બનાસકાંઠા: ડીસા-પાલનપુર હાઇવે પર બે ટ્રકો અકસ્માત બાદ સળગી, ચાલક જીવતો ભૂંજાયો
પાલનપુર: બનાસકાંઠા જિલ્લા ના ટ્રાફિકથી ધમધમતા ડીસા-પાલનપુર હાઇવે પર ચંડીસર પાસે બે ટ્રકો વચ્ચે ગમખ્વાર અકસ્માત સર્જાયો હતો. આ બંને ટ્રકો ધડાકાભેર અથડાઈ હતી. પરિણામે બંને ટ્રકો માં એકાએક આગ ફાટી નીકળી હતી, અને આગની જ્વાળાઓ ભિષણ બની ગઈ હતી. આ આગની ઘટનામાં એક ટ્રકનો ચાલક જીવતો ભૂંજાઈ ગયો હોવાનું જાણવા મળ્યું છે.
ડીસા-પાલનપુર હાઇવે પર બે ટ્રકો અકસ્માત બાદ સળગી#deesa #palanpur #Highway #accident #truckaccident #Gujarat #GujaratiNews #humdekhengenews pic.twitter.com/42uhgrblU4
— Hum Dekhenge News (@humdekhengenews) July 13, 2023
હાઈવે પર મોડી રાત્રે બનેલી ઘટના
જ્યારે બીજી ટ્રકના ચાલકનો આબાદ બચાવ થવા પામ્યો છે. બંને ટ્રકો વચ્ચે અકસ્માત સર્જાતા અફડા તફડીનો માહોલ સર્જાયો હતો. આ ઘટનાના પગલે આજુબાજુથી મોટી સંખ્યામાં લોકો ઘટના સ્થળે દોડી આવ્યા હતા. જ્યારે આ ઘટના અંગે પાલનપુર ફાયર ફાઈટરને પણ જાણ કરવામાં આવતા ફાયર ફાઈટર નો સ્ટાફ તુરંત જ ઘટના સ્થળે પહોંચ્યો હતો, અને ટ્રકોમાં લાગેલી આગને બુઝાવવાની કામગીરી હાથ ધરી હતી. જોકે આગમાં બંને ટ્રકો બળીને ખાખ થઈ ગઈ હતી, અને બન્ને ટ્રક જાણે હાડપિંજરમાં ફેરવાઈ ગયો હતો. આ ઘટનાના પગલે પાલનપુર અને ડીસા બંને તરફનો વાહન વ્યવહાર થોડા કલાકો માટે ઠપ થઈ ગયો હતો. પરિણામે વાહનોની કતાર લાગી ગઈ હતી.
આ પણ વાંચો : લાંચિયા તલાટીને સસ્પેન્ડ કરાતા બુધેલ ગામમાં દિવાળી જેવો માહોલ, જુઓ આ સેલેબ્રેશન વીડિયો…
