બાંગ્લાદેશમાં કર્મચારીને બચાવવા આવેલા દુકાનદારની પાવડા વડે હત્યા

બાંગ્લાદેશના ગાઝીપુર જિલ્લામાં એક હિન્દુ વ્યક્તિને તેના કર્મચારીને બચાવવાનો પ્રયાસ કરતી વખતે માર મારવામાં આવ્યો હતો. 55 વર્ષીય લિટન ચંદ્ર ઘોષ બારાનગર રોડ પર “બૈશાખી સ્વીટમીટ એન્ડ હોટેલ” નામની મીઠાઈની દુકાન ચલાવે છે, જ્યાં આ વિવાદ થયો હતો. પોલીસના જણાવ્યા અનુસાર, શનિવારે સવારે 11 વાગ્યે, માસૂમ મિયાં અને 17 વર્ષીય કર્મચારી અનંત દાસ વચ્ચે નાની બાબતે ઝઘડો થયો. આ ઝઘડો ઝડપથી શારીરિક ઝઘડામાં ફેરવાઈ ગયો.

થોડી વારમાં જ, માસૂમના માતા-પિતા, મોહમ્મદ સ્વપન મિયાં અને માજેદા ખાતુન આવી પહોંચ્યા અને તેઓએ પણ ઝઘડો શરૂ કરી દીધો. લિટન ઘોષે અનંત દાસને બચાવવા અને ભીડને શાંત કરવા દરમિયાનગીરી કરી, પરંતુ તેમના પર પણ હુમલો કરવામાં આવ્યો. તેમના માથા પર પાવડા વડે હુમલો કરવામાં આવ્યો અને ઈજાઓથી તેમનું ઘટનાસ્થળે જ મૃત્યુ થયું.

ઘટનાસ્થળે હાજર સ્થાનિક લોકોએ સ્વપન મિયાં, માજેદા ખાતૂન અને માસૂમ મિયાંને પકડીને પોલીસને સોંપી દીધા. પોલીસે જણાવ્યું કે ત્રણેય શંકાસ્પદોને કસ્ટડીમાં લેવામાં આવ્યા છે અને કાયદેસરની કાર્યવાહી ચાલી રહી છે.

લિટન ઘોષની હત્યા બાદ સ્થાનિક સમુદાયમાં ભારે રોષ જોવા મળી રહ્યો છે. આ ઘટનાથી એક દિવસ પહેલાં, શુક્રવારે બાંગ્લાદેશમાં એક અન્ય હિંદુ વ્યક્તિનુ પણ એસયુવી વાહનથી કચડાઈને મોત થયું હતું. 30 વર્ષીય રિપન સાહા પેટ્રોલ પંપ પર કામ કરતો હતો. તેણે પૈસા ચૂકવ્યા વગર વાહન લઈ જવાથી રોકવાનો પ્રયાસ કર્યો હતો, પરંતુ કારે કથિત રીતે તેને કચડી નાખ્યો અને ત્યારબાદ કાર ફરાર થઈ ગઈ હતી.

આ પણ વાંચો: મનોજ તિવારીના ઘરે લાખોની ચોરી, જૂનો કર્મચારી ચોર નીકળ્યો; ધરપકડ કરી