બેંગલુરુ દુર્ઘટના : CM સિદ્ધારમૈયાએ મૃતકોને મળનારી સહાયમાં કર્યો વધારો, હવે રૂ.25 લાખ મળશે
બેંગલુરુ, 7 જૂન : બેંગલુરુના એમ.ચિન્નાસ્વામી સ્ટેડિયમમાં બનેલી દુ:ખદ ઘટના બાદ, કર્ણાટકના મુખ્યમંત્રી સિદ્ધારમૈયાએ મોટી જાહેરાત કરી છે. તેમણે અકસ્માતમાં માર્યા ગયેલા લોકોના પરિવારોને આપવામાં આવતી વળતરની રકમ વધારીને 25 લાખ રૂપિયા કરવાનો આદેશ આપ્યો છે.
અગાઉ, રાજ્ય સરકારે 10 લાખ રૂપિયાની રાહત રકમની જાહેરાત કરી હતી, પરંતુ ઘટનાની ગંભીરતાને જોતા, મુખ્યમંત્રીએ આ રકમ વધારવાનો નિર્ણય લીધો છે. મુખ્યમંત્રી સિદ્ધારમૈયાએ અધિકારીઓને સૂચના આપી છે કે અસરગ્રસ્ત પરિવારોને આ વળતર શક્ય તેટલી વહેલી તકે આપવામાં આવે જેથી તેઓ આર્થિક રાહત મેળવી શકે. નોંધનીય છે કે સ્ટેડિયમમાં થયેલી આ દુર્ઘટનાએ સમગ્ર રાજ્યને હચમચાવી નાખ્યું છે.
11 લોકોએ જીવ ગુમાવ્યા
આ અકસ્માત ત્યારે થયો જ્યારે હજારો લોકો 18 વર્ષ પછી RCB ના IPL ટ્રોફી જીતવાની ઉજવણી કરવા માટે સ્ટેડિયમ જવા માટે એકઠા થયા હતા. પ્રત્યક્ષદર્શીઓના જણાવ્યા અનુસાર, ઉજવણી દરમિયાન, સ્ટેડિયમની બહાર અને અંદર ભીડ અચાનક બેકાબૂ બની ગઈ, જેના કારણે અરાજકતા ફેલાઈ ગઈ. આ અકસ્માતમાં 11 લોકોએ જીવ ગુમાવ્યા અને ઘણા ઘાયલ થયા હતા.
કર્ણાટક રાજ્ય ક્રિકેટ એસો.ના બે અધિકારીઓનું રાજીનામું
બેંગલુરુના ચિન્નાસ્વામી સ્ટેડિયમમાં થયેલા અકસ્માત બાદ, આ મામલામાં નવો વળાંક આવ્યો છે. કર્ણાટક રાજ્ય ક્રિકેટ એસોસિએશન (KSCA) ના સચિવ એ.શંકર અને ખજાનચી ઇ.એસ.જયરામે તેમના પદ પરથી રાજીનામું આપી દીધું છે. બંને અધિકારીઓએ નૈતિક જવાબદારી લેતા આ પગલું ભર્યું છે.
નોંધનીય છે કે આ અકસ્માત પછી, RCB, KSCA અને ઇવેન્ટ મેનેજમેન્ટ ફર્મ DNA એન્ટરટેઈનમેન્ટ નેટવર્ક્સ સામે FIR નોંધવામાં આવી હતી. આ પછી, KSCA અને RCB એ હાઈકોર્ટમાં અરજી દાખલ કરી હતી. તે જ સમયે, કર્ણાટક હાઈકોર્ટે પણ આ મામલાની સુઓમોટો નોંધ લીધી છે અને રાજ્ય સરકારને નોટિસ જારી કરી છે અને રિપોર્ટ મંગાવ્યો છે. આગામી સુનાવણી 10 જૂને થશે.
મહત્વનું છે કે, IPL 2025 ના ફાઇનલમાં, રોયલ ચેલેન્જર્સ બેંગ્લોરે (RCB) એ પંજાબ કિંગ્સને 6 રનથી હરાવીને પ્રથમ વખત IPL ટ્રોફી જીતી હતી. આ ઐતિહાસિક જીત પછી, જ્યારે RCB ટીમ બુધવારે બેંગ્લોર પહોંચી, ત્યારે એરપોર્ટ પર હજારો ચાહકોએ તેમનું ભવ્ય સ્વાગત કર્યું હતું.
ત્યારબાદ મુખ્યમંત્રી સિદ્ધારમૈયાને મળવા માટે વિધાનસભા (કર્ણાટક વિધાનસભા) જવા રવાના થતાં ચાહકોએ તાળીઓ અને સૂત્રોચ્ચાર સાથે ટીમનો ઉત્સાહ વધાર્યો હતો. 18 વર્ષની લાંબી રાહ પછી IPL ટ્રોફી જીતનાર RCB ટીમના સન્માનમાં એમ.ચિન્નાસ્વામી સ્ટેડિયમ ખાતે એક ભવ્ય વિજય પરેડનું આયોજન કરવામાં આવ્યું હતું, જેમાં હજારો સમર્થકોએ ભાગ લીધો હતો.
