બેંગલુરુ ટેસ્ટ : ભારતને 8 વિકેટે હરાવી ન્યુઝિલેન્ડની ઐતિહાસિક જીત

બેંગલુરુ, 20 ઓક્ટોબર : ભારત અને ન્યુઝિલેન્ડ વચ્ચે 3 મેચની ટેસ્ટ શ્રેણીની પ્રથમ મેચ બેંગલુરુના એમ.ચિન્નાસ્વામી સ્ટેડિયમમાં રમાઈ હતી. ન્યૂઝીલેન્ડે આ મેચ 8 વિકેટે જીતી લીધી હતી. ન્યુઝિલેન્ડને જીતવા માટે 107 રનનું લક્ષ્ય હતું, જે તેણે રમતના પાંચમા દિવસે (20 ઓક્ટોબર) લંચ પહેલા હાંસલ કર્યું હતું. આ જીત સાથે ન્યુઝિલેન્ડે શ્રેણીમાં 1-0ની સરસાઈ મેળવી લીધી છે. બંને દેશો વચ્ચે બીજી ટેસ્ટ મેચ 24 ઓક્ટોબરથી પુણેમાં રમાશે.

ન્યુઝિલેન્ડ 36 વર્ષ પછી ભારતમાં જીત્યું

જો જોવામાં આવે તો ન્યુઝિલેન્ડે 36 વર્ષ બાદ ભારતીય ધરતી પર ટેસ્ટ જીત હાંસલ કરી છે. આ પહેલા તેણે નવેમ્બર 1988માં વાનખેડે સ્ટેડિયમમાં રમાયેલી મેચમાં ભારતને 136 રનથી હરાવ્યું હતું. એકંદરે, ભારતની ધરતી પર ન્યુઝિલેન્ડની આ ત્રીજી ટેસ્ટ જીત હતી. ન્યુઝિલેન્ડને ભારતમાં 1969માં નાગપુરમાં પ્રથમ ટેસ્ટ જીત મળી હતી. જેમાં તેણે યજમાન ટીમને 167 રનથી હરાવ્યું હતું.

ભારત પ્રથમ દાવમાં માત્ર 46 રનમાં જ ઓલઆઉટ થયું હતું

આ મેચમાં ભારતીય ટીમે તેની પ્રથમ ઇનિંગમાં માત્ર 46 રન બનાવ્યા હતા. જવાબમાં ન્યુઝિલેન્ડે 402 રન બનાવ્યા હતા. આ રીતે ન્યુઝિલેન્ડની ટીમને પ્રથમ દાવના આધારે 356 રનની જંગી લીડ મળી હતી. ત્યારપછી ભારતીય ટીમે તેના બીજા દાવમાં 462 રન બનાવ્યા અને કીવીઓને 107 રનનો ટાર્ગેટ આપ્યો હતો. ન્યુઝિલેન્ડની ટીમ અત્યાર સુધી ભારતીય ધરતી પર એકપણ દ્વિપક્ષીય ટેસ્ટ શ્રેણી જીતવામાં સફળ રહી નથી. આ વખતે બંને ટીમો વચ્ચે 13મી ટેસ્ટ શ્રેણી રમાઈ રહી છે.

આ પણ વાંચો :- RSSના કાર્યકરો ઉપર ચાકુથી હુમલો કરનાર નસીબ ચૌધરીના ગેરકાયદે મકાન ઉપર ફર્યું બુલડોઝર