અયોધ્યાઃ રામ મંદિરમાં વિધિ માટે પસંદ થયેલા પૂજારીઓની તાલીમ શરૂ

• શ્રી રામ મંદિરમાં પૂજારી બનવા માટે 3 હજારમાંથી 200 ઉમેદવારોને ઇન્ટરવ્યૂ માટે પસંદ કરાયા.
• ઇન્ટરવ્યૂમાં પસંદ કરાયેલ 200 ઉમેદવારોમાંથી 20 ઉમેદવારોને મંદિરમાં પૂજા કરવા માટે પસંદગી.

અયોધ્યા: અયોધ્યામાં રામ મંદિરના પૂજારીના પદ માટે 3000 ઉમેદવારોએ અરજી કરી હતી. તેમાંથી 200 ઉમેદવારોને ઇન્ટરવ્યુ માટે બોલાવવામાં આવ્યા છે. મકરસંક્રાંતિ પછી 22 જાન્યુઆરી 2024ના રોજ રામલલા તેમના ભવ્ય મંદિરમાં બિરાજમાન થશે.

ટ્રસ્ટના ખજાનચી ગોવિંદ દેવ ગિરીએ સોમવારે જણાવ્યું હતું કે 200 ઉમેદવારોને તેમની યોગ્યતાના આધારે ઇન્ટરવ્યુ માટે પસંદ કરવામાં આવ્યા છે અને ટ્રસ્ટ દ્વારા તેમને ઇન્ટરવ્યુ માટે બોલાવવામાં આવ્યા છે. અયોધ્યામાં વિશ્વ હિન્દુ પરિષદ (VHP)ના મુખ્યાલય કારસેવક પુરમ ખાતે તેમનો ઈન્ટરવ્યુ લેવામાં આવી રહ્યો છે. ટ્રસ્ટના જણાવ્યા અનુસાર વૃંદાવનના જયકાંત મિશ્રા અને અયોધ્યાના બે મહંત મિથિલેશ નંદિની શરણ અને સત્યનારાયણ દાસની ત્રણ સભ્યોની પેનલ તેમનો ઈન્ટરવ્યુ લઈ રહ્યા છે.

તમામ ઉમેદવારો તાલીમમાં ભાગ લઈ શકશે

આ 200 ઉમેદવારોમાંથી 20 ઉમેદવારોની પસંદગી કરવામાં આવશે. પસંદગી પામેલા ઉમેદવારોને છ મહિનાની તાલીમ બાદ પુરોહિત તરીકે નિયુક્ત કરવામાં આવશે અને તેમને વિવિધ પોસ્ટ્સ પર નિયુક્ત કરવામાં આવશે. ટ્રસ્ટના ખજાનચી ગોવિંદ દેવ ગીરીએ જણાવ્યું હતું કે જેઓ પસંદગી પામ્યા નથી તેઓ પણ તાલીમમાં ભાગ લઈ શકશે, તેમને પ્રમાણપત્ર આપવામાં આવશે. આ ઉમેદવારોને ભવિષ્યમાં તક આપવામાં આવી શકે છે. ઉમેદવારોની તાલીમ ટોચના સંતો દ્વારા તૈયાર કરાયેલા ધાર્મિક અભ્યાસક્રમ આધારિત અપાશે. તાલીમ દરમિયાન ઉમેદવારોને મફત ભોજન અને રહેવાની સુવિધા મળશે અને તેમને 2,000 રૂપિયાનું ભથ્થું પણ આપવામાં આવશે.

આ પ્રશ્નો ઉમેદવારોને પૂછવામાં આવી રહ્યા છે

ઇન્ટરવ્યુ દરમિયાન ઉમેદવારોને ઘણા પ્રશ્નો પૂછવામાં આવી રહ્યા છે. જેમ કે, ‘સંધ્યા વંદન’ શું છે, તેની પદ્ધતિઓ શું છે અને આ પૂજા માટેના ‘મંત્રો’ શું છે? ભગવાન રામની ઉપાસના માટેના ‘મંત્રો’ શું છે અને તેના માટે ‘કર્મકાંડ’ શું છે? …આવા સવાલ ઉમેદવારોને પૂછવામાં આવે છે.

પૂજા પદ્ધતિ રામાનંદીય સંપ્રદાય અનુસાર હશે

અયોધ્યામાં બનેલા રામ મંદિરમાં પૂજા કરવાની પદ્ધતિ પણ હાલની પદ્ધતિથી અલગ હશે. મંદિરમાં પૂજા કરવાની પદ્ધતિ રામાનંદીય સંપ્રદાય અનુસાર હશે. આ પૂજા માટે ખાસ અર્ચના કરવામાં આવશે. રામજન્મભૂમિ સંકુલમાં સ્થિત અસ્થાયી મંદિરમાં, અત્યાર સુધી અયોધ્યાના અન્ય મંદિરોની જેમ પંચોપચાર પદ્ધતિ (સામાન્ય રીત)થી પૂજા કરવામાં આવે છે. તેમાં ભગવાનને ભોજન અર્પણ, નવા વસ્ત્રો પહેરવા અને પછી સામાન્ય પૂજા અને આરતીનો સમાવેશ થાય છે. પરંતુ 22 જાન્યુઆરી 2024ના રોજ રામ લલ્લાના અભિષેક પછી આ બધું બદલાઈ જશે. પ્રાણ પ્રતિષ્ઠા પછી આ રામાનંદીય પરંપરા મુજબ કરવામાં આવશે. મુખ્ય પૂજારી, સહાયક પૂજારી અને સેવકો માટે રામાનંદીય પૂજા પદ્ધતિમાં રામલલાની પૂજા કરવાની જોગવાઈ રહેશે. જેમાં વસ્ત્રો પહેરવાની રીત સહિત પૂજાની ઘણી બાબતો નક્કી કરવામાં આવશે. હનુમાન ચાલીસાની જેમ રામલલાની સ્તુતિ કરવા માટે નવી પોથી (પુસ્તક) હશે. જેની રચના કરવામાં આવી છે અને તેને આખરી ઓપ આપવામાં આવી રહ્યો છે.

આ પણ વાંચો: ચંદ્રયાન-4 મિશન ચંદ્ર પરથી માટીના નમૂના પૃથ્વી પર પાછા લાવશે