બાંગ્લાદેશ: ચિન્મય દાસના જામીન પર આજે સુનાવણી, બહાર આવશે હિન્દુ સંત?

ઢાકા, 2 જાન્યુઆરી : બાંગ્લાદેશની જેલમાં બંધ હિન્દુ સંત ચિન્મય કૃષ્ણ દાસના જામીનની સુનાવણી આજે ગુરુવારે થશે. તેમના જામીનની સુનાવણી ચટ્ટગાંવ મેટ્રોપોલિટન સેશન્સ જજની કોર્ટમાં થશે, પરંતુ ચિન્મય કૃષ્ણ દાસના વકીલ રવિન્દ્ર ઘોષ કોલકાતાની SSKM હોસ્પિટલમાં દાખલ છે. આ કારણથી તેની હાજરીની શક્યતા ઘણી ઓછી છે.  દરમિયાન, ઇન્ટરનેશનલ સોસાયટી ફોર ક્રિષ્ના કોન્શિયસનેસ (ઇસ્કોન) કોલકાતાના પ્રવક્તા રાધારમણ દાસે ન્યાયની આશા વ્યક્ત કરી છે.

મહત્વનું છે કે 27 નવેમ્બરના રોજ ઢાકા પોલીસે ચિન્મય કૃષ્ણ દાસને ઢાકાથી ચટ્ટગાંવ જતા શાહજલાલ એરપોર્ટ પરથી ધરપકડ કરી હતી. બીજા દિવસે ચટ્ટગાંવ કોર્ટમાં તેના કેસની સુનાવણીને લઈને કોર્ટ પરિસરમાં હોબાળો મચી ગયો હતો. આ દરમિયાન સૈફુલ ઈસ્લામ અલીફ નામના વકીલનું મોત થયું હતું.

આ પહેલા બાંગ્લાદેશની જેલમાં બંધ ચિન્મય કૃષ્ણ દાસના વકીલ રવિન્દ્ર ઘોષને બીમારીના કારણે હોસ્પિટલમાં દાખલ કરવામાં આવ્યા છે. હાર્ટ એટેકના કારણે તેમની કોલકાતાની SSKM હોસ્પિટલમાં સારવાર ચાલી રહી છે.

બીજી તરફ રાધારમણ દાસે કહ્યું કે ઇસ્કોનના સાધુઓએ બાંગ્લાદેશમાં હિન્દુઓ અને અન્ય ધાર્મિક લઘુમતીઓના રક્ષણ માટે પ્રાર્થના કરી છે. તેમણે આશા વ્યક્ત કરી હતી કે ચિન્મય કૃષ્ણ દાસને ન્યાય મળશે. તેમણે કહ્યું કે છેલ્લી સુનાવણી દરમિયાન વકીલને હાજર રહેવા દેવામાં આવ્યા ન હતા. આ વખતે ધારણા છે કે વકીલને મંજૂરી આપવામાં આવશે. જો વકીલ પર હુમલો થશે તો બાંગ્લાદેશ સરકાર તેની સામે કાર્યવાહી કરશે.

આ પણ વાંચો :- સિડની ટેસ્ટ માટે ઓસ્ટ્રેલિયાની ટીમની જાહેરાત, મિશેલ માર્શ બહાર, આ ખેલાડી ડેબ્યૂ કરશે