માલદીવના પ્રમુખ મુઇઝઝૂ પર બ્લેક મેજિક કરવાનો પ્રયાસ, રાજ્યમંત્રી સહિત 3 આરોપીઓની ધરપકડ

• પોલીસે મંત્રીના ઘરે દરોડા પાડીને ઘણી વસ્તુઓ જપ્ત કરી હતી 

નવી દિલ્હી, 27 જૂન: માલદીવમાં મોટો ઘટનાક્રમ જોવા મળ્યો છે. કારણ કે, પોલીસે પ્રમુખ મોહમ્મદ મુઇઝઝૂ પર બ્લેક મેજિક કરવાના આરોપમાં દેશની સરકારના એક મંત્રીની ધરપકડ કરી છે. સ્થાનિક મીડિયા અનુસાર, પોલીસે પર્યાવરણ રાજ્ય મંત્રી ફાતિમા શમનાઝની સાથે અન્ય બે લોકોની મુઇઝઝૂની નજીક જવા માટે મેલીવિદ્યા કરવાના આરોપમાં ધરપકડ કરી છે.

પોલીસે એક નિવેદનમાં જણાવ્યું હતું કે, ત્રણેયની ધરપકડ કર્યા પછી, તેઓને કોર્ટમાં રજૂ કરવામાં આવ્યા હતા, જ્યાંથી કોર્ટે તમામને સાત દિવસની પોલીસ કસ્ટડીમાં મોકલી દીધા છે. સ્થાનિક અખબારના જણાવ્યા અનુસાર, મંત્રી શમનાઝના ભાઈ અને અન્ય એક આરોપીની ધરપકડ કરવામાં આવી છે. શમનાઝ પ્રમુખ કાર્યાલય મંત્રી એડમ રમીઝની પૂર્વ પત્ની છે. શમનાઝની ધરપકડ કરતા પહેલા પોલીસે તેના ઘરની તપાસ કરી હતી. પોલીસે ઘરમાંથી કેટલીક વસ્તુઓ પણ જપ્ત કરી છે.

મંત્રી શમનાઝના ઘરેથી બ્લેક મેજિક સાથે જોડાયેલી વસ્તુઓ જપ્ત

પોલીસ પ્રવક્તા અહેમદ શિફાને પણ મંગળવારે મંત્રી શમનાઝની સાથે અન્ય બે લોકોની ધરપકડની પુષ્ટિ કરી હતી. અગાઉ, પોલીસે શમાનાઝના ઘરે દરોડા પાડ્યા હતા અને ઘણી વસ્તુઓ જપ્ત કરી હતી જેનો ઉપયોગ બ્લેક મેજિક કરવા માટે થઈ શકે છે.

આરોપી મંત્રીએ મુઇઝઝૂ સાથે અનેક પદો પર કામ કર્યું હતું

ઉલ્લેખનીય છે કે, એપ્રિલમાં પર્યાવરણ મંત્રાલયમાં ટ્રાન્સફર થયા પહેલા, શમનાઝે પ્રમુખ ભવનમાં મુઇઝઝૂ માટે રાજ્ય મંત્રી તરીકે કામ કર્યું હતું, જે ગયા વર્ષે સપ્ટેમ્બરમાં ચૂંટાઈ હતી. તેમણે અગાઉ મુઇઝઝૂ સાથે માલેની સિટી કાઉન્સિલમાં પણ કામ કર્યું હતું અને જ્યારે મુઇઝઝૂ મેયર હતા ત્યારે સિટી કાઉન્સિલર તરીકે સેવા આપી હતી.

માલદીવમાં આવો જ એક કિસ્સો બની ચૂક્યો છે

બ્લેક મેજિક, જેને સ્થાનિક રીતે ફંડિટા અથવા સિહુરુ તરીકે ઓળખવામાં આવે છે, તે ઇસ્લામિક કાયદા હેઠળ ગંભીર અપરાધ માનવામાં આવે છે તેમ છતાં માલદીવમાં વ્યાપક માન્યતા છે. મે મહિનામાં, પોલીસે સંસદીય ચૂંટણી લડી રહેલા શાસક પક્ષના સભ્ય પર બ્લેક મેજિક કરવાના આરોપમાં 60 વર્ષીય વ્યક્તિની ધરપકડ કરી હતી. ડિસેમ્બર 2015માં, ઇસ્લામિક મંત્રાલયે એક જાહેર નિવેદન બહાર પાડીને ચેતવણી આપી હતી કે, સમાજમાં બ્લેક મેજિક ખૂબ જ સામાન્ય બની રહ્યો છે અને વ્યક્તિએ આવી પ્રથાઓથી દૂર રહેવું જોઈએ.

આ પણ જુઓ: સામ પિત્રોડાની ફરીથી ઈન્ડિયન ઓવરસીઝ કોંગ્રેસના પ્રમુખ તરીકે નિયુક્ત