવિઝનના ડિવિઝનલ રેલવે મેનેજર રવીશ કુમારના ઊર્જાવાન અને કુશલ નેતૃત્વ અને ડિવિઝનના સીનિયર ડિવિઝનલ કોમર્શિયલ મેનેજર માશૂક અહમદ અને તેમની ટીમના સતત પ્રયાસોને કારણે આ ઉત્કૃષ્ટ સિદ્ધિ પ્રાપ્ત થઈ છે.

ભાવનગર ડિવિઝનના સીનિયર ડીસીએમ માશૂક અહમદના જણાવ્યા અનુસાર, ભાવનગર ડિવિઝને નાણાકીય વર્ષ 2023-24 દરમિયાન રૂ. 1268.70 કરોડની રેલવે આવક હાંસલ કરી છે. જે પાછલા નાણાકીય વર્ષ 2022-23ના રૂ. 1150.40 કરોડ કરતાં 10.30% વધુ છે.

આ વર્ષે નૂર પરિવહનમાંથી રૂ. 984.21 કરોડ મળ્યા છે જ્યારે ગયા વર્ષે રૂ. 917.59 કરોડ મળ્યા હતા. આ વર્ષે પેસેન્જર ટ્રાન્સપોર્ટમાંથી રૂ. 255.43 કરોડ મળ્યા છે જ્યારે ગયા વર્ષે રૂ. 210.06 કરોડ મળ્યા હતા. આ વર્ષે, અન્ય કોચિંગ આવક (જેમ કે ટિકિટ ચેકિંગ, પાર્સલ, લગેજ, કેટરિંગ, પાર્કિંગ વગેરે)માંથી રૂ. 29.05 કરોડ પ્રાપ્ત થયા છે જ્યારે ગયા વર્ષે રૂ. 22.75 કરોડ મળ્યા હતા. આમ, ભાવનગર મંડળે નાણાકીય વર્ષ 2023-24માં તમામ ક્ષેત્રોમાં ઉત્કૃષ્ટ દેખાવ કર્યો છે.

આ પણ વાંચો : ચૂંટણી રંગોળી: કમલનાથના નજીકના મેયરે છોડી કોંગ્રેસ, બીજેપીએ છિંદવાડામાં વધુ એક મોટો ખાડો પાડ્યો