BJP માટે મત માંગનાર બંગાળ કોંગ્રેસ મહાસચિવ 6 વર્ષ માટે સસ્પેન્ડ
નવી દિલ્હી, 23 એપ્રિલ : લોકસભા ચૂંટણી દરમિયાન પશ્ચિમ બંગાળ કોંગ્રેસમાં મોટો રાજકીય ભૂકંપ જોવા મળ્યો હતો. કારણ કે, પાર્ટીએ પશ્ચિમ બંગાળમાં રાજ્ય એકમના મહાસચિવ બિનોય તમંગને છ વર્ષ માટે સસ્પેન્ડ કરી દીધા છે. પાર્ટીએ આ કાર્યવાહી એટલા માટે કરી છે કારણ કે તમંગે દાર્જિલિંગ લોકસભા સીટ પરથી કોંગ્રેસના ઉમેદવારને બદલે બીજેપી ઉમેદવાર રાજુ બિસ્તાને વોટ કરવાની અપીલ કરી હતી. બિનોય તમંગે કહ્યું હતું કે તે લોકસભા ચૂંટણીમાં દાર્જિલિંગથી ભાજપના ઉમેદવાર રાજુ બિસ્તાને સમર્થન કરશે. જાણીતા ગોરખા નેતા બિનોય તમંગ થોડા મહિના પહેલા જ કોંગ્રેસમાં જોડાયા હતા.
કોંગ્રેસના ઉમેદવાર સામે હતો વાંધો
બિનોય તમંગે દાર્જિલિંગ બેઠક પરથી કોંગ્રેસના ઉમેદવાર મુનીશ તમંગના નામ સામે વાંધો ઉઠાવ્યો હતો. તેમણે કહ્યું હતું કે પાર્ટી હાઈકમાન્ડે ઉમેદવાર માટે તેમની સાથે સલાહ લીધી નથી. આ પછી, તેણે હવે કહ્યું કે હું દાર્જિલિંગ લોકસભા ક્ષેત્રમાંથી ભાજપના ઉમેદવાર રાજુ બિસ્તાને સંપૂર્ણ સમર્થન આપવા માંગુ છું કારણ કે આનાથી દાર્જિલિંગના પર્વતીય વિસ્તારોના લોકોને સુરક્ષા અને ન્યાય મળશે. હું દાર્જિલિંગના લોકોને, મારા સમર્થકો, મિત્રો અને સંબંધીઓને કહેવા માંગુ છું કે તેઓ ભાજપના ઉમેદવાર રાજુ બિસ્તાને પોતાનો અમૂલ્ય મત આપે.
વીડિયો સંદેશમાં ભાજપને સમર્થન આપ્યું હતું
આ વિસ્તારમાં મતદાનના માત્ર 72 કલાક પહેલા બિનોય તમંગે એક વીડિયો સંદેશમાં કહ્યું હતું કે, ‘દાર્જિલિંગમાં ગોરખાઓને ન્યાય મળે તે માટે હું ભાજપના ઉમેદવાર રાજુ બિસ્તાને સમર્થન આપી રહ્યો છું. 26મી એપ્રિલે ભાજપ અને તેના ઉમેદવાર રાજુ બિસ્તાને મત આપો. કેન્દ્રમાં ફરી ભાજપની સરકાર આવી રહી છે. 2026ની વિધાનસભા ચૂંટણીમાં પશ્ચિમ બંગાળમાં પણ ભાજપની સરકાર સત્તામાં આવે તેવી સંભાવના છે. મેં સિલીગુડી, દૂઅર્સ અને પહાડીઓની રાજકીય અને બંધારણીય સમસ્યાઓને ન્યાય આપવા માટે આગામી સરકારને સમર્થન આપવાનું નક્કી કર્યું છે. ‘ભ્રષ્ટાચાર અને ભત્રીજાવાદને પણ પહાડોમાં ખતમ કરવો પડશે.’
બિનોય પાંચ મહિના પહેલા જ કોંગ્રેસમાં જોડાયા હતા
ઉલ્લેખનીય છે કે, બિનોય તમંગ એક સમયે ગોરખા જનમુક્તિ મોરચાના નેતા અને બિમલ ગુરુંગના અનુયાયી હતા. તેઓ 2021 માં તૃણમૂલ કોંગ્રેસમાં જોડાયા હતા. તેમણે 2022માં તૃણમૂલ છોડી દીધું હતું. નવેમ્બર 2023 માં તેઓ પ્રદેશ કોંગ્રેસ અધ્યક્ષ અધીર રંજન ચૌધરી સાથે દિલ્હી ગયા અને કોંગ્રેસમાં જોડાયા હતા. આ ઘટના માત્ર 5 મહિના પહેલા જ બની હતી. જ્યારે દાર્જિલિંગમાં કોંગ્રેસે મુનીશ તમાંગને પોતાના ઉમેદવાર બનાવ્યા છે. મુનીશ ગોરખા પરિષદના અધ્યક્ષ પદ પરથી રાજીનામું આપીને કોંગ્રેસમાં જોડાયા હતા. સૂત્રોના જણાવ્યા અનુસાર બિનોય તમંગ દાર્જિલિંગમાં ઉમેદવાર બનવા માંગતા હતા. આવી જ દરખાસ્ત કોંગ્રેસ હાઈકમાન્ડને પણ મોકલવામાં આવી હતી.
