બાંગ્લાદેશે ઈતિહાસ રચ્યો, અફઘાનિસ્તાનને 546 રને હરાવ્યું

ઢાકાના શેર-એ-બાંગ્લા નેશનલ સ્ટેડિયમમાં રમાયેલી એકમાત્ર ટેસ્ટ મેચમાં બાંગ્લાદેશે અફઘાનિસ્તાનને 546 રનથી હરાવ્યું હતું. 21મી સદીમાં ટેસ્ટ ક્રિકેટમાં આ સૌથી મોટી જીત છે.

બાંગ્લાદેશે તેની પ્રથમ ઈનિંગમાં 382 રન બનાવ્યા હતા. જવાબમાં અફઘાનિસ્તાનની ટીમ 146 રનમાં સમેટાઈ ગઈ હતી. આ પછી બાંગ્લાદેશે બીજી ઇનિંગમાં 4 વિકેટે 425 રન બનાવીને દાવ ડિકલેર કર્યો હતો અને અફઘાનિસ્તાનને માત્ર 115 રનમાં જ આઉટ કરી દીધું હતું. આ રીતે બાંગ્લાદેશે 546 રનનો વિશાળ વિજય નોંધાવ્યો હતો. ટેસ્ટ ક્રિકેટના ઈતિહાસમાં આ ત્રીજી સૌથી મોટી જીત છે.

નજમુલ હુસેન શાંતોએ બંને ઈનિંગ્સમાં સદી ફટકારી

અફઘાનિસ્તાન સામેની એકમાત્ર ટેસ્ટમાં બાંગ્લાદેશના બેટ્સમેન અને બોલરો બંનેએ શાનદાર પ્રદર્શન કર્યું હતું. પ્રથમ દાવમાં ઓપનર મહમુદલ હસને 76 રન અને ત્રીજા નંબરના બેટ્સમેન નજમુલ હુસેન શાંતોએ 146 રનની શાનદાર સદી ફટકારી હતી. મુશ્ફિકુર રહીમે 47 અને મહેંદી હસન મિરાજે 48 રન બનાવ્યા હતા. આ પછી ફાસ્ટ બોલર ઇબાદત હુસૈને બોલિંગમાં ચાર વિકેટ ઝડપી હતી. બીજી તરફ તૈજુલ ઈસ્લામ, મહેંદી હસન મિરાજ અને શોરીફુલ ઈસ્લામને બે-બે સફળતા મળી.

બાંગ્લાદેશ તરફથી બીજી ઈનિંગમાં નજમુલ હુસેન શાંતોએ ફરી એકવાર સદી ફટકારી હતી. આ વખતે શાંતોએ 124 રન બનાવ્યા હતા. બંને ઇનિંગ્સમાં સદી ફટકારવા બદલ તેને પ્લેયર ઓફ ધ મેચનો એવોર્ડ મળ્યો હતો. આ સિવાય મોમિનુલ હકે 121 રન બનાવ્યા હતા. ઓપનર ઝાકિર હસને 71 અને કેપ્ટન લિટન દાસે અણનમ 66 રન બનાવ્યા હતા. બોલિંગમાં તસ્કીન અહેમદે ચાર અને શોરીફુલ ઈસ્લામે ત્રણ વિકેટ ઝડપી હતી. ઇબાદત હુસૈન અને મહેંદી હસન મિરાજને એક-એક સફળતા મળી હતી.

બાંગ્લાદેશે 112 વર્ષ જૂનો રેકોર્ડ તોડ્યો

ટેસ્ટ ક્રિકેટમાં રનના મામલે બાંગ્લાદેશની હવે ત્રીજી સૌથી મોટી જીત છે. આ રેકોર્ડ લિસ્ટમાં ઈંગ્લેન્ડ નંબર વન અને ઓસ્ટ્રેલિયા બીજા નંબર પર છે. 1928માં ઈંગ્લેન્ડ 675 રનથી જીત્યું હતું. ઓસ્ટ્રેલિયાએ 1934માં ટેસ્ટ મેચ 562 રને જીતી હતી.